ဖဲယသကိးမုၣ်ကၠဲနံး(Janice)နုၥ်လီၤမၤတၢ်လၢတၢ်ဖံးတၢ်မၤလီၢ်တခါ, စှၤနံၣ်စှၤလါ အလီၢ်ခံဘၣ်တၢ်ဟ့ၣ်အီၤမူဒါ လၢအကကဲခိၣ်ကဲနၢ်သုးကျဲၤတၢ်အဃိ, အဝဲအသးဟူးဂဲၤဆူၣ်ဆူၣ်ကလဲၥ် ဒီးအိၣ်တတုၤလီၤတီၤလီၤဘၣ်န့ၣ်လီၤ. အဝဲဃ့ဘါထုကဖၣ်တၢ် ဘၣ်ဃးမူဒါတခါအံၤဒီး ကလၢၢ်ဘၣ်ဝဲလၢ ယွၤထိၣ်ဟူးထိၣ်ဂဲၤအီၤ ဒ်သိးအဝဲကတူၢ်လိၥ်ဝဲတၢ်မၤအံၤ, ဘၣ်ဆၣ်အဝဲပျံၤဝဲဒၣ်လၢ ဘၣ်သ့ၣ်သ့ၣ် မၤလၢပှဲၤအမူအဒါတဝးဘၣ်န့ၣ်လီၤ. အဝဲသံကွၢ်ဝဲယွၤ လၢ ‘ယတၢ်လဲၤခီဖျိစှၤဝဲအဃိ ယကကဲခိၣ်ကဲနၢ် တၢ်ဒ်လဲၣ်’ , ‘ယဖံးတၢ်မၤတၢ် မ့ၢ်တကဲထီၣ်လိၣ်ထီၣ်ဘၣ်န့ၣ်ဒီး ဘၣ်မနုၤနပၥ်ယၤလၢတၢ်လီၢ်အံၤလဲၣ်’.

လၢခံ ဖဲကၠဲနံးဖးဘၣ်လံၥ်စီဆှံတတီၤ ဘၣ်ဃးဒီးယွၤအတၢ်ကိးစီၤအၤဘြၣ် ဖဲ ၁ မိၤရှ့ ၁၂ န့ၣ်, သ့ၣ်ညါဘၣ်ဝဲလၢ စီၤအၤဘြၣ်အမူအဒါမ့ၢ် အကဘၣ် “လဲၤဆူတၢ်လီၢ်လၢ…ယွၤကဒုးနဲၣ်အီၤ…ဒီးစီၤအၤဘြၣ်လဲၤဝဲလီၤ”(:၁-၄). ဒီးတၢ်လဲၤအဝဲအံၤ မ့ၢ်တၢ်လၢအကါဒိၣ်နီၣ်မးန့ၣ်လီၤ. အဂ့ၢ်ဒ်လဲၣ်, လၢစိၤဖဲန့ၣ်အခါန့ၣ် ပှၤကပၥ်တ့ၢ်ကွံၥ်တၢ်စုလီၢ်ခီၣ်ခိၣ်ဒီး တၢ်အိၣ်ဒီးအီၤခဲလၢၥ်, ပၥ်တ့ၢ်တၢ်လီၢ်တၢ်ကျဲလၢအအိၣ်ဆိးတ့ၢ်ဝဲ ဒီးကဟးထီၣ်ဆူ တၢ်လီၢ်လၢအတသ့ၣ်ညါဘၣ်န့ၣ် တအိၣ်နီတဂၤဘၣ်လီၤ. ဘၣ်ဆၣ် ယွၤမၢစီၤအၤဘြၣ်နၥ်အီၤ, ခီဖျိကပၥ်တ့ၢ်တၢ်လၢအသ့ၣ်ညါတ့ၢ်ဝဲ ခဲလၢၥ်လၢလီၢ်ခံ, ဒီးယွၤကမၤတၢ်လၢစီၤအၤဘြၣ်အဂီၢ်ဆူညါန့ၣ်လီၤ. စီၤအၤဘြၣ် ‘အတၢ်မ့ၢ်တၢ်’ကမ့ၢ်ဝဲ, ‘တၢ်ကဲထီၣ်ဘၣ်ပှၤကလုၥ်ဖးဒိၣ်’ အတၢ်လိၣ်တဖၣ်ကဘၣ်‘တၢ်မၤလၢမၤပှဲၤ’ ခီဖျိယွၤအတၢ်ဆိၣ်ဂ့ၤ, ကအိၣ်ဒီး‘တၢ်မံၤဂ့ၤသၣ်ဂ့ၤ’, မံၤလၤကပီၤလၢအဒိၣ်. အဝဲကကဲထီၣ်တၢ်ဆိၣ်ဂ့ၤလၢပှၤဟီၣ်ခိၣ်ဖိခဲလၢၥ်အဂီၢ်’ မ့ၢ်ယွၤ‘တၢ်ကွၢ်စိ’န့ၣ်လီၤ. စီၤအၤဘြၣ်လၢအတၢ်လဲၤကျဲန့ၣ်မၤဘၣ်တၢ်ကမၣ်ဖးဒိၣ်တနီၤ, ဘၣ်ဆၣ် ဧ့ၤဘြံၤ၁၁:၈ပာ်ဖျါဝဲ“လၢတၢ်နၥ်စီၤအၤဘြၣ်တုၤအဘၣ်တၢ်ကိးအီၤဒီး, ဒိကနၣ်ဝဲ ဒ်သိး အကဟးထီၣ်ဆူအလီၢ် လၢအကန့ၢ်ဘၣ်သါ ဒီးလဲၤဆူလဲၣ်ဆူလဲၣ်န့ၣ် တသ့ၣ်ညါဘၣ်သနၥ်က့ဒီး ဟးထီၣ်ကွံၥ်ဝဲလီၤ”.

တၢ်သ့ၣ်ညါနၢ်ပၢၢ်ဘၣ်ဃး ယွၤကိးစီၤအၤဘြၣ်အံၤ မၤဖှံထီၣ်က့ၤတၢ်ဝံတၢ်ယိး လၢအဃၢမးလၢကၠဲနံးအသးကံၢ်ပူၤဒီး လၢခံန့ၣ်စံးဘၣ်ယၤလၢ “ဒ်သိးယကတူၢ်လိာ်တၢ်မၤအံၤအဂီၢ် ယတၢ်သူၣ်ကိၢ်သးဂီၤတအိၣ်လၢၤဘၣ်”န့ၣ်လီၤ. တၢ်ပာ်လီၤသးတထံၣ်ဃီလၢ တၢ်နာ်န့ၢ်ကစၢ်ယွၤ ဒ်သိးအကမၤစၢၤယတၢ်ဖံးတၢ်မၤတဖၣ်န့ၣ်လီၤ. ဒ်ယွၤဟ့ၣ်ပှၤတၢ်နၥ်လၢပလိၣ်ဘၣ်အသိးန့ၣ်, မ်ပကနၥ်အီၤလၢပသးသမူအကျဲန့ၣ်တက့ၢ်.