ဖဲပဒိၣ်တဂၤ သမံသမိးယၤဝံၤန့ၣ်, ယလဲၤနုာ်လီၤဆူ ကီၢ်ရ့ၣ်အဃိာ်ပူၤ, ယဆဲးလီၤယစုမုၢ်ကျၢၢ် လၢၦၤတမှံၤအမံၤစရီပူၤ, ဒီးဆ့ၣ်နီၤဖဲ ကမျၢၢ်အါဂၤခိးတၢ်အလီၢ်န့ၣ်လီၤ. ယဘါထုကဖၣ်လၢ ယသးပူၤဒီး ခိးကွၢ်ၦၤနီၢ်ဒိၣ်တဖၣ် လၢအသးဟုးဂဲၤဝဲ ဒီးသးစၢ်သ့ၣ်တဖၣ် လၢအကဒုးကဒ့ၣ်တၢ် လၢအဘၣ်ခိးတၢ်အဃိန့ၣ်လီၤ. ကအိၣ်ဃိးနၣ်ရံၣ်ဘျဲၣ်ဘျဲၣ်ဒီး ၦၤခိးတၢ်ဖိလၢ အဖီၣ်ဃး စုကဝဲၤတဂၤ ဖးဖျါထီၣ် ၦၤအမံၤစရီ ဒီးယမံၤစ့ၢ်ကီး ဘၣ်တၢ်ယၢၤထီၣ်ဝဲလီၤ. အဝဲဆှၢပၦၤတဖု ဆူဒၢးတဖျၢၣ်အပူၤ ဒီးဒုးဆ့ၣ်နီၤၦၤလၢ လီၢ်ဆ့ၣ်နီၤတဖၣ် လၢအဘၣ်တၢ်သုးကျဲၤပာ်လီၤဆိတဖၣ်န့ၣ်လီၤ. ဖဲယဖိယၢ် ဆ့ၣ်နီၤလီၤဝဲလၢ လီၢ်ဆ့ၣ်နီၤလၢ အအိၣ်လၢ ပဲတြီမဲာ်ထံကလၤဖးတီၣ် အဘးခီဒီး ဖီၣ်ထီၣ်ကွဲၤဒီနၢ်အခါ တၢ်သ့ၣ်ညါလၢ ၦၤမၤစၢၤယၤတအိၣ်လၢၤဘၣ်အံၤ လုၣ်ဘၢဒီးထုးဃၢယသးလီၤ. ယမဲာ်ထံလီၤဘၣ်ဆၣ်, ကစၢ်ယွၤမၤမံသးကျၢၤယၤ မ့ၢ်လၢ ယဖိယၣ်အံၤ အိၣ်ဒံးဒၣ်လၢ ယွၤအတၢ်ပၢဆှၢ တုၤအိၣ်အီၤအပူၤန့ၣ်လီၤ.
ဖဲစံးထီၣ်ပတြၢၤ ၁၃၉ န့ၣ်, စီၤဒၤဝံးကိးထီၣ်ယွၤ, “ယွၤဧၢ, ဃုကွၢ်ထံယၤ ဒီးနသ့ၣ်ညါယၤလီၤ…ဒီးနသ့ၣ်ညါ ယကျဲဧိၤကပူၤဧိၤခဲလၢာ်လီၤ” (၁-၃). အတၢ်ကိးသတြီဘၣ်ဃး ယွၤလၢအသ့ၣ်ညါတၢ်ခဲလၢာ်အံၤ မ့ၢ်တၢ်မၤလၤကပီၤ ယွၤအတၢ်ကဟုကယာ် ဒီးယွၤအတၢ်ဒီသဒၢ ဘူးဘူးတံၢ်တံၢ်န့ၣ်လီၤ (၅). ဖဲလၢအဘၣ်တၢ်လုၣ်ဘၢအီၤလၢ ယွၤအတၢ်သ့ၣ်ညါ ဒီးယွၤအတၢ်ထိးဘၣ်အီၤ ဒိၣ်ဒိၣ်ယိာ်ယိာ်အခါန့ၣ်, စီၤဒၤဝံးသံကွၢ်တၢ်သံကွၢ်ခံခါ လၢအသ့ၣ်ညါ ပာ်စၢၤဝဲ တၢ်အစၢန့ၣ်လီၤ. “ယကလဲၤပူၤကွံာ်လၢ နသးဆူလဲၣ်. ဒီးယကဃ့ၢ်ပူၤကွံာ်လၢ နမဲာ်ညါဆူလဲၣ်” (:၇) န့ၣ်လီၤ.
ပနီၢ်ကစၢ်ဒၣ်ဝဲႇ မ့တမ့ၢ် ဖဲၦၤလၢ ပအဲၣ်ဘၣ်တဂၤဂၤ ဘၣ်ကွၢ်ဆၢၣ်မဲာ်ဒီး တၢ်အိၣ်အသး လၢမၤတၢ်မနုၤမးတသ့ဘၣ်အခါ, ပပလၢၢ်ဘၣ်ဝဲလၢ တၢ်မၤစၢၤဒီးတၢ်မုၢ်လၢ် တအိၣ်လၢၤဘၣ်န့ၣ်လီၤ. ဘၣ်ဆၣ် ယွၤအစုအံၤ ဂံၢ်ဆူၣ်ဝဲဒီး ဂၢၢ်တပၢၢ် ဒံးဝဲ လၢပဂီၢ်န့ၣ်လီၤ. ဖဲပနာ်လၢ ပဟးဖျိးကျဲဖးယံၤလၢ အတၢ်အဲၣ်ဒီးအတၢ်ပျၢ် ပတၢ်ဒဲးဘၣ်အခါဒၣ်လဲာ်, ထီဘိယွၤအစုတုၤအိၣ်ၦၤန့ၣ်လီၤ.
