ဖဲလၢပှၤသူၣ်ဝံၣ်သးဆၢတၢ်ဖိတဖၣ် ဒ့သးဝံၣ် “ထဲဒၣ် ထံၣ်မှံယဲသ့-I Can Only Imagine” တၢ်သးဝံၣ်အဆၢကတီၢ်, ယဆ့ၣ်နီၤလၢ ပိာ်မုၣ်တဂၤ အလီၢ်ခံလၢ တၢ်ဘါသရိာ်အလီၢ်ဆ့ၣ်နီၤဖးထီအလိၤန့ၣ်လီၤ. ယူာ်ထီၣ်ယစုဒီး ယသးဝံၣ်စံးထီၣ်ပတြၢၤ ကစၢ်ယွၤအဆၢကတီၢ် ပိာ်မုၣ်လၢ ယမဲာ်ညါသးဝံၣ်ဝဲ စပရဲနိၣ်(soprano)လၢ အကလုၢ်မုာ်မုာ်ဖိန့ၣ် ဖိးမံလိာ်သးဒီး ယသးဝံၣ်တၢ်န့ၣ်လီၤ. ဖဲအဝဲစံးဘၣ်ယၤလၢ အဘၣ်ဂဲၤလိာ်ဝဲဒၣ်ဒီးအတၢ်အိၣ်ဆူၣ် အိၣ်ချ့အတၢ်ဂ့ၢ်ကီဝံၤ, ပပာ်လီၤပသးလၢ ပကဃ့ထုကဖၣ်သကိး တၢ်လၢအဂီၢ်, လၢအကဘၣ်လဲၤဒိး ကူစါယါဘျါ လၢခံတဘျီ, လၢခဲစၢၣ်(cancer)တၢ်ဆါအဂီၢ်န့ၣ်လီၤ.
စှၤလါပူၤကွံာ်အလီၢ်ခံ လူဝံးစံးဘၣ်ယၤ, ပျံၤဝဲဒၣ်လၢ အကဘၣ်သံဝဲန့ၣ်လီၤ. ယသကူးလီၤယသး ဆူအခး လၢမံဝဲဒၣ်, ယသုးဘူး ယသးဆူ အနၢ်ကပၤဒီး ဃ့ထုကဖၣ် ကသွံဒံဖိဒီး သးဝံၣ် ပတၢ်သးဝံၣ် ကဖီကဖီဖိန့ၣ်လီၤ. လၢစှၤသီအကတီၢ် မ့ၢ်လဲၤပူၤကွံာ်ဝံၤဒီး ဖဲလၢလူဝံးဘူၣ်ထီၣ်ဘါထီၣ် ကစၢ်ယ့ၣ်ရှူး လၢမဲာ်သကိးမဲာ်အဆၢကတီၢ်, တၢ်ကမၤအသးလၢအဂီၢ်, ကမ့ၢ်တၢ်ဒ်လဲၣ်န့ၣ် မ့ၢ်တၢ်ထဲလၢ ယထံၣ်မှံယဲသ့န့ၣ်လီၤ.
၂ ကရံၣ်သူး ၅:၁ အပူၤ ပှၤတၢ်မၢဖိစီၤပီလူးဟ့ၣ်ထီၣ် တၢ်မၤမုာ်, တၢ်အုၣ်ကီၤလၢ အပှၤဖးလံာ်ဖိတဖၣ်အဂီၢ်, လၢအဘၣ်ကွၢ်ဆၢၣ်မဲာ်ဒီး တၢ်သံတၢ်ပှၢ်န့ၣ်လီၤ. တၢ်မူအထူအယိာ်ဝာ်ဘးခီ လၢအမ့ၢ်တၢ်အိၣ်မူ ဖဲဟီၣ်ခိၣ်အံၤတကပၤန့ၣ် တၢ်နးတၢ်ဖှီၣ်လၢအဒုးကဲထီၣ် တၢ်ကအုကစွါ မ့ၢ်အိၣ်ဘၣ်ဆၣ် အဆၢဖိ ၂-၄ စံးဝဲဒၣ်လၢ ပနီၢ်သက့ၤကျၢၤဝဲလၢထး, တၢ်လၢအမ့ၢ် ပကအိၣ်မူလီၤထူလီၤယိာ် ဒီးကစၢ်ယ့ၣ်ရှူးအဃိန့ၣ်လီၤ. အဆၢဖိ ၅-၆ စံးဘၣ်ပှၤန့ၣ် ကစၢ်ယွၤတ့လီၤပှၤ ဒ်သိးပကဆၢမုၢ်လၢ် အိၣ်မူလီၤထူလီၤယိာ် ဒီးအီၤဘၣ်ဆၣ် အဆၢဖိ ၇-၁၀ ပာ်ဖျါဝဲလၢ အတၢ်အၢၣ်လီၤတဖၣ်န့ၣ် ကဘၣ်ကဲဘျုးဝဲဒၣ်လၢ ခ့ခါဆၢကတီၢ် ပတၢ်အိၣ်မူကျဲအကျိၤအကွၢ်လၢ အဂီၢ်န့ၣ်လီၤ.
ဖဲပဆိးသီကွၢ်လၢ် ကစၢ်ယ့ၣ်ရှူးအတၢ်ဟဲက့ၤကဒါက့ၤ မ့တမ့ၢ်ဘၣ်ဒီး ကကိးက့ၤ ပှၤဆူဟံၣ်အဆၢကတီၢ်, ပမ့ၢ်အိၣ်မူအိၣ်ဂဲၤ ဒ်တၢ်ဘၣ်ကစၢ်ယ့ၣ်ရှူးအသးန့ၣ်ဒီး ပမုာ်လၤ သးခုသ့ဝဲဒၣ်လၢ သးအတၢ်မုာ်တၢ်ပၢၤဘၣ်ထွဲဒီး ကစၢ်ယွၤအိၣ်ဒီးပှၤ တပယူာ်ဃီအပူၤန့ၣ်လီၤ. အကတီၢ်ဖဲလၢ ပပာ်တ့ၢ်ကွံာ်ပဒဲဟီၣ်ခိၣ်ဝံၤ ပလဲၤပာ်ဖှိၣ်ထီၣ် ပသးလၢ ကစၢ်ယ့ၣ်ရှူး လၢတၢ်မူအထူအယိာ်န့ၣ် မ့ၢ်တၢ်ကမၤအသး ဒ်လဲၣ်န့ၣ် အိၣ်ဒၣ်ထဲ ပထံၣ်မှံ ဆိကမိၣ်ထီၣ်သ့ဝဲဒၣ်န့ၣ်လီၤ.
