ဖဲ ၂ဝ၁၉ နံၣ်န့ၣ် ပှၤဃုထံၣ်သ့ၣ်ညါတၢ်တဖၣ် ဃုထံၣ်သ့ၣ်ညါဝဲဘၣ်ဃး ပှၤစူၢ်နာ်ကစၢ်ယ့ၣ်ရှူးတဖၣ် အ“နီၢ်သးအတၢ်န့ၢ်သါ”အဂ့ၢ် ဖဲကီၢ်အမဲရကၤ (US) အပူၤ ပာ်ဖျါဝဲလၢ မိၢ်တဖၣ်ဒီးဖံတဖၣ်န့ၣ် အိၣ်ဒီးတၢ်စိကမီၤဒိၣ်ဘၢဖျိဖျိဖျါဖျါ လၢဖိလံၤတဖၣ် နီၢ်သးအတၢ်ဒိၣ်ထီၣ်အဂီၢ်လီၤ. ပှၤလၢအတဲဖျါလီၤက့ၤအတၢ်စူၢ်တၢ်နာ် တၢ်ဟ့ၣ်သါသၢပူခံပူဃၣ်ဃၣ်, ပာ်လၤပာ်ကပီၤအမိၢ်တဖၣ်, ဒီးသၢပူတပူတခီ အၢၣ်လီၤဝဲလၢ ဖံဖုတဖၣ်စ့ၢ်ကီး မၤဝဲအဂ့ၤကတၢၢ်လီၤ.
အဲးဒံးထၢၣ်အတၢ်ပာ်ဖျါမၤနီၣ်ဝဲလၢ “တဘျီဝံၤတဘျီ တၢ်မၤလိအံၤ တဲသ့ၣ်ညါဝဲလၢ မိၢ်တဖၣ် အဘျုးလၢအိၣ်ဂၢၢ်ဆိးကျၢၤလၢ နီၢ်သးအတၢ်ဒိၣ်ထီၣ်ထီထီၣ်အဂီၢ်လီၤ”. တၢ်ကဲဘျုးဒ်သိးအံၤ ပထံၣ်ဘၣ်လၢ ယွၤအကလုၢ်ကထါအပူၤစ့ၢ်ကီးလီၤ.
ဖဲစီၤပီလူးအလံာ်ပရၢဆူ အပျဲၢ်စီၤတံၤမသ့းအဂီၢ် ၂ တံၤ ၁:၅ အပူၤ စီၤပီလူးအၢၣ်လီၤဝဲ လၢစီၤတံၤမသ့းအတၢ်စူၢ်တၢ်နာ်န့ၣ် ဘၣ်တၢ်သူၣ်လီၤန့ၢ်အီၤလၢ အဖံနီၢ်လိၤအ့ၣ်ဒီး အမိၢ်နီၢ်အူၤနံက့ၤန့ၣ်လီၤ. တၢ်ဂ့ၢ်အံၤ မ့ၢ်စီၤပီလူး အနီၢ်ကစၢ်လၢ တၢ်မုာ်လၤသးခုဒိၣ်ဒိၣ်အပူၤ ပာ်ဖျါ ပိာ်မုၣ်ခံဂၤလီၤတံၢ်လီၤဆဲး လၢအကဲဘျုးလၢ တၢ်အိၣ်ဖှိၣ် အဆိကတၢၢ် အခိၣ်နၢ်တဂၤအလိၤန့ၣ်လီၤ. ပိာ်မုၣ်ခံဂၤအတၢ်လုၣ်ဘၢအံၤ ပထံၣ်ဘၣ်စ့ၢ်ကီးလၢ စီၤပီလူးကတိၤသဆၣ်ထီၣ် စီၤတံၤမသ့း လၢ ၂ တံၤ ၃: ၁၄-၁၅ အပူၤ “အိၣ်နဲဆိးနဲလၢ တၢ်လၢနမၤလိအီၤႇ လၢနသ့ၣ်ညါလၢအမ့ၢ် အမ့ၢ်အတီတဖၣ်အပူၤတက့ၢ်”.
နီၢ်သးအတၢ်န့ၢ်သါလၢ ဂံၢ်ဆူၣ်အံၤ မ့ၢ်တၢ်ဟ့ၣ်လၢအလုၢ်ပှ့ၤဒိၣ်တမံၤန့ၣ်လီၤ. ပဘၣ်တၢ်ကွၢ်ထွဲလုၢ်ဒိၣ်ထီၣ်ပှၤအဆၢကတီၢ် တၢ်လုၢ်ဘၢအဂ့ၤတကလုာ် လၢဒုးအိၣ်ထီၣ် စီၤတံၤမသ့းအတၢ်စူၢ်တၢ်နာ်တကလုာ် မ့ၢ်တအိၣ်ဒီးပှၤသနာ်က့, တၢ်ဂ့ၢ်အဂုၤအဂၤလၢအကဲဘျုးမၤဒိၣ်မၤယိာ် ဒီးမၤစၢၤတၢ်ဘှီဂ့ၤပနီၢ်သးအတၢ်ဒိၣ်ထီၣ်အဂီၢ် အိၣ်ဝဲဒၣ်န့ၣ်လီၤ. တၢ်အကါဒိၣ်ကတၢၢ်န့ၣ် ပဝဲခဲလၢာ် ပအိၣ်ဒီးတၢ်ခွဲးတၢ်ယာ်လၢ ပကဒုးနဲၣ်ဒိပတၢ်နာ်အမ့ၢ်အတီ ဆူပှၤလၢပခိၣ်ပဃၢၤဝးဝး ဒီးပာ်လီၤတဲာ်တ့ၢ် တၢ်ဟ့ၣ်သါလၢ အအိၣ်စံာ်အိၣ်ကျၢၤန့ၣ်လီၤ.
