ပတမၤန့ၢ်ပဖိ အိၣ်အနံၣ်(၁၀)ဝံၤအလီၢ်ခံ ဖဲ(၂၀၁၁)နံၣ်န့ၣ်, ယမါဒီးယၤ ပဃုထၢလၢ ပကစးထီၣ်ကဒီးတၢ်လဲၤအသီ လၢထံကီၢ်အသီတဘ့ၣ်န့ၣ်လီၤ. တၢ်သုးလီၢ်သုးကျဲမ့ၢ် တၢ်လီၤသူၣ်ပိၢ်သးဝးဘၣ်ဆၣ်, ယဘၣ်ဟးထီၣ်ကွံာ်လၢ ယတၢ်လုၢ်အီၣ် သးသမူတၢ်ဖံးတၢ်မၤ လၢအမ့ၢ်တၢ်ဘိးဘၣ်ရၤလီၤ, ဒီးယသးသယုၢ်ဘၣ်က့ၤ တၢ်မၤအံၤန့ၣ်လီၤ. တၢ်မၤအသး ဒ်ယကျဲဟါမၢ်, ဒီးယဃ့တၢ်ဟ့ၣ်ကူၣ်လၢ ယသကိးလံၣ်ယၢၣ် (Liam) အအိၣ်န့ၣ်လီၤ.

လၢတၢ်သးအုးဒီး တၢ်သးဟးဂီၤအပူၤ, ယတဲလံၣ်ယၢၣ်, ‘ယကဘၣ်မၤ တၢ်မနုၤလဲၣ်န့ၣ် ယတသ့ၣ်ညါ နီတစဲးလၢၤဘၣ်’. အဝဲသံကွၢ်ယၤ,‘နတဘိးဘၣ်ရၤလီၤ တၢ်ဖဲအံၤလၢၤဘၣ်ဧါ’ယစံးဆၢအီၤယတမၤလၢၤဘၣ်. ‘ဒီးသုနီၢ်ဒီမိၤဝၤ အတၢ်ဘၣ်ထွဲအိၣ်အသးဒ်လဲၣ်’. အတၢ်ဆီတလဲတၢ်ဂ့ၢ်ခိၣ်တီ ဒုးကမၢကမၣ်ယၤ, ဒီးယတဲဘၣ်လံၣ်ယၢၣ်လၢ မဲရ့ၣ်(Merryn) ဒီးယၤ ပအိၣ်ဘၣ်လိာ်ဘၣ်စး ဂ့ၤဂ့ၤဘၣ်ဘၣ်လီၤ. ပကွၢ်ဆၢၣ်မဲာ်တ့ၢ်ဘၣ် တၢ်သးဘၣ်ဒိတပူၤဃီ, ဘၣ်ဆၣ် ခီဖျိ တၢ်ကီတၢ်ခဲအံၤအဃိ ပအိၣ်ဘူးအါထီၣ်လိာ်သးန့ၣ်လီၤ.

အဝဲနံၤကမှံ ဒီးစံးဝဲ “တၢ်ဟ့ၣ်လီၤသးလၢာ်လၢာ်ဆ့ဆ့န့ၣ် မ့ၢ်တၢ်သးခုကစီၣ် အတၢ်သးကံၢ်လီၤ”. “အိ, ဟီၣ်ခိၣ်တဘ့ၣ်အံၤ အလီၢ်အိၣ်အါမး လၢကထံၣ်ဘၣ် ဟံၣ်ဃီလၢ အအိၣ်ဒီးတၢ်ဟ့ၣ်လီၤသးလၢာ်လၢာ်ဆ့ဆ့, ဒ်သုခံဂၤအသိး ဆံးအါလဲၣ်. ဘၣ်သ့ၣ်သ့ၣ် သုတထံၣ်သ့ၣ်ညါဘၣ်. ဘၣ်ဆၣ် အါန့ၢ်သုမၤတၢ်န့ၣ်, ခီဖျိ ထဲဒၣ်လၢ သုမ့ၢ်တၢ်လၢသုမ့ၢ်ဝဲအဃိ, သုမ့ၢ်တ့ၢ်တၢ်အသဟီၣ်လံန့ၣ်လီၤ”.

ဖဲတၢ်ဖံးတၢ်မၤအပူၤ တၢ်ကီတၢ်ခဲတမံၤ မၤသးအုး, သးဟးဂီၤ စီၤတံၤမသ့းအခါ, တၢ်မၢဖိစီၤပီလူး တဟ့ၣ်အီၤ တၢ်ဖံးတၢ်မၤအဖီတၢၣ်ဘၣ်. ၁ တံၤ ၄:၁၂-၁၃, ၁၅ အပူၤန့ၣ် အဝဲသဆၣ်ထီၣ် စီၤတံၤမသ့းလၢအကမူတၢ်အိၣ်မူ လၢအယူးယီၣ်ယွၤ, ကဲထီၣ်တၢ်အဒိ လၢတၢ်ကတိၤ, တၢ်မၤ, တၢ်အဲၣ်, တၢ်စူၢ်တၢ်နာ် ဒီးတၢ်စီဆှံန့ၣ်လီၤ. ခီဖျိအိၣ်မူအိၣ်ဂဲၤဝဲ တီတီလိၤလိၤအဃိ, အဝဲကမ့ၢ်တၢ်အသဟီၣ်လၢပှၤဂၤ အလိၤအဂ့ၤကတၢၢ်န့ၣ်လီၤ.

တၢ်ညီလၢပပာ်လုၢ်ပာ်ပှ့ၤ ပတၢ်အိၣ်မူ လၢပတၢ်ဖံးတၢ်မၤအတၢ်ကဲထီၣ်လိၣ်ထီၣ် အဖီခိၣ်န့ၣ်လီၤ. ဘၣ်ဆၣ် တၢ်အကါဒိၣ်ကတၢၢ် မ့ၢ်ပသကဲာ်ပဝးန့ၣ်လီၤ. ယသးပ့ၤနီၣ်တ့ၢ်တၢ်ဂ့ၢ်အံၤန့ၣ်လီၤ. နာ်သက့ဒီး, တၢ်ကတိၤအမ့ၢ်အတီ, တၢ်သးကညီၤအတၢ်မၤ, တၢ်ဆီဟံၣ်ဆီဃီ လၢအဟ့ၣ်လီၤသးနီၢ်နီၢ်ဒၣ်လဲာ်န့ၣ် ဟဲစိာ်န့ၢ်တၢ်ဆီတလဲဖးဒိၣ်သ့ဝဲဒီး မ့ၢ်လၢအဝဲသ့ၣ်အဃိ ယွၤအတၢ်ဂ့ၤတၢ်ဝါ ထိးဘၣ်ဟီၣ်ခိၣ်အံၤန့ၣ်လီၤ.