ၦၤနီၢ်ဒီမါဝၤခံဂၤန့ၣ် ပာ်လီၤအသးလၢ ကအိၣ်ဘှံးဝဲဒၣ်လၢတၢ်ဖံးတၢ်မၤအပူၤႇ မုာ်လၤသးခုအိၣ်ဆိးဝဲလၢ အဟံၣ်ဃံလၤတဖျၢၣ်, ကမၤန့ၢ် တၢ်သဘျ့အကတီၢ်အါအါႇ ဒီးကအိၣ်မူအိၣ်ဂဲၤဝဲ မုာ်မုာ်ခုၣ်ခုၣ်, ကမၤဂ့ၤမၤစၢၤဝဲ တၢ်အိၣ်ဖှိၣ်အတၢ်ဖံးတၢ်မၤတဖၣ် န့ၣ်လီၤ. ဘၣ်ဆၣ်, အကတီၢ်ဖဲန့ၣ် အဝဲသ့ၣ်နၢ်ဟူဝဲ တၢ်ကစီၣ်လၢ အဒုးနဲၣ်ပာ်ဖျါ ကစၢ်ခရံာ်အတၢ်ကတိၤ, လၢအိၣ်ပှဲၤဒီးအစိကမီၤ, “ဖဲဒၣ်ၦၤလၢတၢ်မိၣ်အုၣ်က့ၤခီၣ်က့ၤလီၤအသးတဂၤဂၤန့ၣ် ကမၤဟါမၢ်ကွံာ်ဝဲလီၤ. ဒီးဖဲဒၣ်ၦၤလၢအဒုးဟါမၢ်အသးလၢ ယဃိတဂၤဂၤန့ၣ် ကထံၣ်န့ၢ်က့ၤအီၤ” (မး ၁၆:၂၅) အဂ့ၢ်န့ၣ်လီၤ. လံာ်စီဆှံတဆၢအံၤ, ပာ်ဖျါဝဲဒၣ် ၦၤလၢကဟ့ၣ်လီၤအးလီၤအတၢ်အိၣ်မူအိၣ်ဂဲၤ, ဒီးအလီၢ်မ့ၢ်အိၣ်, အသးသမူဒၣ်လဲာ်, ကဟ့ၣ်လီၤကွံာ်ဝဲဒၣ် လၢကစၢ်ခရံာ်အဂီၢ်န့ၣ်လီၤ.

လၢခံန့ၣ် နီၢ်ဒီမါဝၤခံဂၤ ဖးဘၣ်ဝဲ တၢ်ဘူၣ်တၢ်ဘါအတၢ်ကွဲး လၢအပာ်ဖျါ လံာ်စီဆှံတဆၢအံၤန့ၣ်လီၤ. လၢခံတယံာ်ဘၣ်, ထံယံၤကီၢ်ယံၤတၢ်လီၢ်အဂၤ, ၦၤနဲၣ်တၢ်လၢအကွၢ်ထွဲ ဖိၣ်ဃဲအဟံၣ်တဂၤန့ၣ် မ့ၢ်လၢအသးၦၢ်တ့ၢ်လံအဃိ, လၢအလီၢ်န့ၣ် ဒ်သိးနီၢ်ဒီမါဝၤခံဂၤ ကဟဲမၤဝဲအဂီၢ်, တၤဝဲဒၣ်အဝဲသ့ၣ်န့ၣ်လီၤ. လၢတၢ်စံးဆၢက့ၤ ကစၢ်ယ့ၣ်ၡူး အတၢ်ကိးအဂီၢ်, နီၢ်ဒီမါဝၤခံဂၤန့ၣ် ဆါကွံာ်ဝဲ အဟံၣ်, ဒီး “တအိၣ်ဘှံးဝဲဒၣ်လၢတၢ်ဖံးတၢ်မၤလၢၤဘၣ်.” အဝဲသ့ၣ်ခံဂၤ, လၢဖိၣ်ဃဲအဟံၣ်အဂီၢ်န့ၣ် ကဲထီၣ်ဝဲ ၦၤနဲၣ်တၢ်တဖၣ် လၢထံကီၢ်အဂၤတဘ့ၣ်န့ၣ်လီၤ. အဝဲသ့ၣ် မၤလီၤမၢ်ကွံာ် အသးသမူတမံၤ, ဒ်သိးကဒိးန့ၢ်ဝဲ သးသမူတဂၤတမံၤအဂီၢ်, အဝဲသ့ၣ် ပျဲပျၢ်ကွံာ် တၢ်အိၣ်ဘှံးလၢတၢ်ဖံးတၢ်မၤ, “ဒ်သိးကပိာ် ကစၢ်ခရံာ်အခံ” (:၂၄) အဂီၢ်, ညိကွံာ်အသး, ဒီးကွၢ်ထွဲဝဲ ဖိသၣ်လၢအလုၢ်ဒိၣ်ၦ့ၤဒိၣ်တဖၣ်န့ၣ်လီၤ.

မ့ၢ် ကစၢ်ယွၤ အတၢ်ကိးၦၤ ကျိၤကျဲတမံၤမံၤ, ဒ်သိးပကစူးကွံာ်ညိကွံာ် ပတၢ်လုၢ်ဒိၣ် ၦ့ၤဒိၣ်တမံၤမံၤ, ဒ်သိးပကဃုထံၣ်န့ၢ် တၢ်သူၣ်ခုသးခုလၢ တၢ်ဒိကနၣ်အပူၤ, ပကဒိးန့ၢ် ခွဲးယာ်အသီလၢ ပကမၤအတၢ်မၤအဂီၢ်န့ၣ်ဧါ. ကမ့ၢ်ဝဲဒၣ် ဒ်တၢ်မၤအဆံးဖိလၢ ပဟ့ၣ်လီၤ ပတၢ်ဆၢကတီၢ် လၢတၢ်မၤဂ့ၤမၤစၢၤၦၤတဂၤဂၤ, (မ့) ကမ့ၢ်ဝဲဒၣ် ဒ်တၢ်မၤအဒိၣ်အမုၢ် လၢတၢ်စူးကွံာ်ညိကွံာ် ပတၢ်မံမီၢ်, ဒီးလူၤပိာ်ထွဲ ဖံးမၤတၢ် လၢကစၢ်ယွၤအမံၤအဂီၢ်န့ၣ်လီၤ.

တၢ်လၢပကဘၣ်သ့ၣ်ညါလီၢ်တံၢ်လီၤဆဲးန့ၣ် ပကမၤ အတၢ်မၤအဂီၢ်, ကစၢ်ယွၤ မ့ၢ်ကိးၦၤလၢ ပကဘၣ် ပျဲပျၢ်ကွံာ်တၢ်တမံၤမံၤအကတီၢ်, ပမ့ၢ်စံးဆၢ အတၢ်ကိးအံၤန့ၣ် ကဆှၢၦၤဆူ တၢ်အိၣ်မူအခိၣ်ဖး, လၢအမၤလၤကပီၤယွၤ (:၂၇) န့ၣ်လီၤ.