ဖဲအပူၤကွံာ် တၢ်ယီၤထီၣ်သီ, တချုး ပခူၣ်တချဲဟီၣ်ခိၣ်ဒီး ပျဲကလံၤနုာ်လီၤဒံးဘၣ် အနၤန့ၣ် ကလံၤဆူၣ်ဒိၣ်မးတဖျၢၣ် အူဖျိးကွံာ် သ့ၣ်မ့ဖၢၣ်(maple)အချံဖိတဖၣ်လီၤ. အဃိ ဖဲတၢ်ခူၣ်တချဲ ဟီၣ်ခိၣ် အစဲးဖီကဟၣ် ခူၣ်တချဲကွံာ် ဟီၣ်ခိၣ်ညၣ် လၢအဃံးတံာ် ခီဖျိထုးကွံာ် ဟီၣ်ခိၣ်အခီၣ်ထံးလာ်န့ၣ် ကဲထီၣ် တၢ်သူၣ်လီၤ သ့ၣ်မ့ဖၢၣ်အချံဖိအါအါဂီၢ်ဂီၢ် လၢယကရၢၢ်ပူၤလီၤ. ထဲခံနွံဧိၤပူၤကွံာ်လီၢ်ခံ သ့ၣ်မ့ဖၢၣ်အကရူၢ်ဖးဒိၣ် ဟဲမဲထီၣ်ဒိၣ်ထီၣ်က့ၤလၢ ယတပံၢ်ပျီကရၢၢ်ပူၤလီၤ.
ဖဲယဃုထံၣ်ဒီးသ့ၣ်ညါ သ့ၣ်လၣ်အိၣ်လၢ သ့ၣ်ဒ့လိၤတဖၣ်န့ၣ် ယထံၣ်န့ၢ်လၢ သ့ၣ်တထံးတထံးန့ၣ် ဒံၣ်လီၤတၢ်မူအသီလၢ မဲထီၣ်သၣ်ထီၣ်အါအါကလဲာ်သ့ဝဲအဂ့ၢ် ဒီးယဖုးဘၣ်မးယသးလၢ တၢ်ကမၢကမၣ်အပူၤလီၤ. သ့ၣ်ဟ့ၣ်တၢ်အဒိဆံးဆံးတမံၤစုာ်စုာ်အံၤ ကဲထီၣ်တၢ်ဂီၤတဘ့ၣ် လၢယဂီၢ် ဘၣ်ဃးတၢ်မူအသီ လၢခရံာ်အပူၤ လၢဒ်ယမ့ၢ်ဒၣ်ပှၤကညီတဂၤ – ယနီၤဟ့ၣ်ခီဒီး ပှၤဂုၤဂၤသ့ဝဲအဂ့ၢ်လီၤ. ပဝဲတဂၤစုာ်စုာ် ပကအိၣ်ဒီးခွဲးယာ်လၢ ပဂံၢ်ဒွးတသ့လၢ ပ“ကဟ့ၣ်တၢ်အဂ့ၢ်အကျိၤလၢ တၢ်မုၢ်လၢ်လၢအအိၣ်ဒီးပှၤ” (၁ ပ့း ၃:၁၅) လၢပတၢ်အိၣ်မူအပူၤန့ၣ်လီၤ.
ဖဲပဘၣ်တၢ်ဖှီၣ်တၢ်နးလၢ တၢ်တီတၢ်လိၤ လၢအအိၣ်ဒီးတၢ်မုၢ်လၢ် လၢယ့ၣ်ရှူးပူၤအဃိအခါန့ၣ် (:၁၄), တၢ်မၤသးအံၤ ပှၤလၢပဃၢၤတဖၣ် ထံၣ်ဝဲ ဒီးကကဲထီၣ်တၢ်ဂ့ၢ်လၢ သးဆူၣ်သ့ၣ်ညါဝဲန့ၣ်လီၤ. ပမ့ၢ်အိၣ်ကတဲာ်ကတီၤပာ်သး ဖဲအဝဲသ့ၣ်သံကွၢ်ဝဲန့ၣ် ဖဲန့ၣ် ပကနီၤဟ့ၣ်လီၤ တၢ်ချံလၢ ကစၢ်ယွၤဟဲစိာ်န့ၢ် တၢ်မူအသီန့ၣ်လီၤ. တလိၣ် ပကဘၣ်နီၤလီၤအီၤ တဘျီဃီန့ၣ်ဆူ ပှၤကိးဂၤအအိၣ်ဘၣ် – ဖဲပနီၢ်သးအကလံၤဆူၣ် တကလုာ်လုာ်အပူၤ, မ့မ့ၢ် လၢတၢ်သးစူၤ ဒီးတၢ်ပာ်ဒိၣ်အပူၤ ပကသူၣ်လီၤ တၢ်စူၢ်တၢ်နာ်အချံ ဆူသးတဖျၢၣ် လၢအိၣ်ကတဲာ်ကတီၤပာ်လၢ ကတူၢ်လိာ်အီၤန့ၣ်လီၤ.
