တနံၤအံၤ မုၢ်နံၤပူၤတသီ(မုၢ်ဆၣ်)ဂီၤခီဘၣ်ဆၣ် ယတံၤသကိး ခၠဲၣ်မ့(Chia-ming)တဟဲဝဲဒၣ်ဆူ တၢ်ဖံးတၢ်မၤလီၢ်ဝဲၤဒၢးန့ၣ်ဘၣ်. အဝဲအိၣ်ဝဲလၢအဟံၣ်ဒီး မၤကဆှဲကဆှီ တၢ်လုၢ်ထံလီၢ်ဒၢးန့ၣ်လီၤ. ဒီတလါညါန့ၣ်တၢ်မၤတအိၣ်အဃိဒီး ဆိကမိၣ်ဝဲ တၢ်မၤကျဲၤအကျိၤ တအိၣ်ဝဲဒၣ်ဘၣ်န့ၣ်လီၤ. တၢ်မၤလီၢ်လၢ အဝဲမၤဝဲဒၣ်န့ၣ် ဘၣ်တၢ်ဆိကတီၢ် ခီဖျိလၢကိၣ်ဘ့း-၁၉ တၢ်ဆါအၢအဃိဒီး ခါဆူညါအဂီၢ် တၢ်ဘၣ်ယိၣ်အိၣ်ထီၣ်ဝဲ, ခၠဲၣ်မ့အသးပူၤ အိၣ်ၦဲၤဒီးတၢ်ပျံၤတၢ်ဖုးန့ၣ်လီၤ. အဝဲဆိကမိၣ်ဝဲဒၣ်လၢအသးပူၤ “ယကဘၣ် လုၢ်အီၣ်လုၢ်အီ ယဟံၣ်ဖိဃီဖိဒ်လဲၣ်. ယဃုတၢ်မၤစၢၤ ကန့ၢ်ဘၣ် ဖဲလဲၣ်တတီၤလဲၣ်”န့ၣ်လီၤ.

ထါစံးထီၣ်ပတြၢၤ ၁၂၁:၁ အပူၤ, ၦၤဂီၢ်မုၢ်လၢအလဲၤဝဲဆူ ဝ့ၢ်ယရူၤၡလ့ၣ်, ဆူယွၤအဟံၣ် ဒ်သိးကလဲၤဘူၣ်ထီၣ်ဘါထီၣ်ယွၤအဂီၢ် သံကွၢ်တၢ်သံကွၢ်လၢအမ့ၢ် “တၢ်မၤစၢၤၦၤန့ၣ် ပကဃုထံၣ်န့ၢ်အီၤဖဲလဲၣ်”န့ၣ်လီၤ. ၦၤလဲၤဆူ ဝ့ၢ်စီဆှံလၢ ကစၢၢ်စံယိၣ်အဒီခိၣ်လိၤန့ၣ် ယံၤဝဲဒီး အိၣ်ၦဲၤဒီးတၢ်ဘၣ်ယိၣ်လၢတၢ်ကီတၢ်ခဲ, တၢ်ဘၣ်ဒိဘၣ်ထံးအပူၤ ၦၤလဲၤတၢ်ဖိဘၣ်လဲၤထီၣ် ကစၢၢ်ကီကီခဲခဲန့ၣ်လီၤ. တၢ်လဲၤကီခဲအပူၤ အဝဲသ့ၣ်ဘၣ်ကွၢ်ဆၢၣ်မဲၥ်ဝဲတၢ်တၤတၢ်တဖၣ်န့ၣ် ဖျါဝဲဒၣ်ဒ်အလီၤဂၥ်ဝဲလၢ ခ့ခါအဆၢကတီၢ် ပတၢ်အိၣ်မူပူၤ ပကွၢ်ဆၢၣ်မဲၥ်လဲၤခီဖျိတၢ်ဒ်အမ့ၢ် တၢ်ဆူးတၢ်ဆါ, တၢ်ရ့လိၥ်ဘၣ်ထွဲအတၢ်ကီခဲ, တံၤသကိးဒီးဘူးတံၢ် သံလဲၤပူၤကွံၥ်ၦၤ, တၢ်မၤအတၢ်ဝံဃၢဒီး တၢ်ဆီၣ်သနံး, မ့တမ့ၢ်ဘၣ်ဒီး ဒ်ခၠဲၣ်မ့ ဘၣ်ကွၢ်ဆၢၣ်မဲၥ်ဝဲ ကျိၣ်စ့အတၢ်ဂ့ၢ်ကီဒီးတၢ်မၤတအိၣ်အသိး သ့ၣ်တဖၣ်န့ၣ်လီၤ.

