ယဘၣ်တၢ်ကူစါယၤဘျါယသး အါထီၣ်ကဒီးလၢခံတနွံဝံၤအလီၢ်ခံ, ယဆ့ၣ်နီၤလီၤပြုၤကလာ်လၢလီၢ်ဆ့ၣ်နီၤကပုာ်အလိၤန့ၣ်လီၤ. ယတအဲၣ်ဒိးဆိကမိၣ် တၢ်ဂ့ၢ်နီတမံၤလၢၤဘၣ်. ယတအဲၣ်ဒိးကတိၤတၢ်ဒီး ပှၤနီတဂၤလၢၤဘၣ်. ယဘါထုကဖၣ်ဒၣ်လဲာ် တကဲလၢၤဘၣ်. တၢ်သူၣ်ဟးဂီၤသးဟးဂီၤ ဒီးတၢ်သးဒ့ဒီ ထုးဃၢယၤလီၤ. ယအိးထီၣ်ကွၢ် ကွဲၤထံၣ်ဟူ ဒီးစးထီၣ်ကွၢ် တၢ်ဘိးဘၣ်ရၤလီၤတခါ လၢအဒုးနဲၣ်ဖိသၣ်မုၣ်ဖိတဂၤ ကတိၤတၢ်ဒီး အပုၢ်ပိာ်ခွါဖိတဂၤန့ၣ်လီၤ. အဝဲဒၣ်စံးဘၣ်အီၤ “နမ့ၢ်ပှၤနၢၤတၢ်စဲၣ်နီၤတဂၤလီၤ”. အဝဲၢ်မုၢ် ဟ့ၣ်ဂံၢ်ဟ့ၣ်ဘါအီၤ သပှၢ်ပှၢ်, ဒီးအပုၢ်ဖိနံၤကမှံထီၣ် အမဲအ့ခီလီၤ. ယဲစ့ၢ်ကီး ယနံၤကမှံထီၣ်လီၤ.
ယွၤအပှၤဂီၢ်မုၢ်တဖၣ် ထီဘိဘၣ်ကနိလိာ်သးဒီး တၢ်သးဟးဂီၤဒီးတၢ်သးဒ့ဒီန့ၣ်လီၤ. လၢဧ့ၤဘြံၤ ၃:၇-၁၁ အပူၤ, ပှၤကွဲးလံာ်ဧ့ၤဘြံၤကတိၤဒိးက့ၤ စံးထီၣ်ပတြၢၤ ၉၅, လၢအစံးဂၢၢ်စံးကျၢၤလၢယွၤအကလုၢ်န့ၣ် ဘၣ်တၢ်နၢ်ဟူအီၤသ့ ခီဖျိသးမုာ်စီဆှံ, ဒီးဟ့ၣ်ပလီၢ် ပှၤစူၢ်က့ၤနာ်က့ၤတၢ်လၢ ကစၢ်ယ့ၣ်ရှူးအပူၤတဖၣ် လၢကဟးဆှဲးတၢ်ကမၣ်တဖၣ်လၢပှၤအံၣ်စရ့လးဖိတဖၣ် မၤဘၣ်ဝဲ ဖဲအဟးဝ့ၤဝီၤ လၢပှၢ်မုၢ်ကနၢအခါန့ၣ်လီၤ. ဧ့ၤဘြံၤ ၃:၁၂-၁၃ အပူၤစ့ၢ်ကီး အဝဲကွဲးဝဲဒၣ် “ဒီပုၢ်ဝဲၢ်သ့ၣ်ဧၢ, ပလီၢ်သုသးတက့ၢ်. ဒ်သိး သးဒ့ဒီအအၢအသီ သုတအိၣ်လၢ သုဝဲတဂၤဂၤအပူၤ, လၢသုကဟးထီၣ်ကွံာ်လၢယွၤလၢအမူဝဲအပူၤတဂ့ၤ. မ့မ့ၢ် သဆၣ်ထီၣ်လိာ်သုခံကိးမုၢ်နံၤ”တက့ၢ် န့ၣ်လီၤ .
ဧ့ၤဘြံၤ ၃:၁၃ ပာ်ဖျါဝဲ ပတၢ်မုၢ်လၢ်အပျံၤမူန့ၣ် ဘၣ်တၢ်စၢကျၢၤဃာ်လံလၢ ခရံာ်အပူၤသတးဒီး, ပအိၣ်ဒီး စိကမီၤလၢလၢပှဲၤပှဲၤ လၢပလိၣ်ဘၣ် ဒ်သိး ပကလဲၤတၢ်သပှၢ်ပှၢ်အဂီၢ်, ဒီးအန့ၣ်မ့ၢ်ဝဲ တၢ်သဆၣ်ထီၣ်လိာ်သးကဒဲကဒဲ လၢပှၤစူၢ်က့ၤနာ်က့ၤတၢ်ဖိတဖၣ် အတၢ်ရ့လိာ်မုာ်လိာ်အပူၤန့ၣ်လီၤ. ဖဲပှၤစူၢ်က့ၤနာ်က့ၤတၢ်တဂၤ သးဒ့ဒီဝဲအခါ, ပှၤစူၢ်က့ၤနာ်က့ၤတၢ်အဂၤတဖၣ် ဟ့ၣ်ထီၣ်တၢ်, မၤဂၢၢ်မၤကျၢၤအီၤ ဒီးတၢ်နာ်န့ၢ်အီၤသ့ဝဲလီၤ. ဒ်ယွၤမၤဆူၣ်ထီၣ်ပဂံၢ်ပဘါအသိး, ပဝဲလၢအမ့ၢ်ယွၤအပှၤဂီၢ်မုၢ်တဖၣ် ဟ့ၣ်သဆၣ်ထီၣ်လိာ်သးအတၢ်စိတၢ်ကမီၤ ဆူတဂၤဒီးတဂၤ အအိၣ်သ့ဝဲန့ၣ်လီၤ.
