ၦၤသးဝံၣ်တၢ်ဒီး ၦၤကွဲးတၢ်သးဝံၣ် လ့ဖီးဒံၣ်ဝ့လၢၣ် (Linford Detweiler)စံးဝဲ “ ၦၤသးစၢ်ဖိတဂၤလၢအိၣ်ဒီး တၤလၣ်အသ့အဘၣ်လၢ တၢ်မၤမုၥ်မဲၥ်ဘၣ်သးၦၤန့ၣ် အဝဲဒၣ်သံကွၢ်ဝဲ တၢ်သံကွၢ် အကလုၥ်ကလုၥ်သ့ဝဲဒၣ်”န့ၣ်လီၤ. တၢ်သံကွၢ်အကျါမ့ၢ်ဝဲ “ဒ်သိးယကကဲထီၣ် ၦၤမံၤဟူသၣ်ဖျါတဂၤန့ၣ် ယကဘၣ်မၤတၢ်မနုၤလဲၣ်”န့ၣ်လီၤ. ဖဲအံၤ ဒံၣ်ဝ့လၢၣ်ဟ့ၣ်ပလီၢ်ဝဲ လၢ “တၢ်တိၥ်ပၥ် ဒ်သိးအံၤန့ၣ် ကဲထီၣ်တၢ်အိးထီၣ်ကျဲလၢ တၢ်ဟးဂီၤ အစိကမီၤ အက့ၢ်အဂီၤ လၢပနီၢ်သးအပူၤမ့ၢ်ဂ့ၤ နီၢ်ခိတကပၤ စ့ၢ်ကီး” န့ၣ်လီၤ. ဒံၣ်ဝ့လၢၣ်ဒီး အမါန့ၣ် ဃုထၢဝဲ လၢတၢ်မံၤဟူသၣ်ဖျါလီၤအလီၢ်န့ၣ် ဃုထၢ တၢ်သူၣ်ဝံၣ်သးဆၢ တၢ်ဒ့လၢ ၦၤတပိၥ်ထွဲအါအါန့ၣ်ဒီး တၢ်မၤအံၤကဲထီၣ် တၢ်ဒိၣ်ထီၣ်ထီထီၣ်လၢ အဝဲသ့ၣ် အသးသမူဒီစိၤန့ၣ်လီၤ.

ၦၤအမံၤတဖျၢၣ်လၢအမ့ၢ် ယဟိယဒါန့ၣ် ၦၤတပၥ်ပနီၣ်အီၤလၢတၢ်အိၣ်ကတဲၥ်ကတီၤအသးအပူၤသနၥ်က့ အခီပညီန့ၣ် လီၤပလိၥ်ဝဲဒၣ်လၢ “သးသမူတစိၤသး ပၥ်စီဆှံတၢ်လၢယွၤအဂီၢ်”န့ၣ်လီၤ. ဖဲစီၤပၤစီၤယိၤအၣ်ပၢတၢ်အကတီၢ်, အါတက့ၢ်န့ၣ် ပၢဘၣ်ဝဲဂ့ၤဂ့ၤန့ၣ် မ့ၢ် စီၤယဟိယဒါမၤဝဲ ၦၤလုၢ်တၢ်အဒိၣ်လၢယွၤအဟံၣ်အဃိန့ၣ်လီၤ.

၂ စီၤပၤ ၁၁:၁-၁၆ ပၥ်ဖျါဝဲဒၣ်, ဖဲစီၤယိၤအၣ်အသးအိၣ် ၇ နံၣ် အတီၢ်ပူၤ စီၤယဟိယဒါ မၤစၢၤ စီၤယိၤအၣ် ဒ်သိး ကကဲထီၣ် စီၤပၤလၢ ကီၢ်ယူဒၤန့ၣ်လီၤ. တၢ်မၤအသးအံၤတမ့ၢ်လၢစီၤယဟိယဒါ ဟံးန့ၢ်တၢ်စိတၢ်ကမီၤအဂီၢ်ဘၣ်. ဖဲစီၤယိၤအၣ် ဘၣ်တၢ်ဟ့ၣ်ခိၣ်ကျီၤဒီး ဘၣ်တၢ်ပၥ်ထီၣ်စီၤပၤအလီၢ် အဆၢကတီၢ်န့ၣ် စီၤယဟိယဒါ မၤဝဲတၢ်အၢၣ်လီၤအီလီၤလၢကစၢ်ယွၤ, စီၤပၤ ဒီးၦၤဂီၢ်မုၢ် ဒ်သိးအဝဲသ့ၣ် ကကဲထီၣ် ယွၤအၦၤဂီၢ်မုၢ်အဂီၢ်န့ၣ် ပကထံၣ်ဘၣ်ဖဲ ၂ စီၤပၤ ၁၁:၁၇ အပူၤန့ၣ်လီၤ. ၂ ကွဲးနီၣ်တၢ် ၂၄:၁၄ ပၥ်ဖျါဝဲ “ဒီးလုၢ်တၢ်လုၢ်မ့ၣ်အူလၢယွၤအဟံၣ်ပူၤတထံၣ်ဃီလၢ စီၤယဟိယဒါအမုၢ်နံၤခဲလၢၥ်အတီၢ်ပူၤလီၤ”. တၢ်မၤအံၤမ့ၢ် စီၤယဟိယဒါမၤတီအတၢ်ကတိၤဒီးမၤလၢၦဲၤ တၢ်လိၣ်နးနးကလဲၥ်လၢ အမ့ၢ်တၢ်မၤဆီတလဲတၢ်အဂီၢ်န့ၣ်လီၤ. ၂ ကွဲး ၂၄:၁၆ ပၥ်ဖျါဝဲ လၢခီဖျိစီၤယဟိယဒါ အတၢ်ဟ့ၣ်လီၤအသးဆူ ယွၤအတၢ်မၤပူၤ ဖဲအဝဲသံဝဲဒၣ်န့ၣ် “ဘၣ် တၢ်ခူၣ်လီၤကွံၥ်အီၤ လၢစီၤဒၤဝံးအဝ့ၢ်ပူၤလၢ စီၤပၤအကျါလီၤ” န့ၣ်လီၤ.

သရၣ်ယူၣ်ကၠ့ဖံထၢၣ်စၢၣ်(Eugene Peterson) စံးဝဲလၢတၢ်အံၤ မ့ၢ်တၢ်အိၣ်မူလၢအလိၤဒီးယွၤ “တၢ်စူၢ်ဒိကနၣ်, ယံာ်ဝဲထီဝဲဒၣ်တပယူၢ်ဃီ”န့ၣ်လီၤ. တၢ်အိၣ်မူဒ်သိးအံၤန့ၣ် ထီဒါလိၥ်အသးဒီး ဟီၣ်ခိၣ်အတၢ်ထံၣ်ဘၣ်ဃးဒီး တၢ်မံၤဟူသၣ်ဖျါ, တၢ်စိတၢ်ကမီၤဒီး တၢ်မၤလၢၦဲၤ နီၢ်ခိနီၢ်သးအတၢ်မိၢ်န့ၢ်သးလီတၢ်တဖၣ်န့ၣ်လီၤ.