ယတံၤသကိးမုၣ် စူစံၢ်(Soozi)ဒီးယၤ ပဆ့ၣ်နီၤလၢပီၣ်လဲၣ်ကၢၢ်နံၤ လၢၢ်ဖးဒိၣ်တဖျၢၣ်အလိၤ, ဒီးကွၢ်ကီ ပီၣ်လဲၣ်ထံသဘှဲ ပြိထီၣ်, ကွီၤထီၣ်အသးန့ၣ်လီၤ. စူစံၢ် ကွၢ်ဝဲ လပီတဖျၢၣ် ဝံၤတဖျၢၣ် ဟဲနုာ်လီၤဒိတီၢ် လၢၢ်တဖၣ်, ဒီးစံးဝဲဒၣ် “ယအဲၣ်ဘၣ် ပီၣ်လဲၣ်ဖးဒိၣ်လီၤ” အဝဲဟဲသုးအသးတဘိယူၢ်ဃီအဃိ တလိၣ်ယသုးယသးဘၣ်”.

ပဝဲတနီၤ ပသးကလၢၢ်ဘၣ် ဒ်သိး ပလိၣ်ဘၣ် “တၢ်ပျဲ” လၢပဆိကတီၢ်တစိၢ် ဒီးအိၣ်ဘှံးလၢ ပတၢ်ဖံးတၢ်မၤအဂီၢ်လီၤ. မ့ၢ်မးလီၤ. တၢ်အံၤမ့ၢ်ဒၣ် တၢ်လၢပယွၤလၢအဂ့ၤတဂၤ ဟ့ၣ်လၢ်ပှၤန့ၣ်လီၤ. ဃုနံၤဃုသီ, ယွၤဒုးတရံးဒီး ဒုးအိၣ်ထီၣ်ဟီၣ်ခိၣ်, ဒီးတ့လီၤတၢ်ကပီၤ, ခိ, တၢ်မဲတၢ်မါ, ဆၣ်ဖိကီၢ်ဖိတဖၣ်, ဒီးပှၤကညီန့ၣ်လီၤ. အန့ၣ်ဝံၤဒီး လၢမုၢ်နွံနံၤ တနံၤန့ၣ်, ယွၤအိၣ်ဘှံးဝဲလီၤ (၁ မိၤ ၁:၃၁-၂:၂). လၢတၢ်မၤလိာ်အထံၣ်တဆံအပူၤ, ယွၤဟ့ၣ်လီၤတၢ်သိၣ်တၢ်ဘျၢတဖၣ် လၢတၢ်အိၣ်မူအဂ့ၤ လၢအမၤလၤကပီၤအီၤအဂီၢ် ( ၂ မိၤ ၂၀:၃-၁၇), ပၣ်ဃုာ်ဒီးတၢ်မၤလိာ်လၢတၢ်ကသ့ၣ်နီၣ် မုၣ်အိၣ်ဘှံးအနံၤ ဒ်မုၢ်နံၤလၢတၢ်အိၣ်ဘှံးအဂီၢ်အသိး (:၈-၁၁)န့ၣ်လီၤ. လၢလံာ်စီဆှံအသီတကတြူၢ်အပူၤ, ပထံၣ်ဘၣ် ကစၢ်ယ့ၣ်ရှူး မၤဘျါက့ၤ ကယဲၢ်ပှၤဆူးပှၤဆါတဖၣ် လၢဝ့ၢ်အပူၤ (မၢ်ကူး ၁:၂၉-၃၄), ဒီးလၢခံတနံၤဂီၤဂီၤန့ၣ်, အဝဲလဲၤဝဲဆူ တၢ်ဘှ့ၣ်တၢ်ဘှီၣ်အလီၢ်တဒၢ ဒ်သိးအကဘါထုကဖၣ် တၢ်အဂီၢ်န့ၣ်လီၤ (:၃၅). ယွၤမၤတၢ်အိၣ်ဒီး တၢ်ပညိၣ်လၢ အကမၤတၢ်ဒီး အကအိၣ်ဘှံးစ့ၢ်ကီးန့ၣ်လီၤ.

ယွၤအတၢ်လုၢ်အီၣ်လုၢ်အီ ခီဖျိတၢ်ဖံးတၢ်မၤ ဒီးအတၢ်ကွဲမုာ်လၢ ကအိၣ်ဘှံးအဂီၢ်န့ၣ် အိၣ်ဝဲဒၣ်လၢ ပခိၣ်ပဃၢၤဝးဝးန့ၣ်လီၤ. တၢ်သူၣ်လီၤဖျးလီၤ ဖဲတၢ်ကိၢ်ထီၣ်သီအကတီၢ်န့ၣ် ဟ့ၣ်ပှၤ တၢ်မဲထီၣ်ဒိၣ်ထီၣ် ဖဲတၢ်ကိၢ်အကတီၢ်, ဒီးတၢ်ကူးက့ၤတၢ်ဖဲ တၢ်ဂိၢ်ထီၣ်သီအကတီၢ်, ဒီးတၢ်အိၣ်ဘှံး ဖဲတၢ်ဂိၢ်အကတီၢ်န့ၣ်လီၤ. မုၢ်ဂီၤ, မုၢ်ထူၣ်, မုၢ်ဃ့ၣ်လီၤ, မုၢ်ဟါဒီး မုၢ်နၤ အိၣ်ဝဲလီၤ. ယွၤရဲၣ်ကျဲၤပတၢ်အိၣ်မူလၢတၢ်ဖံးတၢ်မၤ ဒီးတၢ်အိၣ်ဘှံး ခံမံၤလိာ်အဂီၢ်, ဒီးဟ့ၣ်ပှၤ တၢ်ပျဲၤလၢ ပကမၤတၢ်ခံမံၤလိာ်အံၤအဂီၢ်န့ၣ်လီၤ.