ဖဲလါအီးကထိဘၢၣ် တၢ်ခုၣ်ဒိၣ်တနံၤန့ၣ် ပှၤဟံၣ်တအိၣ်ဃီတအိၣ် (၅၄) ဂၤ, ဒိးန့ၢ်ဘၣ်တၢ်အီၣ်အဘိၣ် လၢပိာ်မုၣ်မၤနံၤအိၣ်ဖျဲၣ် (၅၄)နံၣ်တဂၤအအိၣ်လီၤ. တၢ်အီၣ်တဖၣ်မ့ၢ်ဝဲ ဆီညၣ်ကၣ်ဃ့ (Barbecue chicken), တဘ့လါသံသိ(green beans), စပၣ်ကၣ်တံၣ် (spaghetti), ကိၣ်ထူတလံးဘိတဖၣ်(rolls)န့ၣ်လီၤ. ပိာ်မုၣ်အံၤဒီးအတံၤသကိးတဖၣ် စံၣ်ညီၣ်တဲာ်ဝဲလၢ အနံၤအိၣ်ဖျဲၣ်အံၤန့ၣ် တလဲၤဆူ တၢ်အီၣ်အကျးလၢၤဘၣ်, အလီၢ်န့ၣ် အဝဲသ့ၣ်ဃုထၢကျဲလၢ ကဖီဒုးအီၣ်ဘၣ် ပှၤအိၣ်လၢ ခၠံၣ်ကၣ်ကိၣ်(Chicago)ကျဲလိၤတဖၣ်အဂီၢ်န့ၣ်လီၤ. လၢကမျၢၢ်တၢ်ဒုးသ့ၣ်ညါ တၢ်ကစီၣ်အပူၤန့ၣ် အဝဲဟ့ၣ်ဂံၢ်ဟ့ၣ်ဘါပှၤဂၤတဖၣ် လၢကမၤ နံၤအိၣ်ဖျဲၣ်အတၢ်ဟ့ၣ်ခီဖျိ တၢ်သးကညီၤအတၢ်မၤဆူ ပှၤဖှီၣ်ဖိယာ်ဖိတဖၣ်အဂီၢ်န့ၣ်လီၤ.
တၢ်ဂ့ၢ်ဖိအံၤ ဒုးသ့ၣ်နီၣ်ထီၣ်ယၤ ယ့ၣ်ရှူးအတၢ်ကတိၤဖဲ မးသဲ ၂၅:၄၀ အပူၤ, “ယစံးဘၣ်တဲဘၣ်သုတီတီအံၤ, သုမ့ၢ်မၤပှၤအဆံးကတၢၢ်တဂၤ လၢယဒီပုၢ်ဝဲၢ်အကျါအံၤ ဒီးမ့ၢ်သုမၤယၤလီၤ”. အဆၢဖိ ၃၃ ဒီး ၃၄ အပူၤ ဖဲအဝဲတဲဖျါထီၣ်အသိတဖၣ် ကဘၣ်တၢ်ကွဲအီၤ ဆူအဘီမုၢ်လီၤထူလီၤယိာ်အပူၤ လၢကဒိးန့ၢ်အတၢ်န့ၢ်သါဝံၤအလီၢ်ခံလီၤ အဝဲစံးကတိၤ တၢ်ကတိၤတဖၣ်အံၤန့ၣ်လီၤ(:၃၃-၃၄). အဆၢကတီၢ်ဖဲန့ၣ် ယ့ၣ်ရှူးကအၢၣ်လီၤဝဲလၢ အဝဲသ့ၣ် မ့ၢ်ပှၤလၢဒုးအီၣ်အီၤ, ဒုးကူဒုးသိးအီၤ မ့ၢ်လၢအတၢ်နာ်အမ့ၢ်အတီ လၢအဝဲဒၣ်အပူၤအဃိလီၤ (တလီၤဂာ်ဒီးတၢ်ဘူၣ်တၢ်ဘါခိၣ်နၢ်တဖၣ် လၢတနာ်အီၤန့ၣ်ဘၣ်(ကွၢ် ၂၆:၃-၅). အဆၢဖိ ၃၇ အပူၤ ပှၤအတီၤအလိၤတဖၣ် ကသံကွၢ်ဝဲလၢ မ့ၢ်ပဒုးအီၣ်နၤ, ဒုးကူဒုးသိးနၤဒ်လဲၣ်န့ၣ်လီၤ. ဒီးယ့ၣ်ရှူးကတဲလီၤတံၢ်က့ၤအဝဲသ့ၣ်လၢ တၢ်လၢသုမၤဘၣ်ပှၤဂၤတဖၣ်န့ၣ် မ့ၢ်သုမၤဘၣ်ယၤလီၤ.
တၢ်ဒုးအီၣ်ပှၤလၢအသၣ်ဝံၤတဖၣ် မ့ၢ်ကျဲတဘိလၢ ယွၤမၤစၢၤပှၤလၢ ပက ကဟုကယာ်အပှၤဂီၢ်မုၢ်လီၤ. တၢ်အံၤ မ့ၢ်ပပာ်ဖျါ ပတၢ်အဲၣ်ယွၤ ဒီးရ့ဒီးအီၤန့ၣ်လီၤ. တနံၤအံၤ မ်ယွၤကမၤစၢၤပှၤ ဒ်သိးပကမၤပှဲၤ ပှၤဂၤအတၢ်လိၣ်တဖၣ်အဂီၢ်န့ၣ်တက့ၢ
