ပှၤခရံာ်ဖိတဖၣ်လၢဟီၣ်ခိၣ်ဒီဘ့ၣ် တချုးမၤတၢ်သ့ၣ်နီၣ်ထီၣ်က့ၤ ကစၢ်ယ့ၣ်ၡူးခရံာ် အတၢ်ဟ့ၣ်လီၤအသးသမူ ဒီးတၢ်ဂဲၤဆၢထၢၣ်သမူထီၣ်က့ၤအမုၢ်နံၤတဖၣ် လၢနွံစီဆှံအပူၤ အဆၢကတီၢ်, ပှၤတခီတၢၤလၢ အဃုမၤတၢ်စုဆူၣ်ခီၣ်တကးတဖၣ် နုာ်လီၤ ခးတဖြဲးကျိ ဒီးပှၤသံခံဂၤ ဖဲကီၢ်ဖရၣ်စ့ၢ်မုၢ်နုာ်ကလံၤထံးတကပၤ(southwest France), လၢပှၤဆါတၢ်ပှ့ၤတၢ် တၢ်သူၣ်ထီၣ်အပူၤန့ၣ်လီၤ. ဖဲတၢ်စံးကတိၤသကိး အၢၣ်လီၤအီလီၤသကိးတၢ်ဝံၤ ပှၤမၤဆူၣ်မၤစိးတၢ်တဖၣ် ပျၢ်လီၤကမျၢၢ်တဖၣ်ခဲလၢာ်ဘၣ်ဆၣ် ကိးတ့ၢ်ဝဲတဂၤ ဒ်သိးကမၤဝဲ ပှၤကညီအကတီၤအဂီၢ်န့ၣ်လီၤ. အဆၢကတီၢ်ဖဲန့ၣ်ပၢၤကီၢ်(Police) ပှၤအခိၣ်တဂၤ, လၢအမ့ၢ်အၣ်နိဘဲးထါ (Arnaud Beltrame)န့ၣ် သ့ၣ်ညါဝဲလၢတၢ်ဘၣ်ယိၣ်အလီၢ်အိၣ်သနၢ်က့လၢ ပှၤတဆိကမိၣ်ဘၣ်တၢ်အပူၤ လၢအနီၢ်ကစၢ်အတၢ်ပာ်လီၤအသးဒၣ်ဝဲ ဟံးန့ၢ်အိၣ်တ့ၢ်ဝဲဒၣ် လၢပိာ်မုၣ်လၢပှၤကိးတ့ၢ်တဂၤအဂီၢ်န့ၣ်လီၤ. ပှၤအၢပှၤသီတဖၣ် ပျၢ်လီၤကွံာ်ဝဲပိာ်မုၣ်န့ၣ်ဝံၤ လၢတၢ်ခးလိာ်သးကျိ ယၢ်ခီယၢ်ခီအဘၢၣ်စၢၤ ပှၤပၢၤကီၢ်ဂၤအံၤ ဘၣ်ဒိလၢ ကျိချံဒီးလၢခံန့ၣ် သံဝဲဒၣ်န့ၣ်လီၤ.
ခိၣ်နၢ်ပဒိၣ်ဖးဒိၣ်တဂၤလၢ အသ့ၣ်ညါ ပၢၤကီၢ်ပှၤအခိၣ်လၢအမၤပှၤဒူပှၤဃိၤအတၢ်မၤ ဒီးတူၢ်သံအသးအဃိ မၤလၤကပီၤကတိၤဒိၣ်အီၤ ခီဖျိ ယိၤ ၁၅:၁၃,“ပှၤမ့ၢ်ပာ်လီၤကွံာ် အသးသမူလၢအတံၤအသကိးအဂီၢ် ဒီးပှၤတအိၣ်ဘၣ်ဒီးတၢ်အဲၣ်တၢ်ကွံဒိၣ်န့ၢ် အဝဲန့ၣ် နီတဂၤဘၣ်.” ဒ်အမ့ၢ်ပှၤလၢအနာ်ကစၢ်ယ့ၣ်ၡူးခရံာ်အဃိန့ၣ်လီၤ. တၢ်ကတိၤတဖၣ်အံၤ မ့ၢ်ကစၢ်ယ့ၣ်ၡူးခရံာ် စံးကတိၤဝဲဆူ အပျဲၢ်အဘီၣ်တဖၣ်အအိၣ် ဖဲတၢ်အီၣ်သကိး ဟါတၢ်အီၣ်လၢခံကတၢၢ်ဝံၤအဆၢကတီၢ်န့ၣ်လီၤ. အဆၢဖိ ၁၂ အပူၤ ကစၢ်ယ့ၣ်ၡူး စံးအပျဲၢ်အဘီၣ်တဖၣ်လၢ, “အဝဲအံၤ မ့ၢ်ယတၢ်မၤလိာ်, လၢသုကအဲၣ်လိာ်ကွံလိာ်သုသး သကိး သကိး, ဒ်ယအဲၣ်သုအသိးန့ၣ်လီၤ.” ဒီးအဆၢဖိ ၁၃ စံးကဒီးဝဲ,“…ပှၤတအိၣ်ဘၣ်ဒီး တၢ်အဲၣ်တၢ်ကွံဒိၣ်န့ၢ် အဝဲန့ၣ်နီတဂၤဘၣ်”န့ၣ်လီၤ. ဒ်စံးတ့ၢ်ဝဲအသိး မုၢ်ဆ့ၣ်ထီၣ်တနံၤန့ၣ် ယ့ၣ်ၡူးမးဝဲလီၤတံာ်လီၤဆဲးဒီး ဒ်သိးကအုၣ်က့ၤခီၣ်က့ၤ ပှၤလၢပတၢ်ဒဲးဘးအဂီၢ်န့ၣ် ထဲဒၣ်တမံၤဧိၤလၢ ယ့ၣ်ရှူး ကဘၣ်မၤဝဲ မ့ၢ်ဒၣ်ကဘၣ်လဲၤလၢထူၣ်စုညါအကျဲန့ၣ်လီၤ.
ပမ့ၢ်တဘၣ်ဃုထၢတၢ်နီတဘျီ ဒ်ပှၤဒူပှၤဃိၤအၣ်နိဘဲးထါအသိးဘၣ်. ဘၣ်ဆၣ်ဖဲပအိၣ်ဘၣ်လၢ ယွၤအတၢ်အဲၣ်အပူၤအဆၢကတီၢ် ပမၤတၢ်သ့လၢပှၤဂၤအဂီၢ် ခီဖျိတၢ်ဟ့ၣ်လီၤသး, တၢ်ပာ်လီၤပာ်ဖျါထီၣ် ပတၢ်ရဲၣ်တၢ်ကျဲၤဒီး ပတၢ်ပညိၣ်လၢ ပကဃု ထံၣ် တၢ်ဟ့ၣ်ခီဟ့ၣ်နီၤလီၤ ယွၤအတၢ်အဲၣ်လၢအဒိၣ်အယိာ်န့ၣ်လီၤ.
