တၢ်လီၢ်လၢပအိၣ်ကဒုအဂီၢ်အဂ့ၤကတၢၢ် မ့ၢ်ပဟံၣ်ပဃီ ဒီးတၢ်လီၢ်တၢ်ကျဲအဂၤ တအိၣ်ဘၣ်န့ၣ် မ့ၢ်တၢ်ကတိၤလၢ ဒီရသံၣ်ကတိၤဝဲလၢ တၢ်ဂီၤမူ “Wizard of Oz” အပူၤအသိးန့ၣ် တၢ်ဂီၤမူအဂၤတဖၣ် ဒ်အမ့ၢ် star wars ဒီး the lion king အပူၤစ့ၢ်ကီး ဘၣ်တၢ်စူးကါအီၤန့ၣ်လီၤ. တၢ်အံၤ ဘၣ်တၢ်သ့ၣ်ညါလၢ “ၦၤဒူၦၤဃိၤတဂၤ အတၢ် လဲၤကျဲအကျိၤအကွၥ်” န့ၣ်လီၤ. ပမ့ၢ်စံးလၢအဖုၣ်န့ၣ် ၦၤပတီၢ်မုၢ်ဖိတဂၤ အိၣ်မူအိၣ်ဂဲၤဝဲ ဒ်ညီနုၢ်အလုၢ်အလၢ် အိၣ်ဝဲအသိးအခါတၢ်ဂ့ၢ်လီၤဆီအိၣ်ထီၣ်ဝဲလၢ ကဘၣ်မၤတၢ်မၤလၢအဒူအဃိၤတၢ် အဂီၢ်န့ၣ်လီၤ. ၦၤတဂၤအံၤ ဘၣ်ပၥ်တ့ၢ်ဟံၣ်ဃီ ဒီးဘၣ်လဲၤဝဲဆူ တၢ်လီၢ်အဂၤလၢ အိၣ်ၦဲၤ ဒီးတၢ်မၤကွၢ် ဒီးတၢ်လ့ပစီတဖၣ် ဒ်သိးကဘၣ်လဲၤခီဖျိမၤနၢၤဝဲဒၣ်န့ၣ်လီၤ. အတၢ်လဲၤကျဲန့ၣ် ကထံၣ်ဘၣ်စ့ၢ်ကီး တံၤသကိးသရၣ်သမါ ဃုၥ်ဒီးၦၤမၤအၢမၤသီမၤဟးဂီၤအီၤတဖၣ်န့ၣ်လီၤ. အဝဲမ့ၢ်လဲၤခီဖျိမၤနၢၤ တၢ်မၤကွၢ်တဖၣ် ဒီးအုၣ်အသး ဒ်အမ့ၢ် ၦၤဒူၦၤဃိၤတဂၤဝံၤ ဟဲက့ၤကဒါဆူဟံၣ် ဒီးတဲကဒါအတၢ်လဲၤခီဖျိတဖၣ်ဒီး ဒိးန့ၢ်ဘၣ်ဝဲ တၢ်ကူၣ်သ့န့ၣ်လီၤ. အကတၢၢ်တၢ်ဒိးန့ၢ် တၢ်ကူၣ်သ့ မ့ၢ်တၢ်အကါဒိၣ်ကတၢၢ်လီၤ.

တၢ်တဲဖိလၢအပၥ်ဖျါထီၣ် ၦၤတဂၤလၢတၢ်နါအိၣ်ဆိးအပူၤတဂၤအဂ့ၢ်န့ၣ် ဒ်သိးလိၥ်အသးလၢ “ၦၤဒူၦၤဃိၤ အတၢ်လဲၤကျဲ အကျိၤအကွၥ်” န့ၣ်လီၤ. တၢ်လၢအထူးန့ၢ်ပသးန့ၣ် ဖျါဝဲဒၣ် ဖဲ မၢ်ကူး ၅:၁၈ လၢ အဃ့ကညး ယ့ၣ်ရှူး “ဒ်သိး အကအိၣ်ဒီးအီၤ” န့ၣ်လီၤ. အဆၢဖိ ၁၉ အပူၤ ယ့ၣ်ရှူးစံးဘၣ်အီၤလၢ “က့ၤက့ၤဆူနဟံၣ်, ဆူနတံၤနသကိး” န့ၣ်လီၤ. တၢ်လၢအကါဒိၣ်ဖဲအံၤန့ၣ် ၦၤတဂၤအံၤ “အတၢ်လဲၤကျဲအကျိၤအကွာ်” လၢအမ့ၢ်ကဘၣ် က့ၤကဒါက့ၤဆူအဟံၣ် ဆူအတံၤသကိးလၢအသ့ၣ်ညါအီၤ အဂ့ၤကတၢၢ်တဖၣ် အအိၣ်ဒီးကဘၣ် ဒုးသ့ၣ်ညါတၢ်လီၤလးလၢအလီၤဘၣ်အီၤ န့ၣ်လီၤ.

ကစၢ်ယွၤကိးပဝဲတဂၤဘၣ်တဂၤစုၥ်စုၥ် လၢကျဲအါဘိလၢတၢ်အိၣ်အသး တၢ်မၤအသးတမံၤတမၠိန့ၣ်လီၤ. ဘၣ်ဆၣ် ပဝဲတနီၤနီၤအဂီၢ် ကမ့ၢ်ဝဲတၢ်မၤအသး တၢ်အိၣ်အသးလီၤဆီဒီး အကါဒိၣ်လၢ ပတၢ်စူၢ်တၢ်နၥ်အတၢ်လဲၤကျဲ အကျိၤအကွၥ်အပူၤ ဒီးပကဘၣ်က့ၤကဒါက့ၤဆူပဟံၣ် ဒုးသ့ၣ်ညါ ပတၢ်လဲၤခီဖျိတဖၣ် ဆူၦၤလၢအသ့ၣ်ညါၦၤအဂ့ၤကတၢၢ်တဖၣ်အအိၣ်န့ၣ်လီၤ. ပဝဲတနီၤ ယွၤကိးၦၤ ဒ်အမ့ၢ် “တၢ်လီၢ်ဂ့ၤန့ၣ် ပဟံၣ်ပဃီတၢ်လီၢ်အဂၤတအိၣ်ဘၣ်” န့ၣ်လီၤ.