ဘၣ်ဆၣ် တၢ်မ့ၢ်တၢ်တီလၢ ပကဘၣ်ဟံးဃၥ်ဂၢၢ်ဂၢၢ်ကျၢၤကျၢၤတမံၤ မ့ၢ်ဝဲ ဒ်ထါစံးထီၣ်ပတြၢၤ ၁၂၁:၂ ပၥ်ဖျါဝဲအသိး ၦၤလၢအတ့လီၤဝဲမူခိၣ်ဒီးဟီၣ်ခိၣ်တဂၤ, အနီၢ်ကစၢ်ဒၣ်ဝဲ ကမၤစၢၤၦၤန့ၣ်လီၤ. အဆၢဖိ ၃, ၅, ၇-၈, ဒုးသ့ၣ်ညါၦၤလၢ ယွၤမ့ၢ်ၦၤလၢအကွၢ်ထွဲၦၤ, ကဟုကယၥ်ၦၤ ဒီးမ့ၢ်လၢအသ့ၣ်ညါ ပတၢ်လိၣ်သ့ၣ်တဖၣ်န့ၣ်လီၤ. ဧ့ၤဘြံၤလံၥ်မဲၥ်ဖျၢၣ် “ၡမါ” အခီပညီမ့ၢ်ဝဲ “အိၣ်ကွၢ်လီၤၦၤလၢတၢ်ဖီခိၣ်” ဒီးမ့ၢ်စ့ၢ်ကီး “ တၢ်အံးထွဲကွၢ်ထွဲၦၤလၢတၢ်ဘံၣ်တၢ်ဘၢ”အဂီၢ် န့ၣ်လီၤ. ၦၤလၢအတ့လီၤမူခိၣ်ဒီးဟီၣ်ခိၣ်န့ၣ် မ့ၢ်ၦၤလၢကွၢ်ထွဲကဟုကယာ်ၦၤန့ၣ်လီၤ. ပအိၣ်ကဒုဝဲဒၣ်လၢ အတၢ်မၤဘံၣ်မၤဘၢကွၢ်ထွဲၦၤအပူၤန့ၣ်လီၤ. တယံာ်ဒံးဘၣ်န့ၣ် ခၠဲၣ်မ့ အုၣ်အသးလၢ “ကစၢ်ယွၤအံးထွဲကွၢ်ထွဲ မၤစၢၤယၤ ဒီးယဟံၣ်ဖိဃီဖိတဖၣ် ခီဖျိလၢဟါလီၤခီတၢ်ဖံးတၢ်မၤလၢ တၢ်သိၣ်လိၦၤအဂီၢ် ကစၢ်ယွၤကတဲၥ်ကတီၤန့ၣ်ယၤအဃိန့ၣ်လီၤ”.

လၢပသးသမူအတၢ်လဲၤကျဲအပူၤ ပခီၣ်ခါတထံၣ်ဘၣ်တထံၣ်န့ၣ် ပမ့ၢ်စူၢ်အီၤနၥ်အီၤထီဘိန့ၣ်ဒီး ပကမ့ၢ်ၦၤလၢ အသ့ကွၢ်စိတၢ်လၢတၢ်မုၢ်လၢ် ဒီးပကသ့ၣ်ညါလၢ ပတၢ်အိၣ်မူန့ၣ် အိၣ်ဂၢၢ်ကျၢၤလၢ ယွၤအတၢ်ကူၣ်သ့, အတၢ်အဲၣ်လၢ မၤဘံၣ်မၤဘၢ ၦၤအဟီၣ်ကဝီၤပူၤန့ၣ်လီၤ.