ဖဲယဖိမုၣ်အသးၦဲၤထီၣ် ၁၈ နံၣ်အခါ အဝဲနုာ်လီၤဘၣ်ဝဲဆူ အကတီၢ်အသီလၢ အတၢ်အိၣ်မူအပူၤလီၤ. ဒ်ထံကီၢ်သဲစးအိၣ်ဝဲအသိး, အဝဲကဲထီၣ်ၦၤနီၢ်ဒိၣ်တဂၤလံ. အခဲအံၤ အဝဲအိၣ်ဒီး တၢ်ခွဲးတၢ်ယာ် လၢကဟ့ၣ်တၢ်ဖး လၢထံဂ့ၢ်ကီၢ်ဂ့ၢ် တၢ်ဃုထၢထီၣ်ခိၣ်နၢ်အသီ လၢခါဆူညါအဂီၢ်, ဒီးတယံာ်တမီၢ်ဘၣ်ဒီး အဝဲကဖျိထီၣ်တီၤထီကၠိ ဒီးကဘၣ်လဲၤခီဖျိ တၢ်အိၣ်မူဆူညါ လၢအတၢ်ဒၣ်ဝဲန့ၣ်လီၤ.

တၢ်ဆီတလဲဘၣ်ဃး ယဖိမုၣ်အံၤ ဒုးသ့ၣ်ညါယၤ တၢ်လၢယကဘၣ်မၤ လၢအဆိအချ့တဖၣ်န့ၣ်လီၤ. လၢဟီၣ်ခိၣ်တၢ်လဲၤခီဖျိ လၢအတၢ်ဒၣ်ဝဲအပူၤ အလီၢ်အိၣ်လၢ ယကဘၣ်ဟ့ၣ်အီၤတၢ်ကူၣ်သ့ ဘၣ်ဃးဒီးတၢ်သ့သုးကျဲၤ စူးကါ ကျိၣ်စ့, တၢ်ပလီၢ်ပဒီသးဘၣ်ဃး ဟီၣ်ခိၣ်တၢ်ဂ့ၢ်ကီခဲသ့ၣ်တဖၣ် ဒီးတၢ်သ့ဃုထၢတၢ်အဂ့ၤအဘၣ် သ့ၣ်တဖၣ်န့ၣ်လီၤ. နာ်သက့ တၢ်ဆၢကတီၢ်လုၢ်ဒိၣ်ပှ့ၤဒိၣ်လၢ ယကအိၣ်ဘၣ်ဒီး ယဖိမုၣ်လၢ ယဟံၣ်ခိၣ်ဒူအဖီလာ် တအိၣ်အါအါလၢၤဘၣ်. ယမူယဒါလၢ တၢ်ကတဲာ်ကတီၤဆိယဖိမုၣ်ဖိ လၢအတၢ်အိၣ်မူအဂီၢ်အံၤ မ့ၢ်တၢ်လၢ ပနၢ်ပၢၢ်သ့ဝဲန့ၣ်လီၤ. မ့ၢ်ဒၣ်ယအဲၣ်အီၤဒီး ယဆၢလၢ အဝဲအတၢ်အိၣ်မူ ကဘီၣ်ကညီအဂီၢ်လီၤ. ဘၣ်ဆၣ် ယသ့ၣ်ညါထံက့ၤလၢ ယမ့ၢ်ၦၤအိၣ်မူအိၣ်ဒါ လၢအဝဲအဂီၢ်ဒၣ်ကယဲာ်, တၢ်မၤတမံၤအံၤ တမ့ၢ်ထဲယၤတဂၤ အတၢ်မၤဘၣ်. စီၤပီလူး ပာ်ပှၤသ့းစၤလနံဖိတဖၣ် ဒ်အဖိတဖၣ် လၢတၢ်နာ်, မ့ၢ်လၢ အဝဲသိၣ်လိတ့ၢ် အဝဲသ့ၣ်လၢ ခရံာ်အဂ့ၢ်အဃိန့ၣ်လီၤ. လၢအလံာ်ပရၢအပူၤ ဆူပှၤသ့းစၤလနံဖိ အအိၣ်န့ၣ် စီၤပီလူး သဆၣ်ထီၣ်ဝဲလၢ အဝဲသ့ၣ် ကမၤစၢၤလိာ်သးအဂီၢ်လီၤ (၁ သ့း ၅:၁၄-၁၅). ဘၣ်ဆၣ် လၢခံကတၢၢ် အဝဲသ့ၣ် အတၢ်ဒိၣ်ထီၣ်အါထီၣ်အဂီၢ် စီၤပီလူးဘၣ်သန့ၤအသး လၢယွၤန့ၣ်လီၤ. အဝဲဘၣ်အၢၣ်လီၤတူၢ်လိာ်ဝဲလၢ ကစၢ်ယွၤကမၤစီဆှံ အဝဲသ့ၣ် လၢလၢပှဲၤပှဲၤန့ၣ်လီၤ (:၂၃).

စီၤပီလူးနာ်လၢ ကစၢ်ယွၤကမၤတၢ်လၢ အဝဲမၤဝဲတသ့, လၢအမ့ၢ်ဝဲ “တၢ်ကတဲာ်ကတီၤအဝဲသ့ၣ်လၢ နီၢ်ခိ ဒီးနီၢ်သး” လၢကစၢ်ယ့ၣ်ၡူးခရံာ် အတၢ်ဟဲက့ၤအဂီၢ်န့ၣ်လီၤ (:၂၃). စီၤပီလူးဟ့ၣ်လီၤတၢ်နဲၣ်ကျဲဆူ ၦၤသ့းစၤလနံဖိသ့ၣ်တဖၣ် လၢအလံာ်ပရၢပူၤ ဘၣ်ဆၣ်, အတၢ်နာ်ယွၤဒီး အးလီၤအဝဲသ့ၣ် အတၢ်အိၣ်ဘီၣ်အိၣ်ညီ ဒီးတၢ်ကတဲာ်ကတီၤ ဆိပာ်စၢၤလၢ ခရံာ်အတၢ်ဟဲက့ၤကဒါက့ၤအဂီၢ်အံၤ သိၣ်လိစ့ၢ်ကီးၦၤလၢ, ၦၤလၢပအဲၣ်ဘၣ်အီၤသ့ၣ်တဖၣ် အတၢ်အိၣ်မူအတၢ်ဒိၣ်ထီၣ်ထီထီၣ်အံၤ အိၣ်သူၣ်လီၤအသး လၢာ်လၢာ်ဆ့ဆ့ဒၣ်လၢ ယွၤအစုပူၤန့ၣ်လီၤ. (၁ကရံၣ် ၃:၆).