ဝ့ၢ်အၣ်ရူကၣ်(Aurukun) မ့ၢ်ဝ့ၢ်အဆံးတဝ့ၢ်လၢ ကီၢ်အီၤစတြ့လယၣ်ကလံၤစိး (Northern Australia), ဒီး ပှၤလၢအအိၣ်ဆိးဝဲဒၣ်လၢဝ့ၢ်အံၤအပူၤ မ့ၢ်ပှၤအိၣ်ဆိးတ့ၢ်လၢပျၢၤလံၤလံၤ ဒီးအိၣ်ဟဲလီၤစၢၤဝဲဒၣ်လၢ ကလုာ်ဒူၣ်နွံကလုာ်န့ၣ်လီၤ. လၢဝ့ၢ်အၣ်ရူကၣ်အံၤ တၢ်သးခုကစီၣ် ဟဲတုၤဝဲအိၣ် အနံၣ် ၁၀၀ ဘျဲၣ်ဘၣ်ဆၣ် တၢ်ဟ့ၣ်ကၣ်လၢ အမ့ၢ် “ မဲာ်လၢ မဲာ်အဂီၢ်” (၂ မိၤ ၂၁:၂၃-၂၅) ဘၣ်တဘျီဘျီန့ၣ် အိၣ်ဒံးဝဲဒၣ် အဖၢမုၢ်န့ၣ်လီၤ. ဖဲ ၂၀၁၅ နံၣ်န့ၣ် ကလုာ်ဒူၣ်တဖၣ် အဘၢၣ်စၢၤ တၢ်သဘံၣ်ဘုၣ်, တၢ်ဖ့ၣ်ဆၢဒိၣ်ထီၣ် ဆူၣ်ထီၣ် ဒီးဖဲတၢ်မၤသံ မၤဝီတၢ်တမံၤမံၤ မ့ၢ်မၤအသးန့ၣ် ပှၤလၢအမၤသံတၢ် အဟံၣ်ဖိဃီဖိတဂၤဂၤ ဘၣ်တူၢ်သံအသး လၢတၢ်ဟ့ၣ်ကၣ်တၢ်အဂီၢ်န့ၣ်လီၤ.
ဘၣ်ဆၣ် ဖဲ ၂၀၁၆ နံၣ် အတိခိၣ် အကတီၢ်ပူၤန့ၣ် တၢ်မၤအသးလီၤဆီ, လီၤကမၢကမၣ် ဟဲအိၣ်ထီၣ်ဝဲတမံၤန့ၣ်လီၤ. ပှၤအၣ်ရူကၣ်ဖိတဖၣ် ဃုထံၣ်န့ၢ် ကစၢ်ယွၤခီဖျိ တၢ်ထုကဖၣ်, ပိာ်ထွဲထီၣ်အသးလၢ ပှၤဂီၢ်မုၢ် ပီၢ်ယၢ်လီၤက့ၤအသး, ဝံၤအလီၢ်ခံ ကမျၢၢ်ပှၤဂီၢ်မုၢ် ဒိးစူၢ်ဒိးဘျၢအသးလၢ ထံတဖၣ်အံၤ မ့ၢ်တၢ်မူထီၣ်ဂဲၤထီၣ်တဖၣ် စးထီၣ် အိၣ်ထီၣ်ဝဲဒၣ် လၢဝ့ၢ်အံၤန့ၣ်လီၤ. ပှၤဂီၢ်မုၢ်တဖၣ် သးခုသးမုာ်ဒိၣ်မးအဃိ ဂဲၤကလံၣ်လၢ ကျဲမုၢ်တဖၣ်, ဒီးလၢတၢ်ဟ့ၣ်ကၣ်က့ၤတၢ်အလီၢ်န့ၣ် ဒူၣ်ဖိထၢဖိ လၢအဘၣ်တၢ်မၤသံအီၤတဖၣ်န့ၣ် ပျၢ်ကွံာ် ကလုာ်ဒူၣ်ဖိတဖၣ် လၢအမၤသံတၢ်န့ၣ်လီၤ. တယံာ်ဘၣ်ဒီး မုၢ်အိၣ်ဘှံးနံၤ ကိးနွံဒဲးန့ၣ် ဝ့ၢ်ဖိလၢပှၤကညီနီၢ်ဂံၢ် အိၣ်ဝဲ ၁,၃၀၀ န့ၣ် ပှၤဟဲထီၣ်ဘါယွၤလၢ သရိာ်စိၤမိၤ အိၣ်ဝဲ အဂၤ ၁,၀၀၀ န့ၣ်လီၤ.
