ဖဲ ၁၉၆၉ နံၣ် လါယူၤလံ အသီ ၂၀ န့ၣ် န့(လ)အဲ(မ)စတြီ (Neil Armstrong) ဒီးဘး(စ)အီဒရ့ၣ်(Buzz Aldrin) ယီၢ်လီၤ လါအမဲာ်ဖံးခိၣ်ဒီး ကဲထီၣ်ပှၤအဆိကတၢၢ်တဖၣ် လၢအဟးဘၣ်လၢ လါအမဲာ်ဖံးခိၣ်လိၤလီၤ. ဘၣ်ဆၣ် တလီၢ်လီၢ် ပတဆိကမိၣ် ပှၤအဂၤတဂၤလၢ အပာ်ဃုာ်လၢကရူၢ်ဖိအံၤအပူၤ, လၢအမ့ၢ် မဲၣ်ကၢၣ် ခီလ့(စ) (Michael Collins) လၢ အနီၣ် အပိၣ်လိၣ် ၁၁ (Apollo 11) အံၤန့ၣ်ဘၣ်.
ဖဲအတံၤသကိးတဖၣ် စံၣ်လီၤလၢ ကယီၢ်လီၤ လါအမဲာ်ဖံးခိၣ်, ခီလ့(စ) တဂၤ အိၣ်ခိးတၢ်လၢ တၢ်လီၢ်အဂၤတတီၤ လၢလါအပူၤ, ထဲတဂၤဧိၤန့ၣ်လီၤ. တၢ်ဆဲးကျိးဆဲးကျၢလိာ်သး လၢအတံၤသကိးလၢအမ့ၢ် န့(လ) ဒီးဘး(စ), ဃုာ်ဒီး ပှၤဟီၣ်ခိၣ်ဖိတဖၣ် တအိၣ်ဘၣ်. နၣ်စၣ် မံးရှၢၣ် (NASA’s mission) ပာ်ဖျါထီၣ်တၢ်ထံၣ်ဒီးစံး “ဒ်စီၤအၤဒၣ် အိၣ်သယုၢ်သညိအသိး ပတထံၣ် ပှၤနီတဂၤ ဒ်မဲးခီလ့(စ) လၢအိၣ်သယုၢ်ဘၣ်ထဲတဂၤဧိၤန့ၣ်ဘၣ်”န့ၣ်လီၤ.
တၢ်အကတီၢ်တဖၣ်အိၣ်ဝဲလၢ ပကလၢၢ်ဘၣ် လၢပအိၣ်ဘၣ်လၢ တၢ်အိၣ်သယုၢ်ဘၣ်ထဲတဂၤဧိၤန့ၣ်လီၤ. အဒိ, ဆိကမိၣ်ကွၢ် စီၤယိၤသး, လၢအမ့ၢ် စီၤယၤကိာ် အဖိခွါ, ကကလၢၢ်ဘၣ် တၢ်မနုၤ ဖဲအဘၣ်တၢ်စိာ်ကွံာ်အီၤဆူ ကီၢ်အဲၤကူပတူး ဖဲအဝဲၢ်ခွါတဖၣ် ဆါကွံာ်အီၤအလီၢ်ခံတက့ၢ် (၁ မိၤရှ့ ၃၇:၂၃-၂၈). ဝံၤအလီၢ်ခံ, အဝဲဘၣ်တၢ်ဆီၣ်ကွံာ်အီၤ သတူာ်ကလာ် ဆူတၢ်ကအိၣ်ဘၣ်ထဲတဂၤဧိၤ တၢ်တ့ၢ်နုာ်အီၤလၢဃိာ်ပူၤ, လၢအမ့ၢ် တၢ်စွဲသရူးကမၣ်အီၤ အဃိန့ၣ်လီၤ (၃၉:၁၉-၂၀).
မ့ၢ်စီၤယိၤသးမူဝဲသ့လၢ ထံတဘ့ၣ်ကီၢ်တဘ့ၣ်အဃိာ်ပူၤ, လၢအတအိၣ်ဒီး အဟံၣ်ဖိဃီဖိ လၢအအိၣ်ဘူးဒီးအီၤဒ်လဲၣ်. “ဒီးယွၤအိၣ်ဒီးစီၤယိၤသး ဒီးမၤအီၤလၢ အဘျုးအဖှိၣ်…”န့ၣ်လီၤ (:၂၀-၂၁). ပဘၣ်တၢ်ဒုးသ့ၣ်နီၣ်ထီၣ် ပှၤလွံၢ်ဘျီ, လၢအဘၣ်ထွဲဒီး တၢ်မ့ၢ်တၢ်တီ လၢအမၤမုာ်ထီၣ်က့ၤသး ဖဲ ၁ မိၤရှ့ ၃၉ အပူၤ န့ၣ်လီၤ.
မ့ၢ်နကလၢၢ်ဘၣ် တၢ်အိၣ်သယုၢ် မ့တမ့ၢ် တၢ်အိၣ်ဘၣ်ထဲတဂၤဧိၤ လၢအယံၤဘၣ်ဒီး ပှၤဂုၤပှၤဂၤန့ၣ်ဧါ. ဟံးဃာ် တၢ်မ့ၢ်တၢ်တီ လၢယွၤအိၣ်ဒီးနၤ ဒီးအတၢ်အၢၣ်လီၤ ဟဲခီဖျိ လၢကစၢ်ယ့ၣ်ရှူးအကစၢ်ဒၣ်ဝဲ, လၢအစံး “ယအိၣ်ဒီးသု ကိးမုၢ်နံၤမုၢ်နၤဒဲး”န့ၣ်လီၤ (မး ၂၈:၂၀). မ့မ့ၢ်လၢကစၢ်ယ့ၣ်ရှူး လၢအမ့ၢ်နပှၤအုၣ်က့ၤခီၣ်က့ၤတၢ် နတအိၣ်သယုၢ်ဘၣ်ထဲတဂၤဧိၤ နီတစုဘၣ်.
