ဖဲလါယူၤ(၁၉)သီ တုၤဃီၤဝဲကိးဘျီဒဲးန့ၣ် လၢထဲးကစဲးကီၢ်စဲၣ်(Texas) တၢ်လီၢ်လၢယဒိၣ်ထီၣ်အလီၢ်, ဖဲပှၤသူဖံးဖိအိၣ်တၢ်အကရူၢ်အကရၢအပူၤန့ၣ် ဘၣ်တၢ်သုးကျဲၤ မၤမူးလီၤဆီ ဒီးတၢ်လဲၤဟးကသုၣ် ဒီးအိၣ်သကိးအီသကိးတၢ်န့ၣ်လီၤ. တချုးလၢ ယအိၣ်ဆံဆဲၣ်နံၣ်အဘျဲၣ်န့ၣ် ယတသ့ၣ်ညါ Juneteenth လၢအမ့ၢ်တၢ်ပာ်ဖှိၣ် “June ဒီး nineteenth” ဒ်အမ့ၢ်တၢ်သးဘၣ်ဒိအမူး လၢဘၣ်တၢ်သုးကျဲၤမၤအီၤ အတၢ်အဂ့ၢ်လီၤဆီန့ၣ်ဘၣ်. Juneteenth မ့ၢ်တၢ်မၤတၢ်သ့ၣ်နီၣ်ထီၣ် မုၢ်နံၤတနံၤ လၢ ၁၈၆၅ နံၣ် ဖဲ ကုၢ်လၢ ဘၣ်တၢ်ပှ့ၤန့ၣ်အီၤလၢစ့ လၢထဲးကစဲးကီၢ်စဲၣ်တဖၣ် သ့ၣ်ညါဝဲလၢ အမဲရကၣ်ကီၢ်ခိၣ် အ့ၣ်ဘြဟၣ် လ့ကၢၣ် (President Abraham Lincoln) ဆဲးလီၤအမံၤလၢ ပဒိၣ်အတၢ်ဒုးသ့ၣ်ညါတၢ်အကါဒိၣ် ဆူကမျၢၢ်ဘၣ်ဃးတၢ်မၤပူၤဖျဲး လၢအဟ့ၣ်အဝဲသ့ၣ် တၢ်သဘျ့ လၢအပူၤကွံာ် ခံနံၣ်တခီန့ၣ်လီၤ. ၦၤဘၣ်တၢ်မၢကဲကုၢ်လၢ ထဲးကစဲးကီၢ်စဲၣ်တဖၣ် အိၣ်ဒံးဝဲဒၣ်လၢ တၢ်ကဲကုၢ်အလီၢ် မ့ၢ်လၢအဝဲသ့ၣ်တသ့ၣ်ညါဝဲလၢ အဘၣ်တၢ်မၤထူၣ်ဖျဲးအီၤလံအဃိန့ၣ်လီၤ.
တၢ်အံၤကဲထီၣ်အသးသ့ဝဲ လၢပဘၣ်တၢ်မၤထူၣ်ဖျဲးၦၤသနာ်က့ ပအိၣ်မူဒ်ကုၢ်ၦၤအသိးန့ၣ်လီၤ. လၢလံာ်ကလၤတံအပူၤ, စီၤပီလူးကွဲးဝဲဘၣ်ဃး တၢ်ကဲကုၢ်အဂၤတမံၤ – တၢ်အိၣ်မူလၢ တၢ်ဘူၣ်တၢ်ဘါတၢ်ဘျၢ လၢအဆီၣ်တံၢ်ၦၤအဖီလာ်န့ၣ်လီၤ. လၢအဆၢဖိအကါဒိၣ်တဆၢအံၤအပူၤႇ စီၤပီလူးဟ့ၣ်ဂံၢ်ဟ့ၣ်ဘါ အၦၤဖးလံာ်ဖိတဖၣ်လၢ အအိၣ်ဖျါဖဲ ကလၤ ၅:၁, “မၤသးဒ်န့ၣ်ဒီး, အိၣ်ဂၢၢ်ဆိးကျၢၤလၢ တၢ်ထူၣ်ဖျဲးအပူၤ လၢခရံာ်မၤထူၣ်ဖျဲးၦၤန့ၣ်တက့ၢ်. ဒီးသုတဘၣ်တၢ်ဖီၣ်ဃာ်ကဒီးသုလၢ ကုၢ်အနီၣ်ယိးဘိအဖီလာ်တဂ့ၤ”. ၦၤစူၣ်နာ်ခရံာ်တဖၣ် ဘၣ်တၢ်မၤထူၣ်ဖျဲးအီၤလၢ တၢ်သိၣ်တၢ်သီအချၢ လၢအပာ်ဃုာ်ဒီး ကဘၣ်အီၣ်တၢ်မနုၤ ဒီးကဘၣ်ရ့လိာ်သးဒီး မတၤန့ၣ်လီၤ. ဘၣ်ဆၣ် ၦၤအါဂၤအိၣ်ဒံးဒၣ် ဒ်အမ့ၢ်တၢ်ကုၢ်တၢ်ၦၢ်အသိးန့ၣ်လီၤ.
တၢ်လၢအလီၤသးအုးမ့ၢ်ဝဲ ပဝဲသ့ၣ်တဖၣ်စ့ၢ်ကီး ပမ့ၢ် တၢ်ဒ်သိးအံၤလၢ မုၢ်မဆါတနံၤအံၤန့ၣ်လီၤ. ဘၣ်ဆၣ် တၢ်မ့ၢ်တၢ်တီ မ့ၢ်ဝဲကစၢ်ယ့ၣ်ၡူးခရံာ် မၤထူၣ်ဖျဲးၦၤလၢ တၢ်အိၣ်မူ လၢအိၣ်ဒီးတၢ်ပျံၤတၢ်ဖုး လၢၦၤကညီအတၢ်ပာ်ပနီၣ် တၢ်ဘူၣ်တၢ်ဘါအလုၢ်အလၢ်ထူသနူ အပတီၢ်တဖၣ် အဖီလာ်န့ၣ်လီၤ. တၢ်သဘျ့ ဘၣ်တၢ်ဘိးဘၣ်သ့ၣ်ညါအီၤလံ. မ်ပကအိၣ်မူလၢ ကစၢ်အစိကမီၤပူၤတက့ၢ်.
