Paul အတံၤသကိး Owen, မ့ၢ်ပှၤခရံာ်ဖိကဒဲကဒဲတဂၤ, ဒီးအိၣ်ဆိးဝဲလၢအဟံၣ်ကပၤန့ၣ် တဲခဲၣ်ရၤလီၤဝဲ Paul အဂ့ၢ်, လၢအတဂ့ၤအတဘၣ်တဖၣ်န့ၣ်လီၤ. Paul တူၢ်ဘၣ်ဝဲ ဒ်တၢ်မၤစၢၤတအိၣ်လၢၤဘၣ်အသိးအဃိ, ဃ့ထုကဖၣ်ဝဲဒၣ်လၢႇ “ယွၤဧၢႇ ယကအးလီၤတၢ်ဂ့ၢ်အံၤဆူ နစုပူၤန့ၣ်လီၤ. ဒ်သိးကသ့ၣ်ညါဝဲ အတၢ်ကမၣ်အဂီၢ်, ဝံသးစူၤ မၤစၢၤလၢ်ဘၣ် Owen” န့ၣ်လီၤ. Paul ဆိကမိၣ်ဝဲလၢ ကစၢ်ယွၤ ကမၢ တၢ်အိၣ်ဖှိၣ်
သရၣ် ကစံးကတိၤတၢ်ဒီး Owen (မ့) ကဒုးသ့ၣ်ညါက့ၤအတၢ်ဒဲးဘး ခီဖျိတၢ်မၤလိလံာ်စီဆှံသ့ၣ်သ့ၣ်န့ၣ်လီၤ. ဘၣ်ဆၣ်, ကစၢ်ယွၤ စူးကါဝဲ ထံပီၤလၢအသ့ၣ်ဖး တဘိန့ၣ်လီၤ.
ဘၣ်ဖဲဖးဖီမုၢ်တနၤန့ၣ် တၢ်ဟဲဒိတကျိာ် Paul အဟံၣ်တြဲၤဆူၣ်ဆူၣ်န့ၣ်လီၤ. လၢတၢ်သါဆဲးဖှိးအပူၤန့ၣ် Owen စံးဘၣ်အီၤလၢ “ဟဲမၤစၢၤယၤ, ယကးတံာ်တ့ၢ်လံ ထံပီၤမိၢ်ၦၢ်အကျိၤဒၣ်လဲာ်, ထံဟဲယွၤလီၤဝဲ တကတၢၢ်ဒံးဘၣ်.” ဒ်အမ့ၢ်ၦၤမၤတၢ်ဖိတဂၤလၢအဘှီဂ့ၤဝဲ ထံပီၤအကျိၤတဖၣ်အသိးႇ Paul ဘှီဂ့ၤထီၣ်က့ၤဝဲဒၣ် တၢ်လုၣ်ထံလီၢ် အထံပီၤတဖၣ်န့ၣ်လီၤ. တယံာ်ဘၣ်, Owen န့ၣ် ဃ့ကညးအီၤန့ၣ်လီၤ.
လၢတၢ်တဆိကမိၣ်အပူၤန့ၣ် ကစၢ်ယွၤ အတၢ်မၤစၢၤ ဟဲသ့ဝဲဒၣ် လၢကျိၤကျဲလီၤဆီတဖၣ်အပူၤန့ၣ်လီၤ. လံာ်စီဆှံ ပာ်ဖျါဝဲ “ဒီးၦၤအံၣ်စရ့လးဖိမၤ မိၤအးအစီၤပၤဧ့းကလိၣ်အတၢ် တဆံဃိးနံၣ်” (စံၣ်ညီၣ် ၃:၁၄) အကတီၢ်, အဝဲသ့ၣ် “ကိးထီၣ်ဆူယွၤ, ဒီးယွၤဒုးဂဲၤဆၢထၢၣ်က့ၤတၢ်အုၣ်က့ၤခီၣ်က့ၤအီၤႇ စီၤအ့ဟူာ်” (:၁၅) န့ၣ်လီၤ. စီၤအ့ဟူာ် န့ၣ် သ့စူးကါဝဲအစုထွဲလၢအဆူၣ်တဂၤ, မၤဝဲဒၣ် ဘီဒီအ့ၣ်တၢ်ခံခီလၢာ်တဘ့ၣ် အထီတပျၢ်လၢအဂီၢ်, ဒီးစၢဃာ်လၢ အကံၣ်ဒုၣ်ထွဲအလိၤ လၢအကူအသိးအဖီလာ်, တၢ်လီၢ်လၢ ၦၤသုးဖိလၢ အသူစုစ့ၣ်တဖၣ် တပာ်ခူသူၣ်တၢ်စုကဝဲၤအလီၢ်, ဒ်သိးၦၤတဃုထံၣ်န့ၢ်အစုကဝဲအဂီၢ် (:၁၅-၁၆) န့ၣ်လီၤ. စီၤအ့ဟူာ် ဟံးန့ၢ်အဒီ, ဒီးမၤသံဝဲ စီၤပၤဧ့းကလိၣ် န့ၣ် တမ့ၢ်လၢ တၢ်ဒုးပျီဘၣ်. မ့မ့ၢ်လၢနီပူၤ, ဖဲအိၣ်ဝဲထဲခံဂၤအကတီၢ် (:၁၉-၂၁) န့ၣ်လီၤ.
တၢ်ဂ့ၢ်တဖၣ်ဝံၤႇ လၢ စီၤအ့ဟူာ် အတၢ်ကဲခိၣ်ကဲနၢ်အဖီလာ်န့ၣ် ၦၤအံၣ်စရ့လးဖိတဖၣ် အိၣ်ဘၣ်ဝဲ မုာ်မုာ်ခုၣ်ခုၣ် အနံၣ်ဃိးဆံ (:၃ဝ), တၢ်အံၤမ့ၢ် တၢ်ဒိးန့ၢ်ဝဲ တၢ်သဘျ့ အယံာ်ကတၢၢ်, လၢပှၤစံၣ်ညီၣ်ကွီၢ်တဖၣ် အစိၤဆၢကတီၢ်န့ၣ်လီၤ. စီၤအ့ဟူာ် အဂ့ၢ်န့ၣ် ဒုးသ့ၣ်ညါပှၤလၢ ကစၢ်ယွၤႇ လၢအကူၣ်တၢ်သ့, ဒီးအဒိၣ်စိဒိၣ်ကမီၤတဂၤန့ၣ် မၤတၢ်လၢကျဲအဒိၣ်အထီ, လၢပတဲဆိအဂ့ၢ်တသ့, (မ့) ပတၢ်ဆိကမိၣ်တထီၣ်ဘးအပူၤန့ၣ်လီၤ. ကစၢ်ယွၤမ့ၢ်ပယွၤ, လၢအတ့ဒုးအိၣ်ထီၣ်တၢ်အသီသ့တဂၤန့ၣ်လီၤ.