ပှၤကူၣ်သ့လၢတၢ်ဂံၢ်တၢ်ဒွး အၣ်ဘြၣ်ဟၣ်ဝဲ(လ)(ဒ),(Abraham Wald)မ့ၢ်ပှၤဟၣ်က့ၣ်ရံၣ်ဖိ( Hungarian) ဒီး လဲၤတုၤဆူ ကီၢ်အမဲရကၣ် ဖဲ ၁၉၃၈ နံၣ်တဂၤအံၤန့ၣ် ဟ့ၣ်လီၤအတၢ်သ့တၢ်ဘၣ် လၢဟီၣ်ခိၣ်ဒီဘ့ၣ် တၢ်ဒုးတၢ်ယာ်ဖးဒိၣ် ခံဘျီတဘျီအဂီၢ်န့ၣ်လီၤ. ပှၤဘၣ်မူဘၣ်ဒါတဖၣ်လၢ သုးဂ့ၢ်ဝီၤတဖၣ် လၢကွၢ်ဃုကျိၤကျဲတဖၣ်လၢ တၢ်ကဒီတဒၢ ဒုၣ်ဒါအတၢ်ခးလီၤတဲာ် ကဘီယူၤအဂီၢ်န့ၣ် ဃ့ဝဲ ဝဲ(လ)(ဒ) ဒီးအတံၤသကိးတဖၣ်လၢ မၤသကိးတၢ် ဘၣ်ထွဲဒီး တၢ်ဃုပာ်ဖှိၣ်ဃုနၢ်ပၢၢ် နီၢ်ဂံၢ်နီၢ်ဒွးစရီပတီၢ်တဖၣ်အကရူၢ်ဖိ ဒ်သိးလၢ ကဃုထံၣ်န့ၢ်ဘၣ် ကျိၤကျဲအဂ့ၤကတၢၢ်တဖၣ် လၢတၢ်ကဒီတဒၢ သုးကဘီယူၤတဖၣ်အဂီၢ်န့ၣ်လီၤ. အဝဲသ့ၣ်စးထီၣ် လူၤကွၢ်ဃိထံ ကဘီယူၤတဖၣ်လၢ အဟဲက့ၤတုၤလၢ တၢ်ဒုးပျီတဖၣ်အလိၤ ဒ်သိး ကသ့ၣ်ညါဘၣ်ဝဲ တၢ်လီၢ်လၢဘၣ်ဒိဘၣ်ထံးဒီးဟးဂီၤအလီၢ်အါကတၢၢ်ကမ့ၢ်ဖဲလဲၣ်န့ၣ်လီၤ. ကဘီယူၤဘၣ်ဒိဘၣ်ထံးဒီး ဟးဂီၤဝဲဒၣ်န့ၣ် ပာ်ဖျါဝဲ တၢ်လီၢ်လၢ ကဘီယူၤလိၤ တၢ်ခးဘၣ်ဒီး တလီၤတဲာ်ဟးဂီၤဝဲဒၣ်ဘၣ်ဒီး ဟဲက့ၤတုၤကဒါက့ၤတဖၣ်န့ၣ် ဘၣ်တၢ်ထံၣ်လီၤဆီလၢ ဝဲ(လ)(ဒ) ဒိးန့ၢ်ဘၣ် တၢ်စံးပတြၢၤတမံၤန့ၣ်လီၤ. ဝဲ(လ)(ဒ) နၢ်ပၢၢ်ဝဲဒၣ် ကဘီယူၤတဖၣ် လၢ ဘၣ်တၢ်ခးလီၤတဲာ်န့ၣ် ပှၤဃုထံၣ်န့ၢ်တၢ်လီၢ်တၢ်ကျဲလၢအလိၣ်ကတၢၢ် ဒ်သိးတၢ်ကမၤဂ့ၤမၤအါထီၣ် ကတီၤဒီသဒၢ ကဘီယူၤအဂီၢ်န့ၣ်လီၤ. ကဘီယူၤစဲးခိၣ်ဃံ မ့ၢ်တၢ်လီၢ်လၢ ကတီၤဒီသဒၣ် တၢ်အဂံၢ်အဘါအစၢ်ကတၢၢ်အဃိ ဘၣ်ဒိဘၣ်ထံး အါဝဲဒၣ်ဒီး ဟးဂီၤလီၤတဲာ်ဝဲဒၣ်ဒီး ပှၤကကွၢ်ဃိထံတၢ်အဂီၢ် တသ့ဘၣ်န့ၣ်လီၤ.
စီၤပၤ စီၤရှလိၤမိၣ် သိၣ်လိနဲၣ်လိပှၤလၢ ပကဟံးဃာ်ပၢၤဃာ်ပသူၣ်ပသး လၢအမ့ၢ်တၢ်လၢအဂံၢ်အဘါစၢ် ကတၢၢ်န့ၣ်လီၤ. လံာ်ကတိၤဒိ ၄:၂၃ အပူၤ နဲၣ်လိအဖိခွါလၢ ပၢၤနသးတက့ၢ်. အဂ့ၢ်ဒ်အံၤ ကယဲၢ်တၢ်ကိးမံၤ အိၣ်ထီၣ်အသးသ့ဝဲအဃိန့ၣ်လီၤ. ကစၢ်ယွၤ အတၢ်သိၣ်လိနဲၣ်လိပှၤ ပတၢ်ဆၢတဲာ်ပတၢ်ပာ်လီၤသးတဖၣ် မ်အသူတကမၣ်အဂီၢ် ဒီးသိၣ်လိပှၤဒ်သိးပကပာ်ဖှိၣ်တၢ်တမံၤမံၤ ထံးထံးဆးဆးလၢ ပသးသမူဒီတစိၤ အဂီၢ်န့ၣ်လီၤ.
ပမ့ၢ်ဒီသဒၢ ပၢၤဃာ် ပသူၣ်ပသး ခီဖျိလၢ ပဒိကနၣ် ယွၤအကလုၢ်ကထါတဖၣ်န့ၣ်ဒီး အဆၢဖိ ၂၇ စံးဘၣ်ပှၤလၢ ပကဘၣ်သုးကွံာ် ပခီၣ်ထွဲလၢတၢ်အၢအဂီၢ်ဒီး ပသးသမူပူၤ ကလဲၤတၢ်ဒီးကစၢ်ယွၤန့ၣ် ကအိၣ်ဂၢၢ်ကျၢၤဝဲဒၣ်န့ၣ်လီၤ. ကိးမုၢ်နံၤ ပတၢ်အိၣ်မူအိၣ်ဂဲၤဝဲလၢ ဒုၣ်ဒါတဖၣ်အတၢ်လီၢ်အတၢ်ကျဲ လၢအလီၤပျံၤဒီး အလီၤဘၣ်ယိာ်တၢ်တဖၣ်အပူၤဘၣ်ဆၣ် ခီဖျိလၢ ကစၢ်ယွၤအတၢ်ကူၣ်သ့ ဒီတဒၢကတီၤဃာ် ပသူၣ်ပသးအဃိ ပကွၢ်တၢ်တထံၣ်ဃီ ထဲဒၣ်လၢ ပမူဒါတၢ်ဖံးတၢ်မၤတဖၣ်အပူၤ ဒ်သိးဒီးပကအိၣ်မူအိၣ်ဂဲၤလၢ ယွၤအလၤကပီၤအဂီၢ် ကသ့ဝဲဒၣ်န့ၣ်လီၤ
