ပှၤစဲအ့ၣ်ဖိတဖၣ် ဃုနၢ်ပၢၢ်တၢ် အါနံၣ်ဝံၤအလီၢ်ခံ, အဝဲသ့ၣ် မၤလိန့ၢ်ဘၣ်ဝဲဒၣ်လၢ ထွံၣ်မံၤတဖၣ်န့ၣ် အိၣ်ဒီးအကလုၢ်လၢ အဟူဂ့ၤလီၤဆီတဖၣ် လၢအမၤစၢၤ အတၢ်ဆဲးကျိး လိာ်သး တဒုဒီးတဒုန့ၣ်လီၤ. ပှၤစဲအ့ၣ်ဖိတဂၤ သူဝဲ တၢ်ပနီၣ်သနူလီၤလီၤဆီဆီ လၢတၢ်ပဲာ်ထံနီၤဖး တၢ်အကလုၢ်အဂီၢ်, ဒီးထံၣ်သ့ၣ်ညါဘၣ်ဝဲဒၣ်လၢ ထွံၣ်မံၤတဒု အတၢ်အိၣ်ယူၤ အသီၣ်ဒိၣ်သီၣ်ဆံး ဒီးအဃဲအပၢၤန့ၣ် မၤစၢၤ ထွံၣ်မံၤတဖၣ် လၢလီၤတံၢ်လီၤဆဲး လၢမျးကယၤ တကယၤန့ၣ်လီၤ.
လံာ်စီဆှံ ဟ့ၣ်ထီၣ်ဝဲ တၢ်အဒိအါမံၤ ဘၣ်ဃးဒီး ယွၤအတၢ်သ့ၣ်ညါနီၣ် အတၢ်ဘၣ်တ့ လၢအဝဲအဲၣ်အီၤတဖၣ် အကလုၢ်လီၤဆီတဖၣ်န့ၣ်လီၤ. အဝဲကိး စီၤမိၤရှ့လၢ အမံၤ ဒီးကတိၤတၢ်ဒီးအီၤ လိၤလိၤန့ၣ်လီၤ (၂ မိၤ ၃:၄-၆). ပှၤကွဲးထါစံးထီၣ်ပတြၢၤ စီၤဒၤဝံး စံးဝဲဒၣ် “ယကိးထီၣ် ယွၤလၢယကလုၢ်, ဒီးစံးဆၢယၤလၢ အကစၢၢ်စီဆှံန့ၣ်လီၤ” (စံး ၃:၄). တၢ်မၢဖိစီၤပီလူးစ့ၢ်ကီး ပာ်လုာ်ပာ်ပှ့ၤ ယွၤအပှၤဂီၢ်မုၢ်တဖၣ် အတၢ်သ့ၣ်ညါနီၣ်ယွၤအကလုၢ်န့ၣ်လီၤ.
လၢအတၢ်ကတိၤဟးဖးဆူ အ့းဖ့းစူးတၢ်အိၣ်ဖှိၣ်သးပှၢ်တဖၣ် အအိၣ်န့ၣ်, စီၤပီလူးစံးဝဲလၢ အဘၣ်“စၢဃာ်လၢသး” လၢအကလဲၤဆူ ဝ့ၢ်ယရူၤရှလ့ၣ်အဂီၢ်န့ၣ်လီၤ. ဖဲအတုၤဃီဆူ ဝ့ၢ်ယရူၤရှလ့ၣ်အခါ တၢ်မနုၤကမၤအသးလဲၣ်န့ၣ် အဝဲတသ့ၣ်ညါ, ဘၣ်ဆၣ် အဝဲမၤဂၢၢ်ကျၢၤ အတၢ်ဟ့ၣ်လီၤသးလၢာ်လၢာ်ဆ့ဆ့ လၢအကပိာ်ယွၤအကလုၢ်န့ၣ်လီၤ (မၤ ၂၀:၂၂). အဝဲဟ့ၣ်ပလီၢ်ဝဲလၢ “ထွံၣ်မံၤဒူ”တဖၣ် က “ဂဲၤဆၢထၢၣ်” ဒီး “စံၣ်တဲၤတဲလီၤတၢ်လၢ အဒၢက့ၣ်တဖၣ်” လၢတၢ်အိၣ်ဖှိၣ်အကျါဒၣ်လဲာ် န့ၣ်လီၤ (:၂၉-၃၀). အန့ၣ်ဝံၤဒီး အဝဲဟ့ၣ်ဂံၢ်ဟ့ၣ်ဘါ တၢ်အိၣ်ဖှိၣ်သးပှၢ်တဖၣ် လၢကကျဲးစၢး ထုးဂံၢ်ထုးဘါ လၢတၢ်ပဲာ်ဖးနီၤဖး ယွၤအတၢ်မ့ၢ်တၢ်တီအပူၤန့ၣ်လီၤ (:၃၁).
ကယဲၢ်ပှၤစူၢ်က့ၤနာ်က့ၤလၢ ကစၢ်ယ့ၣ်ရှူးတဖၣ်န့ၣ် အိၣ်ဒီးတၢ်အခွဲးလီၤဆီလၢအကသ့ၣ်ညါဘၣ်ဝဲလၢ ယွၤနၢ်ဟူဒီးစံးဆၢပှၤန့ၣ်လီၤ. ပအိၣ်စ့ၢ်ကီးဒီး သးစီဆှံအစိအကမီၤ လၢအမၤစၢၤပှၤ ဒ်သိးပကသ့ၣ်ညါနီၣ်ယွၤအကလုၢ် လၢအလီၤပလိာ်ဒီးလံာ်စီဆှံအတၢ်ကတိၤတဖၣ်န့ၣ်လီၤ.
