ယူၢ်အဲး (စ) သုးမုၢ်ဒိၣ်တဖၣ် အူထီၣ် ကွဲၤတဖၣ် (Tၠစျ) ဖဲမုၢ်ဟါလီၤကတီၢ် ဒီး ဖဲတၢ်သံ တၢ်ပှၢ်အကတီၢ်န့ၣ်လီၤႉ ယကမၢကမၣ် ဖဲယဖးဘၣ် ထါသး၀ံၣ်အဖျၢၣ်လၢ တၢ်စူးကါအီၤလၢ တၢ်အူကွဲၤအကတၢၢ်ကိးကျိၤ‚ ပာ်ဖျါထီၣ်တၢ်ဂ့ၢ်လၢ ‘‘ကစၢ်ယွၤအိၣ်ဘူးဒီးပှၤ’’ န့ၣ်လီၤႉ ဖဲတၢ်တချုးခံးလီၤကိးဟါ မ့တမ့ၢ် ဖဲတၢ်သူၣ်အုးသးအုးလၢ ပလီၤမၢ်ဘၣ်လၢပှၤလၢပအဲၣ်ဘၣ်အီၤတဂၤဂၤန့ၣ် ထါသး၀ံၣ်အဖျၢၣ်ဖိတဖၣ်‚ ဟ့ၣ်ဆူၣ်ထီၣ်ပှၤသုးဖိ တဖၣ်အသး လၢယွၤအတၢ်အိၣ်ဒီးပှၤ အတၢ်အုၣ်ကီၤအဃံအလၤန့ၣ်လီၤႉ
လၢလံာ်စီဆှံအလီၢ်လံၤတက့တူၢ်‚ ကွဲၤအသီၣ် မ့ၢ်တၢ်ဒုးသ့ၣ်နီၣ်ထီၣ် တၢ်တမံၤဆူ ပှၤအံၣ်စရၠာစး့လးဖိလၢကစၢ်ယွၤအိၣ်ဘူးဒီးအ၀ဲသ့ၣ်န့ၣ်လီၤႉ လၢတၢ်မၤမူးပွဲ ဒီးဘူၣ်တဖၣ်လၢ အမ့ၢ်လုၢ်လၢ်တနီၤလၢ တၢ်အၢၣ်လီၤလၢ ကစၢ်ယွၤဒီး ပှၤအံၣ်စရၠာစး့လး အဘၢၣ်စၢၤ‚ ပှၤယူဒၤဖိတဖၣ် ‘‘ဘၣ်အူကွဲၤ’’ (၄ မိၤ ၁၀း၁၀) လီၤႉ တၢ်အူထီၣ်ကွဲၤ မ့ၢ်တၢ်ဒုးသ့ၣ်နီၣ်ထီၣ် တၢ်တမံၤလၢ‚ တမ့ၢ်ထဲလၢကစၢ်ယွၤအိၣ်ဒီးအ၀ဲသ့ၣ် မ့မ့ၢ် အ၀ဲအိၣ်ကတဲာ်ကတီၤသးထီဘိ တဘျီလၢ်လၢ် ဖဲအ၀ဲသ့ၣ်လိၣ်ဘၣ်အီၤကတၢၢ်‚ ဒီးကစၢ်ယွၤစ့ၢ်ကီး ဆၢမုၢ်လၢ်တၢ်လၢ ကမၤစၢၤဘၣ်အ၀ဲသ့ၣ်န့ၣ်လီၤႉ
တနံၤအံၤ‚ ပလိၣ်ဘၣ်စ့ၢ်ကီး တၢ်ဒုးသ့ၣ်နီၣ်တဖၣ်လၢ ကစၢ်ယွၤအိၣ်ဘူး၀ဲ န့ၣ်လီၤႉ ဒီးလၢပတၢ်အိၣ်မူထွဲမၤထွဲတၢ်လၢ တၢ်ဘူၣ်ထီၣ်ဘါထီၣ်ယွၤလၢ ပကစၢ်ဒၣ်၀ဲ‚ ပ၀ဲစ့ၢ်ကီး ပကိးထီၣ်ယွၤသ့၀ဲလၢ တၢ်ထုကဖၣ် ဒီးတၢ်သး၀ံၣ်စံးထီၣ်ပ့တၢၤတၢ်န့ၣ်လီၤႉ ပတၢ်ထုကဖၣ်တဖၣ်‚ ကဘၣ်တၢ်ဆိကမိၣ်ထီၣ် ဒ်ကွဲၤအသီၣ်‚ ဃ့ကစၢ်ယွၤ ဒ်သိး ကမၤစၢၤလၢ်ပှၤန့ၣ်လီၤႉ ဒီးတၢ်ဟ့ၣ်ဂံၢ်ဟ့ၣ်ဘါအလၢအပှဲၤအံၤ မ့ၢ်‚ ထီဘိကစၢ်ယွၤ ဒိကနၣ်တၢ်လၢပကိးထီၣ်ဃ့ထီၣ်တဖၣ် (၁ ပ့း ၃း၁၂) န့ၣ်လီၤႉ ဆူပ၀ဲတဂၤစုာ်စုာ် တၢ်သကွံၢ်ကညးတဖၣ်‚ ကစၢ်ယွၤမၤဆၢက့ၤ၀ဲဃုာ်ဒီး တၢ်အုၣ်ကီၤလၢအတၢ်အိၣ် ဒီးပှၤလၢ အဟ့ၣ်ဆူၣ်ထီၣ်ပဂံၢ်ပဘါ ဒီးတၢ်မၤမုာ်ထီၣ်ပှၤလၢ တၢ်ဆၢကတီၢ်ကီခဲတဖၣ် ဒီးတၢ်သးအုးလၢသးသမူအပူၤန့ၣ်လီၤႉ