ဖဲဒီရံး(စ)ခံ(စ)ကူးဝ့ (Doris Kearns Goodwin)ဆၢတဲာ်လၢ ကကွဲးလံာ်တဘ့ၣ်လၢ အဘၣ်ထွဲဒီး အၤဘြၣ်ဟၣ် လ့ကၢၣ်(Abraham Lincoln), တၢ်ဂ့ၢ်လၢအအိၣ်အသး တခီမ့ၢ် လံာ်အဘ့ၣ်လၢ အဘၣ်ထွဲဒီး အမဲရကၣ်ကီၢ်ခိၣ်တဆံဃုဂၤတဂၤ အဂ့ၢ်အံၤ, ဘၣ်တၢ်ကွဲးတ့ၢ်လံအီၤလၢ လံာ်အဘ့ၣ် တကလးလွံၢ်ကထိ ဒီးတၢ်အံၤ ကဲထီၣ်တၢ်သးအံၣ်သးဆံး လၢအဝဲအဂီၢ် လၢကကွဲး ကီၢ်ခိၣ်အံၤအဂ့ၢ်န့ၣ်လီၤ. မ့ၢ်တၢ်ဂ့ၢ်မနုၤ ကအိၣ်တ့ၢ်ဒံးလၢ ကီၢ်ခိၣ်လၢ အဘၣ်တၢ်အဲၣ်အီၤတဂၤန့ၣ်လဲၣ်. ဘၣ်ဆၣ်တၢ်ကီမနုၤတမံၤမးတြီဆၢအီၤတန့ၢ်ဘၣ်, ဒီး ကူးဝ့ အတၢ်မၤအံၤကဲထီၣ်လိၣ်ထီၣ်ဝဲ ဒီးအဝဲကွဲးလံာ်လၢ အမ့ၢ်လၢ “ကရူၢ်ဖိတဖု လၢအပြၢလိာ်သးတဖၣ်,အၤဘြၣ်ဟၣ် လ့ကၢၣ် လၢအမ့ၢ်ပှၤဖျိးစိလၢ ထံဂ့ၢ်ကီၢ်ဂ့ၢ်” န့ၣ်လီၤ. အဝဲအတၢ်ထံၣ်သီသံၣ်ဘှဲလၢ လ့ကၢၣ်အတၢ်ကဲခိၣ်ကဲနၢ်, ကဲထီၣ်လံာ်တဘ့ၣ် လၢအဖျိးစိကတၢၢ် ဒီးဘၣ် တၢ်ကွၢ်ကဒါက့ၤ အအါကတၢၢ်န့ၣ်လီၤ.

ပှၤတၢ်မၢဖိစီၤယိၤဟၣ် ကွၢ်ဆၢၣ်မဲာ်ဘၣ် တၢ်လၢအတၤအီၤလၢ အလီၤဆီတမံၤ ဖဲအဝဲကွဲး ကစၢ်ယ့ၣ်ရှူးအတၢ်တူၢ်ဘၣ်ခီၣ်ဘၣ် ဒီးတၢ်သံအဂ့ၢ်န့ၣ်လီၤ. အဝဲအတၢ်ကွဲး အဆၢဖိ အကတၢၢ်တဆၢ ပာ်ဖျါထီၣ်လၢ “တၢ်အဂုၤအဂၤ လၢယ့ၣ်ရှူးမၤဝဲန့ၣ် အိၣ်စ့ၢ်ကီးအါမံၤလီၤ. ဒီးကယဲၢ်တၢ်တဖၣ်န့ၣ်, မ့ၢ်ဘၣ်ကွဲးအသးကိးမံၤဒဲး ဒီးယဆိကမိၣ်လၢ လံာ်လၢ အကဘၣ် ကွဲးအသးန့ၣ် ဟီၣ်ခိၣ်တတြီၢ်ဘၣ်ဝဲဘၣ်” (ယိၤ ၂၁:၂၅). စီၤယိၤဟၣ်အိၣ်ဒီး တၢ်ဂ့ၢ်အါန့ၢ်ဒံးတၢ်လၢ အဝဲကွဲးဖျါထီၣ်ဝဲတဖၣ်န့ၣ်လီၤ.

လၢတၢ်အံၤအဃိ, အဝဲအတၢ်စူးကါကျဲကူၣ်နၢၤ မ့ၢ် ဒ်သိးကပညိၣ်တၢ်ထဲတမံၤဧိၤ လၢတၢ်ကလီၢ်ဖျါထီၣ် တၢ်လီၤလး လၢကစၢ်ယ့ၣ်ရှူး မၤဝဲစှၤမံၤလၢအဆီၣ်ထွဲ ကစၢ်ယ့ၣ်ရှူး, လၢအတဲဖျါထီၣ် တၢ်ကတိၤလၢ “ယဲဒၣ်”, “ယၤ” လၢအဝဲအတၢ်ကွဲးဒီတခါအပူၤ န့ၣ်လီၤ. လၢကျဲကူၣ်နၢၤ အဝဲအံၤအလီၢ်ခံအံၤ မ့ၢ်, တၢ်တိာ်အထူအယိာ်လၢအမ့ၢ်, “ယ့ၣ်ရှူးမ့ၢ်ခရံာ်, ယွၤအဖိခွါဒီး, ဒ်သိးသုကန့ၢ်ဘၣ် တၢ်မူလၢအမံၤဒီး တၢ်အံၤတဖၣ် ဘၣ်ကွဲးအသးလီၤ” (:၃၁). တၢ်မၤအသးနီၢ်နီၢ် တၢ်အုၣ်သးအပနီၣ် လၢအအိၣ်ဝဲအါအါဂီၢ်ဂီၢ်အကျါ စီၤယိၤဟၣ် ဒုးနဲၣ် တၢ်ဂ့ၢ်တၢ်ပီၢ် လၢဘၣ်မနုၤပကြၢးစူၢ်နာ် ကစၢ်ယ့ၣ်ရှူးန့ၣ်လဲၣ်န့ၣ်လီၤ. တနံၤအံၤ, မ့ၢ်နကတဲမတၤလၢ အဝဲအဂ့ၢ်အကျိၤန့ၣ်လဲၣ်.