ဟံၣ်လၢယအိၣ်ဆိးဖဲ ယနီၢ်ဆံးအဆၢကတီၢ်, တၢ်ပာ်သိလ့ၣ်လီၢ်န့ၣ် အိၣ်ဒီး တၢ်သ့ၣ်နီၣ်တဖၣ် အါမးန့ၣ်လီၤ. တၢ်လၢမုၢ်ဘူၣ်နံၤ ဂီၤအဆၢကတီၢ်တဖၣ်န့ၣ် ယပၢ်တလ့ၣ်လီၤပသိလ့ၣ်ဆူ သိလ့ၣ်နုာ်လီၤဟးထီၣ်တၢ်အကျဲ ဒ်သိးပကအိၣ်ဒီးတၢ်လီၢ်လီၤဟိ လၢပကဘှီဂ့ၤထီၣ် သိလ့ၣ်ပြၢတခိၣ်ဒီး တၢ်မၤအံၤ မ့ၢ်တၢ်လၢ ယအဲၣ်ဒိးမၤ အဒိၣ်ကတၢၢ်တမံၤန့ၣ်လီၤ. လၢတၢ်ပာ်သိလ့ၣ် အလီၢ်ဒါလိၤန့ၣ် ပဆီတလဲက့ၤ သိလ့ၣ်ပြၢအပၣ်(Wheels)တဖၣ်ဒီး ပလးစတ့း မဲာ်ထံကလၤလၢအဒီတဒၢ ကလံၤဝံၤ ယပၢ်ခိးကွၢ်န့ၢ်ယၤ သိလ့ၣ်တဖၣ်အတၢ်လဲၤက့ၤအဆၢကတီၢ်, လၢတၢ်သူၣ်ပိၢ်သးဝးအပူၤ ယနီၣ်ဟးထီၣ် သိလ့ၣ်ပြၢဖိဆူကျဲခိၣ်န့ၣ်လီၤ. ယထံၣ်ဆိကမိၣ်ကဒါက့ၤတၢ်တဖၣ်န့ၣ်ဒီး တၢ်မၤအသးတဖၣ် လၢပှၤပာ်သိလ့ၣ်အလီၢ်အံၤအပူၤန့ၣ် တမ့ၢ်တၢ်မၤအသးထဲ တၢ်ဘှီဂ့ၤထီၣ် သိလ့ၣ်ပြၢအံၤန့ၣ်ဘၣ် တၢ်မၤအသးအိၣ်အါမးအကျါ တၢ်မၤအသးနီၢ်နီၢ်တမံၤမ့ၢ် ဖိသၣ်ပိာ်ခွါဖိတဂၤအံၤ ဘၣ်တၢ်ဘှီဂ့ၤကတဲာ်ကတီၤအီၤလၢ အပၢ်ဒီး လၢတၢ်မၤအသးအံၤအပူၤ အဝဲထံၣ်တဖျဲးဝဲ ကစၢ်ယွၤန့ၣ်လီၤ.

၁ မိၤ ၁:၂၇-၂၈ အပူၤ ပာ်ဖျါဝဲ “ပှၤကညီတဖၣ် ဘၣ်တၢ်တ့ဒုးထီၣ်လၢ ကစၢ်ယွၤအန့ဆၢၣ်, အနီၢ်ကစၢ်ဒၣ်ဝဲန့ၣ်လီၤ.” တၢ်အခီၣ်ထံးခီၣ်ဘိလၢ ပှၤကညီတဖၣ် ကွၢ်ထွဲ ပၢဆှၢလုၢ်အီၣ်လုၢ်အီဖိတဖၣ်န့ၣ် စးထီၣ်ဝဲလၢကစၢ်ယွၤန့ၣ်လီၤ. အ့ဖ့း ၃:၁၄-၁၅ ပာ်ဖျါဝဲလၢ “လၢပှၤဒူၣ်ကိးဒူၣ်ဒဲးလၢမူခိၣ်ဒီး လၢဟီၣ်ခိၣ်ချၢ, ဘၣ်တၢ်ယုၢ်အမံၤလၢအီၤ”အဃိန့ၣ်လီၤ. မိၢ်ပၢ်တဖၣ် မၤပိာ်ထွဲဝဲ ကစၢ်ယွၤအတၢ်ဟ့ၣ် ဒုးထီၣ်သးသမူတဖၣ်န့ၣ် ခီဖျိလၢအဝဲသ့ၣ်အိၣ်ဖျဲၣ်ထီၣ်ဖိတဖၣ် လၢဟီၣ်ခိၣ်ချၢအံၤ ဒီးဖဲအဝဲသ့ၣ် ကဟုကယာ်ဒီး ဒီတဒၢဖိတဖၣ်အဆၢကတီၢ် တၢ်အကံၢ်အစီလၢမိၢ်ပၢ်တဖၣ် ပာ်ဖျါထီၣ် အဂံၢ်ခီၣ်ထံးန့ၣ် အိၣ်ဟဲလၢ ကစၢ်ယွၤဒီး တမ့ၢ်အိၣ်ဟဲလၢ အနီၢ်ကစၢ်ဒၣ်ဝဲဘၣ်. ကစၢ်ယွၤ မ့ၢ်တၢ်အဒိအတဲာ်လၢ ကယဲၢ်တၢ်ကွၢ်ပၢဆှၢလုၢ်အီၣ်လုၢ်အီဖိတဖၣ် ဘၣ်သန့ၤထီၣ်အသးန့ၣ်လီၤ.

ယပၢ်န့ၣ်တမ့ၢ် ပှၤလၢပှၤပှဲၤဘၣ်. ဒ်မိၢ်ပၢ်ကိးဂၤဒဲးအသိး ဘၣ်တဘျီဘျီ အတၢ်ကွၢ်ဒိလုၢ်အီၣ်လုၢ်အီ, ကွၢ်ထွဲ ပၢဆှၢဖိတဖၣ် ဒ်ပၢ်ကစၢ်ယွၤအိၣ်လၢမူတဂၤအသိးအဂီၢ်န့ၣ် တၢ်လီၤတူၢ်လီၤကာ်ဝဲဒၣ်န့ၣ်လီၤ. ဘၣ်ဆၣ် အါဘျီန့ၣ် ယပၢ်အိၣ်မူပာ်ဖျါ လၢတၢ်ဟ့ၣ်ဒိကစၢ်ယွၤအဃိ, ဒ်ပဘှီဂ့ၤထီၣ် သိလ့ၣ်ပြၢဖိလၢ ပပာ်သိလ့ၣ် အလီၢ်အသိးန့ၣ် ယထံၣ်တဖျဲးဒီး သ့ၣ်ညါကစၢ်ယွၤအန့ဆၢၣ်ဒီး အတၢ်ဒီတဒၢ ကဟုကယာ်ယၤန့ၣ်လီၤ.