လၢၢ်ဧိၤလ့ဧိၤတဖၣ်အကျါ လၢၢ်လါအဲး(Bluestone)မ့ၢ်လၢၢ်တကလုာ်လၢ ပှၤဘၣ်သူၣ်ဘၣ်သးအီၤန့ၣ်လီၤ. ပှၤမ့ၢ်ဒိတီၢ်အီၤဒီး လၢၢ်လါအဲးတဖၣ်အံၤ အကလုၢ်သီၣ်ထီၣ် ဒ်သိးပှၤသံကျံတၢ်အပိးအလီသီၣ်ဝဲဒၣ်န့ၣ်လီၤ. ဝ့(လ)အထံကီၢ်, ဒူသဝီအမံၤ မဲၣ်ချိၣ်ဟီး (Maenclochog) အခီပညီန့ၣ် ‘ဒၢလွဲ’ မ့တမ့ၢ် ‘လၢၢ်လၢအသီၣ် ဒ်ဒၢလွဲ’ ဒီးစူးကါဝဲလၢၢ်လါအဲးတဖၣ် ဒ်သရိာ်ဒၢလွဲအသိး တုၤလၢ နံၣ်ကယၤ တဆံဃိးဒၣ်လဲာ်န့ၣ်လီၤ. တၢ်လီၤသးစဲလၢ ကီၢ်အဲကလံးပူၤ လၢၢ်ထူၣ် စကိးဟဲး(ခၠ)(Stonehenge) တဖၣ် ဘၣ်တၢ်မၤအီၤ လၢလၢၢ်လါအဲးတဖၣ် ဒီးကဲထီၣ် တၢ်ကမၢကမၣ်လၢ ပှၤတနီၤအဂီၢ် လၢလီၢ်ကဝီၤ အတၢ်ပနီၣ် လၢၢ်ထူၣ်တဖၣ်အံၤ လၢသီအတၢ်ပညိၣ်ကမ့ၢ် တၢ်သူၣ်ဝံၣ်သးဆၢတၢ်အဂီၢ်န့ၣ်လီၤ. ပှၤဃုထံတၢ်တနီၤစံးဝဲလၢ လၢၢ်လါအဲးတဖၣ်အံၤ မ့ၢ်လၢအလုၢ်အပှ့ၤအိၣ်ဒီးအကလုၢ်သီၣ်မုာ်အဃိ ဘၣ်တၢ်ဟဲစိာ်န့ၢ်အီၤလၢ မဲၣ်ချိၣ်ဟီးသဝီအကပၤ တၢ်လီၢ်လၢ အယံၤဝဲ မံၤလာ်ခံကယၤန့ၣ်လီၤ.
လၢၢ်လၢ အကလုၢ်သီၣ် ဒ်တၢ်သံကျံအကလုၢ်သီၣ်တဖၣ်အံၤ မ့ၢ်တၢ်လီၤလး လၢယွၤအတၢ်ဘၣ်တ့ အဒိၣ်အမုၢ်တမံၤ ဒီးဒုးသ့ၣ်နီၣ်ထီၣ်ပှၤ ကစၢ်ယ့ၣ်ရှူးအတၢ်ကတိၤလၢ အတၢ်လဲၤနုာ်လီၤဆူ ဝ့ၢ်ယရူၤရှလ့ၣ် အဆၢကတီၢ် ဖဲထီလၣ်အမုၢ်နံၤန့ၣ်လီၤ. ပှၤဂီၢ်မုၢ်တဖၣ် စံးထီၣ်ပတြၢၤ ကစၢ်ယ့ၣ်ရှူးအဃိဒီး ယူဒၤတၢ်ဘူၣ်တၢ်ဘါခိၣ်နၢ်တဖၣ် မၢဝဲ ကစၢ်ယ့ၣ်ရှူး လၢအကတြီပှၤဂီၢ်မုၢ်န့ၣ်လီၤ. လူၤကၣ် ၁၉:၄၀ အပူၤ ကစၢ်ယ့ၣ်ရှူးစံးဆၢက့ၤ “ယစံးဘၣ်သုလၢ ပှၤတဖၣ်န့ၣ် မ့ၢ်အိၣ်ဘှီၣ်ဝဲဒီး လၢၢ်တဖၣ်န့ၣ် ကကိးပသူထီၣ်လီၤ”န့ၣ်လီၤ.
လၢၢ်လါအဲးတဖၣ် ဒုးအိၣ်ထီၣ်တၢ်ကလုၢ်သီၣ်အမုာ်မ့ၢ်သ့, ဒီးလၢၢ်တဖၣ်လၢ ကစၢ်ယ့ၣ်ရှူး ပာ်ဖျါထီၣ် တၢ်န့ၣ် မ့ၢ်အုၣ်အသးလၢ ပှၤတ့လီၤအီၤ အကစၢ်အဂီၢ်န့ၣ် ဒီးဘၣ်မနုၤအဃိ ပတဒုးနဲၣ်ဖျါထီၣ် ပတၢ်စံးထီၣ်ပတြၢၤတၢ်ဆူ ပှၤလၢအတ့လီၤပှၤ, အဲၣ်ပှၤဒီးအုၣ်က့ၤခီၣ်က့ၤပှၤတဂၤအအိၣ်လဲၣ်. ကစၢ်ယွၤန့ၣ် ဂ့ၤဝဲကြၢးဝဲဒီး ကယဲၢ်တၢ်ဘူၣ်ထီၣ်ဘါထီၣ်အီၤလၢ တၢ်ခဲလၢာ်အဂီၢ်န့ၣ်လီၤ. မ်ယွၤအသးစီဆှံ ထိၣ်ဟူးထိၣ်ဂဲၤပှၤ ဒ်သိးပကဟ့ၣ်ထီၣ် တၢ်မၤလၤကပီၤ ကစၢ်ယ့ၣ်ရှူးလၢ ကြၢးဝဲဘၣ်ဝဲဒီးအီၤန့ၣ်တက့ၢ်. ကယဲၢ်တၢ်ဘၣ်တ့ခဲလၢာ် စံးထီၣ်ပတြၢၤ, မၤလၤကပီၤယွၤတက့ၢ်.
