ပဒီပုၢ်ဝဲၢ်ခွါတဖၣ်ဒီး ပဟံၣ်ဖိဃီဖိတဖၣ် ဒီတနံၤအတီၢ်ပူၤ ပသုးကွံာ် ပမိၢ်ပပၢ်အတၢ်ဖိတၢ်လံၤတဖၣ်န့ၣ်လၢ ဟံၣ်တဖျၢၣ်လၢ ပအိၣ်ဆိးဖဲပနီၢ်ဆံး အဆၢကတီၢ်န့ၣ်လီၤ. တချုးမုၢ်လီၤနုာ် ဖဲပက့ၤစိာ်တၢ်ဖိတၢ်လံၤတဖၣ် လၢသိလ့ၣ်အကတၢၢ်တဘျီန့ၣ် ပသ့ၣ်ညါလၢ ပတၢ်ထံၣ်လိာ်သကိးပသးလၢ ဒူၣ်ဖိထၢဖိအဟံၣ်အံၤ ကမ့ၢ် တၢ်အကတၢၢ်တဘျီအဃိ ပပာ်ဖှိၣ်ဒိသကိး တၢ်ဂီၤလၢ ဟံၣ်လီၤခံတြဲၤအခိၣ်ဒုး အဖီလာ်န့ၣ်လီၤ. ဖဲယမိၢ်ကွၢ်ယၤ ဒီးစံးဝဲ “ခဲကနံၣ်အံၤ တၢ်တအိၣ်တ့ၢ်နီတမံၤလၢၤဘၣ်” အဆၢကတီၢ် ဒ်သိးယမဲာ်ထံတယွၤလီၤအဂီၢ် ယဘၣ်ကျဲးစၢးပၢၤဃာ် ယသးန့ၣ်လီၤ. တၢ်ကတိၤဖိအံၤ ကဲထီၣ် တၢ်သးဘၣ်ဒိလၢ ယဂီၢ်ဒိၣ်မးန့ၣ်လီၤ. ၅၄ နံၣ် အတီၢ်ပူၤ ဟံၣ်လၢအအိၣ်ပှဲၤဒီး တၢ်သးသယုၢ်တၢ်, တၢ်သ့ၣ်နီၣ်တဖၣ် ခဲကနံၣ်အံၤ တၢ်မနုၤမးတအိၣ်လၢၤဘၣ်န့ၣ်လီၤ. ယဂုာ်ကျဲးစၢၤ ယဲဒၣ် ဒ်သိး ယသုတဆိကမိၣ်ထီၣ်က့ၤ တၢ်ဂ့ၢ်အံၤလၢၤဘၣ်န့ၣ်လီၤ.

တၢ်လၢအမၤဘၣ်ဒိဆါယသးအံၤန့ၣ် ဒုးနၢ်ဟူက့ၤယၤ ဝံယံးရမံယၤစးထီၣ် တၢ်ကတိၤတဖၣ်လၢ သးသယုၢ် ၁:၁ အပူၤ စံးဝဲ “ဝ့ၢ်လၢအပှဲၤတ့ၢ်ဝဲဒီး ပှၤဂီၢ်မုၢ်တဖျၢၣ်န့ၣ် ဆ့ၣ်နီၤဝဲတဂၤဃီဒ်လဲၣ်” န့ၣ်လီၤ. တၢ်အကါဒိၣ် ဒီးတၢ်လၢ အတဒ်သိးလိာ်သးန့ၣ် အဆၢဖိ ၅ ပာ်ဖျါလၢ ဝ့ၢ်ယရူၤရှလ့ၣ် ဘၣ်အိၣ်သယုၢ်ဝဲဒၣ် ခီဖျိလၢ “ အတၢ်ကမၣ်အါအဃိလီၤ”န့ၣ်လီၤ. အဆၢဖိ ၁၈ အပူၤ ပကထံၣ်ဘၣ် ခီဖျိလၢ အပှၤဂီၢ်မုၢ်တဖၣ် ပူထီၣ်အီၤ ဒီးတၢ်ပီၢ်ယၢ်လီၤက့ၤသးအဂီၢ် တအၢၣ်လီၤတူၢ်လိာ်ဝဲအဃိ ကစၢ်ယွၤပျဲအပှၤဂီၢ်မုၢ်တဖၣ် ဘၣ်တၢ်က့ၤစိာ်မၢကဲကုၢ်ဆူ ဘၤဘူၤလိၣ်န့ၣ်လီၤ. ယမိၢ်ယပၢ် အတၢ်သုးလီၢ်သုးကျဲအံၤန့ၣ် တမ့ၢ်လၢ တၢ်ဒဲးဘး, အစှၤကတၢၢ်န့ၣ် တမ့ၢ်လၢ အမၤကမၣ်တၢ်အဃိဘၣ်. ဘၣ်ဆၣ် စးထီၣ်လၢ စီၤအၤဒၣ် မၤကမၣ်တၢ်လၢ ဧ့ၤဒ့ၣ်တၤသၣ်လီၢ်အပူၤန့ၣ် ပှၤကညီတဂၤလၢ်လၢ် အတၢ်အိၣ်ဆူၣ်အိၣ်ချ့ ဆံးလီၤစှၤလီၤဝဲလၢ တၢ်သးသမူ မုၢ်နံၤတဖၣ်အပူၤန့ၣ်လီၤ. ဖဲပသးပှၢ်ထီၣ် အဆၢကတီၢ်, ညီနုာ်တၢ်မၤအသးသ့ဝဲ ဒ်ပအိၣ်ဆိးလၢ ဟံၣ်အဆံး, ဟံၣ်လၢ ပကွၢ်ထွဲ ကတိၤအီၤ ညီဒိၣ်ဝဲတဖၣ်န့ၣ်လီၤ.

တၢ်သ့ၣ်နီၣ်ထီၣ်က့ၤ တၢ်တဖၣ်အံၤ ဒုးကဲထီၣ် ပဟံၣ်ဖိလၢ ဟံၣ်လီၤဆီတဖျၢၣ်အဃိ ယစံးဘျုးဘၣ် ကစၢ်ယွၤန့ၣ်လီၤ. တၢ်ဘၣ်ဒိဆါလၢ နီၢ်သးအံၤ မ့ၢ်တၢ်အဲၣ်အလုၢ်အပှ့ၤန့ၣ်လီၤ. လၢခံတဘျီ တၢ်လၢယကဘၣ်ပာ်တ့ၢ်တၢ်န့ၣ် ယသ့ၣ်ညါလၢ တမ့ၢ်ယမိၢ်ယပၢ်အဟံၣ်ဘၣ်. မ့ၢ်ဒၣ်ယကဘၣ်ပာ်တ့ၢ် ယမိၢ်ယပၢ်တဖၣ်န့ၣ်လီၤ. လၢတၢ်န့ၣ်အဃိ, ယဟီၣ်ယဲလီၤ. ယကိးထီၣ်ကစၢ်ယ့ၣ်ရှူး ဒ်သိးကဟဲမၤကတၢၢ်ကွံာ် တၢ်လီၤမုၢ်လီၤဖးတဖၣ် ဒီးဒုးကဲထီၣ်က့ၤ တၢ်ခဲလၢာ် ဒ်အလီၢ်အလီၢ်ဒၣ်ဝဲအသိး အဂီၢ်န့ၣ်လီၤ. ယတၢ်မုၢ်လၢ်န့ၣ် အိၣ်ဒၣ်ထဲလၢ ကစၢ်အလိၤန့ၣ်လီၤ.