ကၠိၣ်ကၠံၤ(Jojie) စံးဝဲဒၣ်လၢ “ယတူၢ်ဘၣ်တၢ် ဒ်သိးတၢ်မၤစၢၤ တအိၣ်လၢၤဘၣ် နီတမံၤဘၣ်န့ၣ်လီၤ”. တၢ်လီၤသးဘၣ်ဒိဆါအီၤလၢ အဃုထံၣ်သ့ၣ်ညါဝဲန့ၣ် လီၤဂာ်ဒ်သိး နီၣ်ခိအတၢ်ဘၣ်ဒိဆါန့ၣ်လီၤ. ကၠိၣ်ကၠံၤသ့ၣ်ညါဝဲဒၣ် အတၢ်အဲၣ်တီလၢ ကဒိးတ့ဒိးဖျီအသးဒီးအီၤတဂၤန့ၣ်, ထံၣ်န့ၢ်အဲၣ်လိာ်သးဒီး ပိာ်မုၣ်အဂၤတဂၤအဃိန့ၣ်လီၤ. အပူၤကွံာ် ကၠိၣ်ကၠံၤအတၢ်ရ့လိာ်ဘၣ်ထွဲလိာ်သးဒီး အတၢ်အဲၣ်တီတဂၤစ့ၢ်ကီး ကတၢၢ်ဝဲ ဒ်သိးအံၤန့ၣ်လီၤ. လၢခံဖဲအနၢ်ဟူဘၣ် ကစၢ်ယွၤအတၢ်အဲၣ်အဂ့ၢ်လၢ တၢ်မၤလိလံာ်စီဆှံအကတီၢ်ဒီး “တၢ်အံၤ မ့ၢ်တၢ်လံၣ်အီၣ်လီအီၣ်တၢ် အဂၤတမံၤန့ၣ်ဧါ. ကစၢ်ယွၤစံးဝဲဒၣ်လၢ အဝဲအဲၣ်ယၤန့ၣ် ယမ့ၢ်နာ်အီၤဒီး ကကဲထီၣ် တၢ်သးဘၣ်ဒိဆါလၢယဂီၢ်ဧါ”န့ၣ် ကၠိၣ်ကၠံၤ တဆိကမိၣ်ဝဲဘၣ်န့ၣ် အိၣ်ဝဲတသ့ဘၣ်န့ၣ်လီၤ.
ဒ်ကၠိၣ်ကၠံၤအသိးန့ၣ် ပကလဲၤခီဖျိဘၣ် တၢ်ရ့လိာ်ဘၣ်ထွဲလိာ်သးအတၢ်ဂ့ၢ်ကီ လၢအကမၤလီၤဘှံးလီၤတီၤ ပသူၣ်ပသး, ဘၣ်သ့ၣ်သ့ၣ် ဒုးအိၣ်ထီၣ် တၢ်ပျံၤ, တၢ်ဘၣ်ယိၣ်ဘၣ်ထွဲဒီးပကနာ် ပှၤတဂၤဂၤလၢ အအၢၣ်လီၤပှၤ အတၢ်အဲၣ်အဂီၢ်န့ၣ်လီၤ. ဘၣ်ဃးဒီး ကစၢ်ယွၤအတၢ်အဲၣ်စ့ၢ်ကီး ဘၣ်သ့ၣ်သ့ၣ် ပကတူၢ်ဘၣ်ဒ်သိးအံၤဒီး ပကဆိကမိၣ်လၢ မ့ၢ်ပကလဲၤဃုဒိးန့ၢ်ဘၣ်အီၤဖဲလဲၣ်န့ၣ်လီၤ. ပကဃုမၤန့ၢ်အီၤအဂီၢ် အလီၢ်တအိၣ်ဘၣ်. ရိမ့ၤ ၅:၈ အပူၤ ပာ်ဖျါဝဲ “မ့မ့ၢ်ဖဲပမ့ၢ် ပှၤတၢ်ဒဲးဘးဖိအဖၢမုၢ်ဒီး, ခရံာ်ဒိးသံအသးလၢပဂီၢ် သတးဒီး, ယွၤပာ်ဖျါထီၣ် အတၢ်အဲၣ်တၢ်ကွံဒၣ်ဝဲ လၢပှၤလီၤ”န့ၣ်လီၤ.
ကၠိၣ်ကၠံၤစံးဝဲလၢ”အကတၢၢ်န့ၣ်, ခီဖျိအတၢ်တူၢ်သံအသးလၢယဂီၢ်အဃိ ယသ့ၣ်ညါနၢ်ပၢၢ်ဘၣ်လၢ ကစၢ်ယွၤပာ်ဖျါတ့ၢ်လံ အတၢ်အဲၣ်ပှၤ”န့ၣ်လီၤ. ယတံၤသကိးမုၣ်အံၤ ဃုထံၣ်သ့ၣ်ညါဝဲ ပတၢ်အိၣ်မူလၢ တၢ်ဒဲးဘးအပတီၢ်ပူၤန့ၣ် မၤလီၤဖးပှၤဒီး ကစၢ်ယွၤအဃိ, ရိမ့ၤ ၅:၁၀ ဒီး ၁ ယိၤ၂:၂ အပူၤ, စံးဘၣ်ပှၤလၢ ကစၢ်ယွၤဟဲတုၤဃီၤဆူပအိၣ် ခီဖျိ ဟ့ၣ်လီၤဝဲ အဖိခွါကစၢ်ယ့ၣ်ၡူး, ဒ်သိးကတူၢ်သံအသးလၢပဂီၢ်န့ၣ်လီၤ. လၢတၢ်န့ၣ်အဃိ, ယိၤ၃:၁၆အပူၤ ပာ်ဖျါဝဲ, ပတၢ်ဒဲးဘးတဖၣ် ဘၣ်တၢ်ပျၢ်ကွံာ်အီၤ ဒီးပမုၢ်လၢ်ကွၢ်စိ တၢ်အိၣ်မူအထူအယိာ်ဒီး ကစၢ်ယွၤသ့ဝဲဒၣ်န့ၣ်လီၤ.
တဘျီလၢ်လၢ် ဖဲပဆိကမိၣ်တၢ်လၢ ပနာ်ကစၢ်ယွၤအတၢ်အဲၣ် မ့ၢ်ဘၣ် ကသ့နီၢ်နီၢ်ဧါန့ၣ်ဒီး မ်ပကသ့ၣ်နီၣ်ထီၣ်က့ၤ ကစၢ်ယ့ၣ်ရှူးခရံာ်တူၢ်သံအသးလၢ သ့ၣ်ဖျၢၣ်ထူၣ်စုညါအလိၤ န့ၣ်တက့ၢ်. ပမ့ၢ်သ့ၣ်ညါ ကစၢ်ယွၤအတၢ်တီတၢ်လိၤန့ၣ်ဒီး ပနာ်ယွၤအတၢ်အၢၣ်လီၤလၢ အအဲၣ်ပှၤန့ၣ် သ့ဝဲဒၣ်န့ၣ်လီၤ.
