ဖဲယထံၣ်ဘၣ် လံၣ်ယိၣ်တီၣ်စထွဲ(Leo Tolstoy)အလံၥ်ဖးဒိၣ်လၢ အမ့ၢ် “တၢ်ဒုးတၢ်ယၤဒီးတၢ်မုၥ်တၢ်ပၢၤ” လၢယတံၤသကိးအလံၥ်စီၣ်န့ၣ်ဒီး ယအၢၣ်လီၤတူၢ်လိၥ်လၢ ယဖးလံၥ်အံၤန့ၣ် တတုၤအကတၢၢ်နီတဘျီဘၣ်. “ဂ့ၤလံ” ယသကိး မၤတံၣ် နံၤကမှံၤဒီးစံးဝဲ “ဖဲယအိၣ်ဘှံးလၢ တၢ်သိၣ်လိ တၢ်ဖံးတၢ်မၤအခါ ယမၤန့ၢ်လံၥ်အံၤ လၢယတံၤသကိးတဂၤလၢ အစံးဝဲ “ခဲအံၤ နမၤန့ၢ်တၢ်ဆၢကတီၢ်လၢကဖးလံၥ်အံၤ” န့ၣ်လီၤ.

လံၥ်ၦၤစံၣ်တဲၤတဲလီၤတၢ် ၃:၁-၈ ပၥ်ဖျါဝဲညီနုၢ်သးသမူအတၢ်ဟူးတၢ်ဂဲၤအပူၤ တၢ်လၢပဘၣ်ဃုထၢမၤဝဲ ဒ်အလီၢ်အိၣ်ဝဲအသိးန့ၣ်လီၤ. ပတၢ်အိၣ်မူအပူၤ တကတီၢ်ဘၣ်တကတီၢ် ဖဲပကွၢ်လီၤက့ၤပသးဒီးပကဟံးန့ၢ်တၢ်ဆၢကတီၢ်ဒီး ကယဲၢ်တၢ်လၢပအဲၣ်ဒိးမၤခဲလၢၥ် ပကမၤအဂီၢ်ကီခဲဝဲဒၣ်န့ၣ်လီၤ. ပကဆၢတဲၥ်လၢတၢ်ကူၣ်သ့အပူၤ ဘၣ်ဃးဒီးပတၢ်ရဲၣ်ကျဲၤ ပတၢ်ဆၢကတီၢ်အဂီၢ် ဟ့ၣ်ကူၣ်ဝဲလၢ ပကအိၣ်ဒီးတၢ်ရဲၣ်တၢ်ကျဲၤလီၤတံၢ်လီၤဆဲးန့ၣ်လီၤ.

လၢပနီၢ်သးအတၢ်ဂံၢ်တၢ်ဘါအဂီၢ် တၢ်ရ့လိၥ်သးဒီးကစၢ်ယွၤန့ၣ် မ့ၢ်တၢ်အခီၣ်ထံး ဒီးအကါဒိၣ်လၢပကဘၣ်မၤအီၤန့ၣ်လီၤ. “တၢ်မၤလၢပမၤအီၤ မ့ၢ်လဲၤထီၣ်လဲၤထီဒီး ကဲထီၣ်တၢ်မံသူၣ်မံသးလၢပနီၢ်သးအဂီၢ်” န့ၣ်လီၤ (စံၣ်တဲၤတဲ ၃:၁၃). ပမ့ၢ်အတၢ်မၤလၢအတ့လီၤဝဲလၢ ယ့ၣ်ၡူးခရံၥ်အပူၤ, ဒ်သိးပကမၤတၢ်ဂ့ၤတဖၣ်လၢ ယွၤကတဲၥ်ကတီၤပၥ်လၢ ပကလဲၤတၢ်လၢအပူၤအဂီၢ်န့ၣ်လီၤ (အ့ဖ့းစူး ၂:၁၀). တၢ်အိၣ်ဘှံးအိၣ်ကသုၣ်အဆၢကတီၢ်တဖၣ် န့ၣ် တမ့ၢ်တၢ်မၤလၢၥ်မၤဆှူတၢ်ဆၢကတီၢ်ဘၣ်. မ့ၢ်ဒၣ် တၢ်မၤဂ့ၤမၤသီထီၣ်က့ၤ ပနီၢ်ခိနီၢ်သးန့ၣ်လီၤ.

တၢ်ပၥ်ဒိၣ်တၢ်ဆၢကတီၢ်လၢခ့ခါလၢ အမ့ၢ်ပစူးကါတၢ်ဆၢကတီၢ်လၢ တၢ်အကါဒိၣ်သ့ၣ်တဖၣ်လၢပဂီၢ်န့ၣ် ညီဒိၣ်မးလီၤ. ဘၣ်ဆၣ် လံၥ်ၦၤစံၣ်တဲၤတဲလီၤတၢ် ၃:၁၁ စံးဝဲလၢ ကစၢ်ယွၤပၥ်တၢ်အထူအယိာ်လၢ ပသးကံၢ်ပူၤန့ၣ် မ့ၢ်တၢ်ဒုးသ့ၣ်နီၣ်ထီၣ်က့ၤၦၤလၢ ပကမၤဆိတၢ်တဖၣ်လၢ အမ့ၢ်တၢ်လီၤထူလီၤယိာ်အဂီၢ်န့ၣ်လီၤ. တၢ်မၤအံၤကဒုးကဲထီၣ် မဲၥ်သကိးမဲၥ်ဒီး တၢ်အကါဒိၣ်ကတၢၢ် ဒ်ပစံးတၢ်အသိး, ကစၢ်ယွၤအတၢ်ပညိၣ်အထူအယိာ် “စးထီၣ်လၢအခီၣ်ထံးပၢၢ်လၢအကတၢၢ်” န့ၣ်လီၤ.