ယမ့ၢ်ဒံးဒၣ် ပှၤသးစၢ်ဖိ ဖဲယစီၤကွၢ်တၢ်ဆူ တၢ်ဆါဟံၣ်အပဲတြီ ဒီးထံၣ်ဘၣ် ဖိသၣ်အိၣ်ဖျဲၣ်ထီၣ်သီသီ အဆိကတၢၢ်လီၤ. လၢတၢ်တပာ်သးအပူၤ ယသးဟးဂီၤလၢ ယထံၣ်ဘၣ်ဖိသၣ်ဆံးဆံးဖိ, ဖံးသွံးခီသွံး, အဆူၣ်တအိၣ် အိၣ်ဒီးအခိၣ်အဖျၢၣ်စူန့ၣ်လီၤ. ဖိသၣ်အမိၢ်ဆၢထၢၣ်ဖဲ ပကပၤဒီး, ကွၢ်ဖဲ အကမ့ၢ်ဒၣ်ဝဲ, သံကွၢ်ပှၤကိးဂၤ, လၢ“သုကွၢ် တလီၤအဲၣ်လီၤကွံဘၣ်န့ၣ်ဧါ”န့ၣ်လီၤ. ဖဲအကတီၢ်န့ၣ် ယသ့ၣ်နီၣ်ထီၣ် ယကွၢ်ဘၣ်တၢ်ဂီၤမူ ပၢ်သးစၢ်တဂၤ သးဝံၣ်တၢ်သးဝံၣ်ကဖီလီ, “နဃံလၤဒိၣ်မး” လၢအဖိမုၣ်ဖိအဂီၢ်လီၤ. ပၢ်လၢအသူၣ်မုာ်သးမုာ်ဒိၣ်နီၢ်မးတဂၤအဂီၢ်, “ဖိမုၣ်ဖိအံၤ တၢ်ဘၣ်တ့အကျါ မ့ၢ်တၢ်အဂ့ၤကတၢၢ်လၢ အဂီၢ်န့ၣ်လီၤ”.
ကစၢ်ယွၤ ကွၢ်ပှၤဒီး ထံၣ်ပှၤဒ်န့ၣ်အသိးန့ၣ်လီၤ. အ့းဖ့းစူး ၂:၁၀ စံးဝဲလၢ ပမ့ၢ် အ“တၢ်မၤလၢအတ့လီၤဝဲ” အစုအတၢ်မၤလီၤ. ဖဲပသးစဲဒၣ်ထဲလၢ ပတၢ်လီၤတူၢ်လီၤကာ်အဖီခိၣ်န့ၣ် ယွၤအဲၣ်ပှၤဒိၣ်မးန့ၣ် ကီလၢ ပကတူၢ်လိာ်အီၤ, ဒီးပလုၢ်ပပှ့ၤအိၣ်လၢအဂီၢ်ထီဘိန့ၣ် ကီခဲဒိၣ်မးလၢ ပကနာ်အီၤန့ၣ်လီၤ. ဘၣ်ဆၣ် အဆၢဖိ ၃-၄ ပာ်ဖျါဝဲ ယွၤအဲၣ်ပှၤ တမ့ၢ်လၢပကၢကီၣ်ဒီးတၢ်အဲၣ်ပှၤဘၣ်. ၁ ယိၤ ၄:၈ အပူၤ ပကထံၣ်ဘၣ် မ့ၢ်လၢ ယွၤမ့ၢ်တၢ်အဲၣ်တၢ်ကွံအဃိ အဝဲအဲၣ်ပှၤန့ၣ်လီၤ. အတၢ်အဲၣ်မ့ၢ်တၢ်ဆိၣ်ဂ့ၤအကျါတမံၤ ဒီးအဝဲဒုးနဲၣ်အတၢ်အဲၣ်အယိာ်န့ၣ် ခီဖျိယ့ၣ်ရှူးအတၢ်လုၢ်ထီၣ်အသးသမူအပူၤန့ၣ်လီၤ. ပကထံၣ်ဘၣ်လၢ အ့း ၂:၅-၈ အပူၤ“ဖဲပသံလၢ ပတၢ်ဒဲးဘးအပူၤန့ၣ် ယွၤမၤမူထီၣ်က့ၤပှၤလၢအပူၤ” န့ၣ်လီၤ.
ယွၤအတၢ်အဲၣ်တကဒံကဒါဘၣ် ဒီးအိၣ်ဂၢၢ်ဆိးကျၢၤဝဲဒၣ်န့ၣ်လီၤ. အဝဲအဲၣ် ပှၤတလၢတပှဲၤ, ပှၤသူၣ်ကၢ်သးလီၤ, ပှၤလၢအဂံၢ်စၢ်ဘါစၢ် ဒီးပှၤလၢအသးတကဆှဲတကဆှီတဖၣ်န့ၣ်လီၤ. ဖဲပလီၤဃံၤ, အဝဲအိၣ်ဖဲန့ၣ်ဒီး ဝံၣ်ဆၢထၢၣ်ပှၤလီၤ. ပမ့ၢ်အတၢ်ထူးတၢ်တီၤဒီး ပဃံလၤဒိၣ်မးလၢ ကစၢ်ယွၤအဂီၢ်န့ၣ်လီၤ.
