ဖိသၣ်ခွါဖိသီမၢး(စ)အဲၣ်ဒံၢ်စၢၣ် (Thomas Edison)လၢအသးအိၣ်နွံနံၣ်တဂၤ, တသးအိၣ် မ့တမ့ၢ် မၤလံၥ်မၤလဲၢ်တဘၣ်ဂ့ၤဂ့ၤဘၣ်. ဘၣ်တနံၤ, အဝဲဘၣ်တၢ်ကိးအီၤဒၣ်လဲၥ်လၢ “ၦၤအခိၣ်နူၢ်သဘံၣ်ဘုၣ်” လၢအသရၣ်တဂၤန့ၣ်လီၤ. အဝဲဟဲက့ၤ ဆူဟံၣ်လၢ တၢ်သူၣ်ဒိၣ်သးဖျိးအပူၤလီၤ. လၢခံတနံၤ, ဖဲအကတိၤတၢ်ဒီး သရၣ်အံၤဝံၤ, အဝဲအမိၢ်, လၢအမ့ၢ်သရၣ်မုၣ်တဂၤ, ဆၢတဲၥ်တၢ်ဆူ ကသိၣ်လိ သီမၢး(စ) လၢဟံၣ်လီၤ. တၢ်မၤစၢၤလၢအပၥ်ဃုၥ်ဒီးတၢ်အဲၣ်တၢ်ကွံ ဒီးတၢ်ဟ့ၣ်ဂံၢ်ဟ့ၣ်ဘါ (ဃုၥ်ဒီး ကစၢ်ယွၤ အတၢ်ဟ့ၣ်လၢတၢ်ကူၣ်တၢ်ဆး), သီမၢး(စ)ကဲထီၣ်ၦၤလၢအတ့ဆိတၢ်ဒီး ဒုးအိၣ်ထီၣ်တၢ်ဖးဒိၣ်တဂၤလီၤ. လၢခံအဝဲကွဲးဖျါထီၣ်ဝဲလၢ, “ယမိၢ်မ့ၢ်ၦၤလၢအသိယၤဘှီယၤလီၤ. အဝဲမ့ၢ်မိၢ်နီၢ်နီၢ်, မ့ၢ်တၢ်လီၤတံၢ်လီၤဆဲးလၢယဂီၢ် ဒီးယသ့ၣ်ညါ ယအိၣ်ဒီးၦၤတဂၤ လၢယကဘၣ်မူလၢအဂီၢ်, ဒီးအသု ယတမၤဟးဂီၤအသးန့ၣ်လီၤ”.

လံၥ်မၤတၢ် ၁၅ အပူၤ, ပဖးဘၣ်စီၤဘၢ်နါဘၤဒီး စီၤပီလူးမၤသကိးတၢ် ဒ်မံးၡၢၣ်နရံၣ်သရၣ်တဖၣ်အသိး, တုၤဒၣ်လဲၥ် အဝဲသ့ၣ်ဘၣ်ကွၢ်ဆၢၣ်မဲၥ်ဝဲ တၢ်သးတလီၤပလိၥ်အကါဒိၣ်တမံၤ, လၢအဘၣ်ထွဲဒီး တၢ်ကကိးဃုၥ် စီၤယိၤဟၣ်မၢ်ကူးလၢ အတၢ်လဲၤသကိးတၢ်အခါန့ၣ်လီၤ. စီၤပီလူးထီဒါတၢ်အံၤမ့ၢ်လၢ, လၢအတိခိၣ် စီၤမၢ်ကူး “ဟးဖးဒီးအီၤလၢ ပၣ်ဖူၤလံ” (:၃၆-၃၈)အဃိန့ၣ်လီၤ. လၢတၢ်အံၤအဃိ, စီၤပီလူးဒီး စီၤဘၢ်နါဘၤလီၤဖးလိၥ်သးန့ၣ်လီၤ. စီၤပီလူးကိးထီၣ် စီၤစံလၤ, ဒီးစီၤဘၢ်နါဘၤကိး စီၤမၢ်ကူးလၢ အတၢ်လဲၤအပူၤလီၤ. စီၤဘၢ်နါဘၤသးအိၣ်ဟ့ၣ် စီၤမၢ်ကူးလၢ တၢ်ခွဲးတၢ်ယၥ် ခံဘျီတဘျီ ဒီးအဝဲဟ့ၣ်ဂံၢ်ဟ့ၣ်ဘါ အတၢ်နီၤဟ့ၣ်တၢ်ဆူ စီၤမၢ်ကူးအတၢ်သ့တၢ်ဘၣ် ဒ်သိးတၢ်ကမၤတၢ် ဒီးမၤနၢၤတၢ် ဒ်မံးၡၢၣ်နရံၣ်တဂၤအသိးန့ၣ်လီၤ. အဝဲမၤသကိးတၢ်ဆူညါဒီး ကွဲးဝဲလံၥ်မၢ်ကူး, တကးဒံးဘၣ်န့ၣ် ကွဲးကတိၤမုၣ်ထီၣ်တၢ်ဆူ စီၤပီလူး ဖဲအအိၣ်လၢဃိၥ်ပူၤ (၂ တံၤ ၄:၁၁) န့ၣ်လီၤ.

မ်ပဝဲကိးဂၤ, လၢပတၢ်အိၣ်မူအပူၤ ပကကွၢ်ကဒါက့ၤတၢ်ဒီး ပၥ်ဖျါၦၤတဂၤဂၤ, လၢအမ့ၢ်ၦၤလၢ အဟ့ၣ်ဂံၢ်ဟ့ၣ်ဘါၦၤဒီး မၤစၢၤၦၤ လၢပသးသမူအကျဲပူၤန့ၣ်တက့ၢ်. လၢနတၢ်အိၣ်မူအပူၤ ကျဲဒ်သိးအံၤန့ၣ် ကစၢ်ယွၤကမၢနမၤတၢ်လၢ ၦၤတဂၤဂၤအဂီၢ်န့ၣ်လီၤ. မ့ၢ်နကဘၣ် ဟ့ၣ်ဂံၢ်ဟ့ၣ်ဘါမတၤတဂၤန့ၣ်လဲၣ်.