လံာ်စီဆှံအပူၤ တၢ်မူထီၣ်ဂဲၤထီၣ် ဒ်သိးအံၤန့ၣ် ပကထံၣ်ဘၣ်လၢ ၂ ကွဲး ၃၀ ပာ်ဖျါဝဲ ဖဲ စီၤပၤဃံးစကံယၤ အမုၢ်နံၤန့ၣ် ပှၤဂီၢ်မုၢ်တဖၣ် လၢတၢ်သူၣ်ခုသးခုအပူၤ ဟဲက့ၤကဒါက့ၤဆူ ယွၤအအိၣ်ဒီး မၤ ၂:၃၈-၄၇ ပာ်ဖျါဝဲလၢ ဘူၣ်ယဲၢ်ဆံအမုၢ်နံၤန့ၣ် ပှၤကညီတဖၣ် လၢအကထိန့ၣ် ပီၢ်ယၢ်လီၤက့ၤအသးန့ၣ်လီၤ. တၢ်မူထီၣ်ဂဲၤထီၣ်တၢ်န့ၣ် မ့ၢ်ယွၤအတၢ်မၤဒီး ဘၣ်တၢ်မၤအီၤ လၢကစၢ်ယွၤ အဆၢကတီၢ်ဒီး တၢ်စံၣ်စိၤတဲစိၤ စံးဘၣ်ပှၤလၢ တချုးတၢ်မူထီၣ်ဂဲၤထီၣ်မၤအသးန့ၣ် တၢ်ထုကဖၣ် ကဘၣ်ဟဲဆိဝဲဒၣ်န့ၣ်လီၤ. ၂ ကွဲး ၇:၁၄ အပူၤ ကစၢ်ယွၤစံးဘၣ် စီၤပၤရှလိၤမိၤ လၢ “ယပှၤဂီၢ်မုၢ်… မ့ၢ်ဆီၣ်လီၤအသးဒီးဘါထုကဖၣ်တၢ်ဒီး ဃုယမဲာ်ဒီး ဃၣ်ကဒါက့ၤအသးလၢ အကျဲအၢအအိၣ်ဒီး…. ပျၢ်အတၢ်ဒဲးဘးဒီး မၤဘျါက့ၤ အထံအကီၢ်လီၤ”န့ၣ်လီၤ.
ပှၤအၣ်ရူကၣ်ဖိတဖၣ် ဃုထံၣ်သ့ၣ်ညါဝဲဒၣ် လၢတၢ်မူထီၣ်ဂဲၤထီၣ် ဟဲစိာ်န့ၢ် တၢ်သးခုဒီး တၢ်ဘၣ်လိၣ်ဖိးဒ့သးတဖၣ် ဆူဝ့ၢ်တဖျၢၣ်အံၤန့ၣ်လီၤ. ပခူပဝ့ၢ်တဖၣ်စ့ၢ်ကီး မ့ၢ် အလိၣ်ဘၣ် တၢ်ဆီတလဲဖးဒိၣ်ဒ်သိးအံၤ ထဲလဲၣ်ညါလဲၣ်. ပၢ်ယွၤဧၢ, ဟဲစိာ်န့ၢ်ဘၣ် ပှၤ တၢ်မူထီၣ်ဂဲၤထီၣ်ဆူ ပအိၣ်န့ၣ်တက့ၤ.
