ဟံၣ်ဒွဲ(hotel)လၢၦၤတမှံၤအိၣ်ဆိး, အိၣ်ဘှံးအိၣ်သါအလီၢ်တဖျၢၣ်န့ၣ် လၢမုၢ်နၤတၢ်ခံးကျါအိၣ်ဝဲဒၣ်ထဲတဖျၢၣ်ဧိၤန့ၣ် ဒီးအကပိၥ်ကပၤ တၢ်မနုၤမးတအိၣ်ဝဲဒၣ်ဘၣ်. ထဲဒၣ်တၢ်သူၣ်ထီၣ် အပဲတြီအကပၤ မ့ၣ်အူဒၢအတၢ်ကပီၤ အိၣ်ဖျါဝဲဒၣ်န့ၣ်လီၤ. မ့ၣ်အူအတၢ်ကပီၤဖိန့ၣ် အိၣ်ဝဲလၢလၢၦဲၤၦဲၤ ဒ်သိးၦၤတမှံၤသ့ၣ်တဖၣ် မ့ၢ်သးအိၣ်ဟဲနုၥ်လီၤဆူ တၢ်သူၣ်ထီၣ်အပူၤ ကသ့ဝဲအဂီၢ်န့ၣ်လီၤ. တၢ်ကွဲးအသးလၢ အဘိးဘၣ်သ့ၣ်ညါ ၦၤတမှံလၢကဟဲအိၣ်ဆိး, အိၣ်ဘှံးအိၣ်သါအဂီၢ်မ့ၢ်ဝဲ “ပအိးထီၣ်တၢ်ကပီၤလၢသုဂီၢ်” န့ၣ်လီၤ.

တၢ်ကပီၤဖဲပဲတြီၤအခိၣ်ဒီန့ၣ် ဒ်သိးလိၥ်သးဒီး တၢ်တူၢ်လိၥ်မုၥ်အတၢ်ပနီၣ်ဒီး ဒုးသ့ၣ်ညါၦၤလဲၤတၢ်က့ၤတၢ်ဖိ လၢအလီၤဘှံးလီၤတီၤအဂီၢ် တၢ်လီၢ်တၢ်ကျဲလၢအမုၥ်အလၤ ဒ်သိးၦၤတမှံၤ ကဟဲအိၣ်ဘှံးအဂီၢ် ဘၣ်တၢ်အိးထီၣ်န့ၣ်အီၤအဖၢမုၢ်န့ၣ်လီၤ. မ့ၣ်အူအတၢ်ကပီၤဖိအံၤန့ၣ် ကွဲမုၥ်ဘၣ်ဝဲ ၦၤလဲၤတၢ်က့ၤတၢ်ဖိ ကဟဲနုၥ်လီၤ အိၣ်ကဒု, အိၣ်ဘှံးအိၣ်သါ ဖဲမုၢ်နၤတၢ်ခံးဒီး လဲၤတၢ်က့ၤတၢ်လၢတၢ်လီၤဘှံးလီၤတီၤအဂီၢ်န့ၣ်လီၤ.

ယ့ၣ်ၡူးစံးဝဲဒၣ်လၢ ၦၤလၢအစူၢ်က့ၤနၥ်က့ၤအီၤတဂၤလၢ်လၢ်အတၢ်အိၣ်မူန့ၣ် ကဘၣ်မ့ၢ်ဝဲဒၣ် ဒ်တၢ်ကပီၤလၢအတူၢ်လိၥ်မုၥ်တၢ်အတၢ်ပနီၣ်န့ၣ်လီၤ. အဝဲစံးဝဲဒၣ် ဒ်သိးၦၤလၢအပိၥ်အခံတဖၣ်န့ၣ် “သုဝဲဒၣ်အံၤ သုမ့ၢ်ဟီၣ်ခိၣ်အကပီၤလီၤ. ဝ့ၢ်တဝ့ၢ် အိၣ်ဝဲလၢကစၢၢ်ဒီခိၣ်န့ၣ် အိၣ်တဒၢတသ့ဘၣ်” ဖျါဝဲဒၣ်ဖဲ မးသဲ ၅:၁၄ န့ၣ်လီၤ. ဒ်ပမ့ၢ် ၦၤစူၢ်က့ၤနၥ်က့ၤတၢ်ဖိတဖၣ်န့ၣ် ပကဘၣ်ဒုးကပီၤထီၣ်ဟီၣ်ခိၣ်ချၢလၢအိၣ်ဝဲလၢ တၢ်ခံးကျါန့ၣ်လီၤ.

မးသဲ ၅:၁၆ အပူၤ ယ့ၣ်ၡူးဒုးနဲၣ်ၦၤဒီးဟ့ၣ်ဂံၢ်ဟ့ၣ်ဘါၦၤလၢ “ဒ်န့ၣ်အသိး သုတၢ်ကပီၤန့ၣ် ဒုးကပီၤထီၣ်အီၤလၢ ၦၤကညီအမဲၥ်ညါ ဒ်သိးအကထံၣ်ဘၣ် သုမၤတၢ်ဂ့ၤ, ဒီးကစံးထီၣ်ပတြၢၤသုပၢ်အိၣ်လၢမူခိၣ်န့ၣ်တက့ၢ်” န့ၣ်လီၤ. ဖဲပဒုးကပီၤထီၣ် ပတၢ်ကပီၤအဆၢကတီၢ် ပပလၢၢ်ဘၣ် တၢ်တူၢ်လိၥ်မုၥ်ဟဲဃီၤဆူပအိၣ် ဒ်သိး ပကမၤလိန့ၢ် အါထီၣ် တၢ်လၢယ့ၣ်ၡူး, ၦၤလၢအမ့ၢ်ဟီၣ်ခိၣ်အတၢ်ကပီၤနီၢ်နီၢ်အအိၣ်န့ၣ် ပကထံၣ်ဘၣ် ဖဲယိၤဟၣ် ၈:၁၂ အပူၤန့ၣ်လီၤ. ဟီၣ်ခိၣ်လၢအမ့ၢ် တၢ်လီၤဘှံးလီၤတီၤ ဒီးတၢ်ခံးသူအလီၢ်အံၤ ယ့ၣ်ၡူးခရံၥ်အတၢ်ကပီၤ ကအိၣ်ကပီၤထီၣ်ထီဘိန့ၣ်လီၤ.

မ့ၢ်နဒုးကပီၤထီၣ် နတၢ်ကပီၤန့ၣ်ဧါ. ခဲကနံၣ်အံၤ ဒ်ကစၢ်ယ့ၣ်ၡူးအတၢ်ကပီၤအိၣ်ဝဲလၢနလိၤအသိးန့ၣ် ၦၤအဂၤတဖၣ်စ့ၢ်ကီး ကထံၣ်ဘၣ်ဝဲ နတၢ်ကပီၤဒီး ကစၢ်ယ့ၣ်ၡူးအတၢ်ကပီၤ ကဘၣ်တၢ်ဆဲးကပီၤဘၣ်ဝဲဒၣ် ဆူပခိၣ်ပဃၢၤန့ၣ်တက့ၢ်.