“ဝ့ၣ်နံၣ်(Winnie)ဧၢ, တၢ်သံန့ၣ် ပျံၤတဂ့ၤ, တၢ်လၢနကဘၣ်ပျံၤန့ၣ် မ့ၢ်တၢ်အိၣ်မူလၢ တၢ်မူထီၣ်ဂဲၤထီၣ် တအိၣ်ဝဲဒၣ်န့ၣ်လီၤ”. အဲ(န)ကၢး တၢး(Angus Tuck) စံးဝဲဒ်သိးအံၤန့ၣ်လီၤ. တၢ်ကတိၤအံၤ ဘၣ်တၢ်ဟံးန့ၢ်အီၤလၢတၢ်ဂီၤမူ “တၢး လၢအိၣ်မူအိၣ်ဂဲၤလီၤထူလီၤယိာ်” (Tuck Everlasting), ဒီးတၢ်လၢအထုးန့ၢ်အါထီၣ် ပှၤသူၣ်ပှၤသးန့ၣ် တၢ်ကတိၤအံၤ အိၣ်ဟဲခီဖျိလၢ ပှၤလၢအသံတန့ၢ်တဂၤ အထးခိၣ်အဃိန့ၣ်လီၤ. လၢတၢ်တဲပူအံၤန့ၣ် တၢးအဒူၣ်ဖိထၢဖိတဖၣ် မ့ၢ်ပှၤလၢ အသံတသ့ဝဲတဖၣ်န့ၣ်လီၤ. ပှၤသးစၢ် ကၠဲးစံၣ်တၢး(Jesse Tuck)န့ၣ် အဲၣ်တီလိာ်သးဒီး ဝ့ၢ်နံၣ်အဃိ ဒ်သိးကအိၣ်မူအိၣ်ဂဲၤဘၣ်ဝဲထီဘိ ကဒဲကဒဲအဂီၢ် ဃ့ကညးဝ့ၢ်နံၣ်လၢ ကဃုမၤန့ၣ် တၢ်အိၣ်မူအထူအယိာ်အဂီၢ်န့ၣ်လီၤ. ဘၣ်ဆၣ် အဲ(န)ကၢး အမ့ၢ်ပှၤကူၣ်သ့တဂၤ နၢ်ပၢၢ်ဝဲလၢထဲ တၢ်အိၣ်မူအထူအယိာ်တမံၤအံၤန့ၣ် တဟဲစိာ်န့ၢ် တၢ်လၢထီၣ်ပှဲၤထီၣ်ခဲလၢာ်ဘၣ်န့ၣ်လီၤ.

ခ့ခါဆဲးလၤ, တၢ်အိၣ်သးတဖၣ် စံးဘၣ်ပှၤလၢ ထီဘိ ပမ့ၢ်အိၣ်ဆူၣ်အိၣ်ချ့ ပမ့မ့ၢ် ပှၤသးစၢ် ဒီးဂံၢ်ဘါသဟီၣ်မ့ၢ်အိၣ်ဒီးပှၤအထူအယိာ်န့ၣ် ပကဒိးန့ၢ်ဘၣ် တၢ်သးခုအမ့ၢ်အတီန့ၣ်လီၤ. ဘၣ်ဆၣ် တၢ်အိၣ်မူဒ်သိးအံၤအပူၤ တမ့ၢ် ပကဃုထံၣ်န့ၢ်ဘၣ် တၢ်အိၣ်မူအလၢအပှဲၤအဂီၢ်န့ၣ်ဘၣ်. တချုးကစၢ်ယ့ၣ်ရှူးလဲၤထီၣ်ဆူ ထူၣ်စုညါအလိၤန့ၣ် ဃ့ဘါထုကဖၣ်တၢ်လၢအပျဲၢ်အဘီၣ်တဖၣ် ဃုာ်ဒီးခါဆူညါပှၤစူၢ်က့ၤနာ်က့ၤ တၢ်ဖိတဖၣ်အဂီၢ်န့ၣ်လီၤ. ယိၤ ၁၇:၃ အပူၤစံးဝဲ “ဒီးတၢ်မူအထူအယိာ်န့ၣ် မ့ၢ်တၢ်သ့ၣ်ညါနၤ ယွၤနီၢ်နီၢ်တဂၤဃီ ဒီးယ့ၣ်ရှူးခရံာ်လၢ နမၢလီၤအီၤန့ၣ်လီၤ”. ပတၢ်အိၣ်မူလၢထီၣ်ပှဲၤထီၣ်တၢ်န့ၣ် အိၣ်ဟဲဝဲဒၣ်လၢ တၢ်ရ့လိာ်ဘၣ်ထွဲလိာ်သးဒီးကစၢ်ယွၤ ခီဖျိလၢတၢ်စူၢ်က့ၤနာ်က့ၤ ကစၢ်ယ့ၣ်ရှူးန့ၣ်လီၤ. ကစၢ်ယ့ၣ်ရှူးမ့ၢ် ပတၢ်မုၢ်လၢ်လၢ ခါဆူညါအဂီၢ်ဒီး တၢ်သးခုလၢခ့ခါမုၢ်နံၤတဖၣ် အဂီၢ်န့ၣ်လီၤ.

ဒ်သိးအပျဲၢ်အဘီၣ်တဖၣ် ကအိၣ်မူအိၣ်ဂဲၤလၢ တၢ်အိၣ်မူက့ၢ်ဂီၤသီအဂီၢ်န့ၣ် ယိၤဟၣ် ၁၇:၆ ပာ်ဖျါဝဲလၢ ကဒိကနၣ် ကစၢ်ယွၤ, အဆၢဖိ ၈ ပာ်ဖျါဝဲ “ကစၢ်ယ့ၣ်ရှူးမ့ၢ်ပှၤလၢ ကစၢ်ယွၤဆှၢလီၤအီၤ” ဒီးအဆၢဖိ ၁၀ ပာ်ဖျါဝဲလၢ “ကကဲထီၣ် တၢ်တမံၤဃီ” အဂီၢ် ကစၢ်ယ့ၣ်ရှူး ဃ့ထုကဖၣ်ဝဲဒၣ်န့ၣ်လီၤ. ဒ်ပစူၢ်က့ၤနာ်က့ၤ ကစၢ်ယ့ၣ်ရှူးခရံာ်န့ၣ် ပမုၢ်လၢ်ကွၢ်စိတၢ်ဆူ ခါဆူညါတၢ်မူအထူအယိာ် ဒီးကစၢ်ယ့ၣ်ရှူးခရံာ်န့ၣ်လီၤ. ဘၣ်ဆၣ် ပမုၢ်နံၤမုၢ်သီတဖၣ် လၢဟီၣ်ခိၣ်ချၢအံၤ ပအိၣ်မူအိၣ်ဂဲၤအဆၢကတီၢ် ဒ်အဆၢဖိ ၁၀ စံးဘၣ်ပှၤအသိး “ပတၢ်အိၣ်မူကလၢထီၣ်ပှဲၤထီၣ်လၢတၢ်သးမံသးမုာ်”အပူၤအဂီၢ်န့ၣ်လီၤ.