အပူၤကွံာ် တဘျုးနံၣ် ဆံဆဲၣ်တဖၣ်အတီၢ်ပူၤ, တၢ်ကတိၤအသီတဖျၢၣ်လၢ အမ့ၢ် “တၢ်မၤသီထီၣ်က့ၤ-Reboot” န့ၣ်ဘၣ် တၢ်ထၢနုာ်အီၤဆူ တၢ်ဂီၤမူ အဝီၢ်သြဲပူၤန့ၣ်လီၤ. တၢ်ဂီၤမူ ကျိာ်တၢ်ကတိၤတဖၣ်အပူၤ ရံၣ်ဘုး(Reboot) မ့ၢ် တၢ်ဟံးန့ၢ် တၢ်တဲပူလီၢ်လံၤတယုၢ် ဒိက့ၤတ့ဒုးအိၣ်က့ၤတၢ်ဂီၤမူအသီတထံၣ်န့ၣ်လီၤ. တၢ်မၤသီထီၣ်က့ၤ တၢ်ဂီၤမူတနီၤန့ၣ် ဒုးနဲၣ်က့ၤဝဲ တၢ်ဂီၤမူတဖၣ် လၢညီနုာ် ပှၤသ့ၣ်ညါတ့ၢ်လံ, တၢ်ဂီၤမူဒ်သိး ပှၤဒူပှၤဃိၤ မ့တမ့ၢ် ပူမုာ်နၢ် တၢ်ဂီၤမူတဖၣ်န့ၣ်လီၤ. မ့မ့ၢ် တၢ်ဂီၤမူတနီၤ လၢဘၣ်တၢ်မၤသီထီၣ်က့ၤအီၤတဖၣ်န့ၣ် ဟံးန့ၢ်ဝဲ ပူလၢအမံၤတဟူကဲာ်ဆိးတဖၣ် ဒီးဒုးနဲၣ်ပာ်ဖျါဝဲဒၣ်လၢ ကျိၤကျဲအသီတမံၤန့ၣ်လီၤ. ဘၣ်ဆၣ် တၢ်မၤသီထီၣ်က့ၤ တၢ်ဂီၤမူတမံၤဂ့ၤတမံၤန့ၣ် မ့ၢ်ဒၣ် တၢ်ဒိက့ၤ တ့ဒုးထီၣ်က့ၤ တၢ်ဂီၤမူခံဘျီတဘျီအဂီၢ်န့ၣ်လီၤ. တၢ်မၤအံၤ မ့ၢ်တၢ်စးထီၣ်ကဒီးအသီတဘျီ, မ့ၢ်တၢ်ခွဲးတၢ်ယာ်လၢ တၢ်ထၢနုာ်တၢ်အိၣ်မူအသီဆူ တၢ်အိၣ်မူအလီၢ်လံၤပူၤန့ၣ်လီၤ.
ပူအဂၤတယုၢ်လၢပကထံၣ်ဘၣ် “တၢ်မၤသီထီၣ်က့ၤ” တၢ်မၤအသးန့ၣ် မ့ၢ်တၢ်သးခုကစီၣ်အပူၤန့ၣ်လီၤ. ပူတယုၢ်အံၤဖျါဖဲ ယိၤ ၁၀:၁၀ အပူၤ ဖဲကစၢ်ယ့ၣ်ရှူး ကွဲမုာ်ပှၤလၢ အကဟ့ၣ်ပှၤ တၢ်ပျၢ်ပတၢ်ဒဲးဘး, ဃုာ်ဒီး တၢ်အိၣ်မူအလၢအပှဲၤဒီး အထူအယိာ်အဂီၢ်န့ၣ်လီၤ. ဒီးလၢလံာ်သးသယုၢ်တၢ်အပူၤ, ဝံယံးရမံယၤ ဒုးသ့ၣ်နီၣ်ထီၣ်ပှၤလၢ ကစၢ်ယွၤအတၢ်အဲၣ်လၢပဂီၢ်န့ၣ် ဒုးအိၣ်ထီၣ် “တၢ်မၤသီထီၣ်က့ၤတၢ်” ကိးမုၢ်နံၤဒဲးအဂီၢ်န့ၣ်လီၤ. သးသယုၢ် ၃:၂၂-၂၃ ပာ်ဖျါဝဲ “မ့ၢ်ယွၤအဘျုးအဖှိၣ်, မ့ၢ်အသးတတူာ်ဘၣ်သတးဒီး, ပတတုၤဘၣ်လၢ တၢ်ဟးဂုာ်ဟးဂီၤဘၣ်လီၤ. အဘျုးအဖှိၣ်အသီ အိၣ်ဝဲကိးဂီၤဒဲးလီၤ. နမၤတီနကလုၢ်လီၤတံၢ်လီၤဆဲးလီၢ်”န့ၣ်လီၤ.
ယွၤအဘျုးအဖှိၣ်ကွဲမုာ်ပှၤလၢ ပကတူၢ်လိာ်ဟံးဃာ် ပတၢ်အိၣ်မူကိးမုၢ်နံၤန့ၣ် ကမ့ၢ်ဝဲ ဒ်တၢ်ခွဲးတၢ်ယာ်အသီတမံၤ လၢပကလဲၤခီဖျိ ပလၢၢ်ဘၣ်ယွၤအတၢ်တီတၢ်လိၤအဂီၢ်န့ၣ်လီၤ. ပမ့ၢ်ဂုာ်ကျဲးစၢး ဂဲၤလိာ်ဘၣ်ဝဲဒီး ပတၢ်ကမၣ်ပတၢ်ဒဲးဘးအဃိမ့ၢ်ဂ့ၤ ပမ့ၢ်ဘၣ်လဲၤခီဖျိ တၢ်ကီတၢ်ခဲ, တၢ်နးတၢ်ဖှီၣ်အဂၤတဖၣ်မ့ၢ်ဂ့ၤ ယွၤအသးစီဆှံ အူသဖှိနုာ် တၢ်ပျၢ်တၢ်ဒဲးဘး, တၢ်အိၣ်မူအသီ, ဒီးတၢ်မုၢ်လၢ်တဖၣ်ဆူ မုၢ်နံၤအသီ ကိးမုၢ်နံၤဒဲးအပူၤ သ့ဝဲဒၣ်န့ၣ်လီၤ. ပမုၢ်နံၤ ကိးမုၢ်နံၤဒဲးန့ၣ် မ့ၢ်တၢ်မၤသီထီၣ်က့ၤ တၢ်တကလုာ် ဒီးမ့ၢ်တၢ်ခွဲးတၢ်ယာ်လၢ ပကလူၤပိာ် ပှၤနဲၣ်တၢ်ဖးဒိၣ်တဂၤအခံ, ပှၤလၢကထၢနုာ်ထါ ပပူလၢ အပူဖးဒိၣ်တယုၢ်အပူၤအဂီၢ်န့ၣ်လီၤ.
