ဖဲလၢယထီၣ် ခီလ့ၣ်ကၠိအကတီၢ်, တၢ်လဲၤက့ၤ ကၠိဒီးဟံၣ်အဂီၢ် ယဘၣ် နီၣ်သိလ့ၣ် လၢပှၢ်မုၢ်ကနၢကျဲတဘိအံၤန့ၣ် ဖျါလီၤကၢၣ်ဒိၣ်မးန့ၣ်လီၤ. မ့ၢ်လၢကျဲတဘိအံၤ ထီဒီးဘျၢလိၤဝဲအဃိ ယနီၣ်ဘၣ် သိလ့ၣ် ချ့ဝဲဒၣ်အါန့ၢ်ဒံး ယကြၢးနီၣ်အီၤ အဘျီတဖၣ် အဘျီန့ၣ်လီၤ. အခီၣ်ထံးန့ၣ် ပှၤဘၣ်မူဘၣ်ဒါလၢ အခိးကွၢ်ထွဲ ကျဲဒီး သိလ့ၣ် အတၢ်လဲၤက့ၤတဖၣ် ဟ့ၣ်ပလီၢ်ယၤ ဒီးလၢခံယဒိးန့ၢ်ဘၣ် လံာ်က့ဖိလၢ ယကဘၣ်လဲၤဟ့ၣ်ကျိၣ်စ့ ဒ်အမ့ၢ် တၢ်စံၣ်ညီၣ်လၢ ယလုၢ်သ့ၣ်ခါပတာ် တၢ်သိၣ်တၢ်ဘျၢအဃိန့ၣ်လီၤ. တၢ်န့ၣ် မၤအသးဝံၤ ယဘၣ်တၢ်ဖီၣ်န့ၢ်ယၤ ခံဘျီတဘျီ, တၢ်လီၢ်ဖဲ လၢပှၤဖီၣ်ယၤ အခီၣ်ထံးတဘျီအလီၢ်န့ၣ်လီၤ.
တၢ်လၢပကဘၣ်ဒိကနၣ်တၢ်အလီၢ် ပမ့ၢ်တတူၢ်လိာ်ဘၣ်ဒီး တၢ်လၢတဂ့ၤတဝါ လၢကမၤဘၣ်ဒိဆါပှၤတဖၣ် ဟဲပိာ်ထွဲထီၣ်အသး သ့ဝဲဒၣ်န့ၣ်လီၤ. တၢ်အဒိလၢ လီၤသးအုး ဒ်သိးအံၤန့ၣ် ပကထံၣ်ဘၣ် စီၤပၤယိၤရှံယၤ, စီၤပၤလၢအဂ့ၤဒီး တီဝဲလိၤဝဲတဂၤအဂ့ၢ်န့ၣ်လီၤ. အဲၤကူပတူး စီၤပၤနကိၤ ဒီးအပှၤသုးဖိတဖၣ် ကလဲၤခီဖျိကီၢ်ယူၤဒၤအတၢ်လီၢ်တၢ်ကျဲတဖၣ် အဆၢကတီၢ်, ဒ်သိးကလဲၤမၤစၢၤ ကီၢ်အၤရှူၢ်လၢ တၢ်ဒုးထီဒါ ကီၢ်ဘၤဘူၤလိၣ်အဂီၢ်န့ၣ်, စီၤပၤယိၤရှံယၤလဲၤထီၣ် တၢ်ဒုးလၢ တၢ်တြီဆၢ စီၤပၤနကိၤန့ၣ်လီၤ. ၂ ကွဲး ၃၅:၂၁ အပူၤ ပာ်ဖျါဝဲလၢ စီၤပၤနကိၤ ဆှၢလီၤ ကလူးတဖၣ် ဆူ စီၤပၤယိၤရှံယၤ အအိၣ်ဒီး စံးဝဲ, “ယွၤမၤလိာ်ယၤ ဒ်သိးယကမၤချ့ချ့န့ၣ် တြီယွၤလၢ အအိၣ်ဒီးယၤတဂ့ၤ”န့ၣ်လီၤ. ကစၢ်ယွၤဆှၢလီၤ စီၤပၤနကိၤန့ၣ် မ့ၢ်ဝဲတီဝဲ ဘၣ်ဆၣ်, အဆၢဖိ ၂၂ ပာ်ဖျါဝဲလၢ “စီၤပၤယိၤရှံယၤ တဒိကနၣ်ဘၣ် စီၤနကိၤအတၢ်ကတိၤ လၢယွၤအထးခိၣ်ဘၣ်, ဒီးဟဲဒုးတၢ်လၢ ကစၢၢ်ကဆူး မကံဒိၤအပူၤလီၤ”န့ၣ်လီၤ. စီၤပၤယိၤရှံယၤဘၣ်ဒိနးနးကလဲာ် ဖဲတၢ်ဒုးအံၤန့ၣ်ဒီး သံဝဲအဃိ အဆၢဖိ ၂၄ ပာ်ဖျါဝဲလၢ “ဒီးယူၤဒၤ ဒီးယရူၤရှလ့ၣ်ဖိခဲလၢာ် ဟီၣ်ဝဲယၢၤဝဲလၢ စီၤယိၤရှံယၤအဃိလီၤ”န့ၣ်လီၤ.
စီၤယိၤရှံယၤလၢ အအဲၣ်ကစၢ်ယွၤတဂၤအံၤ ထံၣ်သ့ၣ်ညါဘၣ်ဝဲ တၢ်ဟံးန့ၢ် တၢ်ဆၢကတီၢ်လၢ တၢ်ကဒိကနၣ် ကစၢ်ယွၤအကလုၢ်ဒီး ယွၤအတၢ်ကူၣ်သ့ ဟဲခီဖျိလၢ ပှၤဂုၤပှၤဂၤအလီၢ်န့ၣ် စီၤပၤယိၤရှံယၤ ဃုထၢ ဟံးန့ၢ်ဆူၣ်ဝဲ အကစၢ်ဒၣ်ဝဲအကျဲအကျိၤအကွၢ်အဃိ အကတၢၢ် တၢ်မၤအသးတဂ့ၤတဝါနီတဘျီဘၣ်န့ၣ်လီၤ. မ်ကစၢ်ယွၤ ကဟ့ၣ်လီၤဘၣ်ပှၤ တၢ်ဆီၣ်လီၤသးလၢ ပလိၣ်ဘၣ်အီၤ ဒ်သိးပကကွၢ်ထံ သမံသမိးက့ၤ ပသးဒီး ဟံးဃာ်ကစၢ်ယွၤအတၢ်ကူၣ်သ့ လၢပသးကံၢ်ပူၤအဂီၢ်န့ၣ်တက့ၢ်.
