ဖဲပတၢ်အိၣ်ဖှိၣ်အကရၢကရိ သူၣ်ထီၣ်ဘှီထီၣ် တၢ်သူၣ်ထီၣ်အခီၣ်ထံးတဖျၢၣ် အဆၢကတီၢ် ကမျၢၢ်တဖၣ် ကွဲးပာ်ဖျါ တၢ်ကတိၤစံးဘျုးစံးဖှိၣ်လၢ ကဒုးသ့ၣ်ညါ တၢ်တဖၣ် လၢတၢ်သူၣ်ထီၣ်အဒူၣ်လိၤ ဒီးတၢ်အဒါလိၤန့ၣ် တချုးလၢတၢ်မၤဝံၤတၢ်သူၣ်ထီၣ် အကိပူၤန့ၣ်လီၤ. လံာ်စီဆှံအဆၢဖိတဖၣ် တဆၢဘၣ်တဆၢဘၣ် တၢ်ကွဲးဒီးအကပၤန့ၣ် ကွဲးဃုာ်ဝဲ လၢတၢ်ထုကဖၣ် စံးဘျုးတၢ်လၢအမ့ၢ် “ယွၤန့ၣ် ဂ့ၤဝဲဒိၣ်ဒိၣ်အါအါန့ၣ်လီၤ.” ပပာ်တ့ၢ် တၢ်ကွဲးဖိတဖၣ်အံၤ ဒ်သိးကကဲထီၣ် တၢ်အုၣ်အသးတမံၤ လၢခါဆူညါ ဖိစိၤလံၤစိၤသ့ၣ်တဖၣ်အဂီၢ် ဒီးကသ့ၣ်ညါစ့ၢ်ကီးဝဲလၢ တၢ်ကီတၢ်ခဲ, တၢ်တၤတၢ်တဖၣ် လၢပဂီၢ် မ့ၢ်အိၣ်ဘၣ်ဆၣ် ယွၤသူၣ်ကညီၤသးကညီၤပှၤ ဒီးအံးထွဲကွၢ်ထွဲပှၤန့ၣ်လီၤ.

အလီၢ်အိၣ်လၢ ပကဘၣ်သ့ၣ်နီၣ်ထီၣ်က့ၤ ကစၢ်ယွၤမၤတ့ၢ်လံတၢ်လၢပဂီၢ်ဒီး ပကဘၣ်အုၣ်ပသးလၢ တၢ်အဂ့ၢ်အံၤန့ၣ်လီၤ. တၢ်မၤအသးအံၤ ကကဲထီၣ် တၢ်အဒိအတဲာ်တမံၤ ဖဲယၡါ ၆၃:၇ အပူၤ, ဝံယၡါယၤကွဲးပာ်ဖျါ “ယွၤအဘျုးအဖှိၣ်န့ၣ် ယကဒုးသ့ၣ်နီၣ်ထီၣ်က့ၤအီၤ, တၢ်စံးထီၣ်ပတြၢၤယွၤန့ၣ် ဒ်ကယဲၢ်တၢ်လၢယွၤမၤဝဲလၢပဂီၢ်…” အကတီၢ်လၢခံစ့ၢ်ကီး ဝံဂံၢ်ထီၣ်ဒွးထီၣ် ကစၢ်ယွၤအတၢ်သူၣ်ကညီၤသးကညီၤတၢ်လၢ အပှၤဂီၢ်မုၢ်အဂီၢ် လၢ အတၢ်စံၣ်စိၤတဲစိၤဒီစိၤအပူၤ လၢအဆၢဖိ ၉ စံးဝဲ “လၢအဝဲသ့ၣ်အတၢ် ထီဒုၣ်ထီဒါအီၤခဲလၢာ်အပူၤန့ၣ် အဝဲဒၣ်တမ့ၢ်ဘၣ်အဒုၣ်အဒါဘၣ်”န့ၣ်လီၤ. ဘၣ်ဆၣ် နမ့ၢ်ဖးလံာ်စီဆှံအဆၢဒိၣ်အံၤဆူညါဒီး နကထံၣ်ဘၣ်လၢ ပှၤအံၣ်စရ့လးဖိတဖၣ် အတၢ်ကီတၢ်ခဲ အိၣ်ထီၣ်ကဒီးအဃိ ဝံယၡါယၤ ဆၢမုၢ်လၢ်ဝဲလၢ ကစၢ်ယွၤကနုာ်လီၤ မၤတၢ်လၢ အပှၤဂီၢ်မုၢ်အဂီၢ်န့ၣ်လီၤ. ဖဲတၢ်ကီတၢ်ခဲအဆၢကတီၢ် တၢ်သ့ၣ်နီၣ်ထီၣ်က့ၤ အပူၤကွံာ် ကစၢ်ယွၤ အတၢ်သူၣ်ကညီၤသးကညီၤတၢ်န့ၣ် ကဲထီၣ်တၢ်မၤစၢၤန့ၣ်လီၤ.

အဆၢကတီၢ်လၢ တၢ်တၤတၢ်တဖၣ် ဟဲတုၤဘၣ်ပှၤဒီး လဲၤပူၤကွံာ်ဝံဘၣ်ဆၣ် ကစၢ်ယွၤ အတၢ်တီတၢ်လိၤအသကဲးပဝာ်န့ၣ် တဆီတလဲအသး နီတဘျီဘၣ်န့ၣ်လီၤ. ပမ့ၢ်ဃၣ်ကဒါက့ၤ ပတၢ်အိၣ်မူဆူကစၢ်ယွၤအအိၣ် ဒ်သးလၢအပှဲၤဒီး တၢ်စံးဘျုးစံးဖှိၣ်က့ၤအီၤလၢ တၢ်သ့ၣ်နီၣ်ထီၣ်က့ၤ အတၢ်မၤတၢ်လၢပဂီၢ်အဃိန့ၣ်ဒီး ပကဃုထံၣ်န့ၢ် တၢ်အသီကဒီးတဘျီလၢ ယွၤမ့ၢ်ပှၤလၢအကြၢးဝဲဘၣ်ဝဲဒီး ပတၢ်စံးဘျုးစံးဖှိၣ်အီၤန့ၣ်လီၤ.