အၣ်ဖရံကး ကီၢ်မိၢ်ၦၢ်(Africa)အပူၤ တၤဟိ(antelope)အိၣ်ဝဲတကလုၥ်ဒီး အဝဲသ့ၣ် မ့ၢ်ဖု(စံၣ်)ဝဲဒၣ်န့ၣ် တုၤဝဲတဆံခီယီၢ်(ပ့ၣ်) အထီန့ၣ် တုၤသၢဆံခီၣ်ယီၢ်(ပ့ၣ်) န့ၣ်လီၤ. တၤဟိတဖၣ်အံၤ အတၢ်ဟူးဂဲၤအံၤ လီၤကမၢကမၣ် ဒီးမ့ၢ်တၢ်အကါဒိၣ်လၢ တၢ်အိၣ်မူအိၣ်ဂဲၤလၢ အၣ်ဖရံကးတၢ်လီၢ်ကဝီၤန့ၣ်လီၤ. တၢ်လီၢ်ဖဲ ၦၤပၥ်ကွၢ်ကီဆၣ်ဖိကီၢ်ဖိတဖၣ်န့ၣ် တၤဟိအလီၢ် ၦၤဒူၣ်ဃၥ်တၢ်အထီ အိၣ်ဒၣ်ထဲသၢခီၣ်ယီၢ်(ပ့ၣ်) ဃၣ်ဃၣ်န့ၣ်လီၤ. ဆၣ်ဖိကီၢ်ဖိ ဒ်တၤဟိတဖၣ်န့ၣ် ၦၤပၥ်အီၤ တၢ်အဒူၣ်ဖုၣ်ဖုၣ်ဖိသ့ဝဲဒၣ်ဒ်လဲၣ်. မ့ၢ်လၢတၤဟိတဖၣ် မ့ၢ်တထံၣ်ဝဲတၢ်လီၢ်တၢ်ကျဲလၢ ကဖုစံၣ်ဝဲဒီးကပၥ်လီၤခီၣ်ယီၢ်တၢ်အလီၢ်န့ၣ် အဝဲသ့ၣ်တဖု, တစံၣ်ဟးထီၣ်ဝဲဒၣ်ဘၣ်န့ၣ်လီၤ. တၤဟိတဖၣ် မ့ၢ်လၢတထံၣ်ဘၣ် တၢ်အိၣ်အသးလၢ တၢ်အဒူၣ်အချၢတကပၤအဃိ ၦၤပၥ်အီၤလၢ တၢ်အဒူၣ်ဖုၣ်ဖုၣ်သ့ဝဲဒၣ် န့ၣ်လီၤ.
ပမ့ၢ်ဝဲၦၤကညီသ့ၣ်တဖၣ်သနၥ်က့ ပတလီၤဆီ ဒ်တၤဟိသ့ၣ်တဖၣ်န့ၣ်ဘၣ်. တချုးပလဲၤတၢ်ဆူအမဲၥ်ညါ ခါဆူညါန့ၣ် ပအဲၣ်ဒိးသ့ၣ်ညါတၢ်အိၣ်အသး သ့ၣ်တဖၣ်လၢ ပကဘၣ်ကွၢ်ဆၢၣ်မဲၥ်ဆူညါန့ၣ်လီၤ. လၢတၢ်စူၢ်တၢ်နၥ်အတၢ်အိၣ်မူအပူၤတခီ တၢ်တညီနုၥ်မၤအသးဒ်န့ၣ်ဘၣ်. စီၤပီလူး ကွဲးဆှၢလီၤ လံၥ်တၢ်ဟ့ၣ်ပလီၢ်တၢ်ဆူ ၦၤကရံၣ်သူးဖိတဖၣ်အအိၣ် စံးဝဲ “အဂ့ၢ်ဒ်အံၤ (ပမူ) ပလဲၤတၢ်လၢတၢ်နၥ်, တမ့ၢ်ဘၣ်လၢထံၣ်ဘၣ်တၢ်ဘၣ်” န့ၣ်လီၤ (၂ ကရံၣ်သူး ၅:၇).
မးသဲ ၆:၁၀ အပူၤ ကစၢ်ယ့ၣ်ၡူးသိၣ်လိၦၤ “ဒ်လၢမူခိၣ်အသိးန့ၣ် မ်တၢ်မၤအသးလၢဟီၣ်ခိၣ်ချၢ စ့ၢ်ကီး ဖဲဒၣ်နသးတက့ၢ်”. ဖဲပဃ့ဘါထုကဖၣ်တၢ်လၢယွၤန့ၣ်လီၤ. ဘၣ်ဆၣ် တၢ်အံၤ တမ့ၢ်တၢ်အခီပညီလၢ ပကသ့ၣ်ညါဘၣ်တၢ်သ့ၣ်တဖၣ် လၢတချုးဟဲကဲထီၣ် အိၣ်ထီၣ်အသးဘၣ်န့ၣ်လီၤ. တၢ်အိၣ်မူအိၣ်ဂဲၤလၢ တၢ်စူၢ်တၢ်နၥ်အပူၤ အခီပညီ မ့ၢ်ဝဲ ပစူၢ်က့ၤနၥ်က့ၤ ကစၢ်ယွၤအတၢ်တိၥ်ပၥ်အဂ့ၤသ့ၣ်တဖၣ်, အဆၢကတီၢ် ဖဲတၢ်ပညိၣ်တဖၣ် အိၣ်လီၤဘၢဝဲလၢ ပတၢ်သ့ၣ်ညါနၢ်ပၢၢ်တၢ်အပူၤဒၣ်လဲၣ် န့ၣ်လီၤ.
လၢသးသမူအတၢ်လဲၤပူၤ တၢ်လီၤတံၢ်လီၤဆဲး မ့ၢ်တအိၣ်အဆၢကတီၢ်ဒၣ်လဲၣ် ပနၥ်ကစၢ်ယွၤ အတၢ်အဲၣ်လၢအတလီၤတိၥ်လီၤကၥ်ဘၣ်န့ၣ်လီၤ. ၂ ကရံၣ်သူး ၅:၉ အပူၤ စီၤပီလူးစံးဝဲ “မၤသးဒ်န့ၣ်ဒီး ပအိၣ်ဒီးကစၢ်မ့ၢ်ဂ့ၤ, ပအိၣ်ယံၤမ့ၢ်ဂ့ၤ, ဒ်သိး ကဘၣ်အသးလၢၦၤဒီး ပမၤတၢ်သၦၢ်ၦၢ်လီၤ” န့ၣ်လီၤ.
