ဖဲမုၢ်ဆ့ၣ်ထီၣ်အကတီၢ်, ၡဲရဲၣ် (Cheryl) ပၢၢ်ထီၣ်ဝဲန့ၣ်ဒီး, လၢတၢ်ပျံၤတၢ်ဖုးအပူၤန့ၣ် ထံၣ်ဝဲဒၣ်လၢ တၢ်ဖီအီၣ်တၢ်အလီၢ်န့ၣ် ထံလုၣ်ဘၢကွံာ်ဝဲ လၢတနၤဃီအတီၢ်ပူၤန့ၣ်လီၤ. တလါလၢတၢ်ပာ်ဖှိၣ်ပိးလီတဖၣ်အပူၤႇ လၢတၢ်သ့စီသပၢၤလီခီတဖၣ်အလီၢ်, ဒီးလၢတၢ်ခုၣ်ဒၢအလီၢ်ခံန့ၣ် ထံတဖၣ် ပှဲၤပာ်ဖှိၣ်အသးန့ၣ်လီၤ. တကီၢ်ခါန့ၣ် အဝဲကိးဝဲဒၣ် ၦၤလၢအသ့ဘှီထံပီၤအကျိၤတဂၤ, ဒီးၦၤတဂၤအံၤ ထံၣ်ဝဲ နီၣ်ၦံၢ်ထံပိးလီ လၢတၢ်သ့စီသပၢၤလီခီအလီၢ်အဖီလာ်န့ၣ် ဟးဂီၤဝဲအဃိ, ဘှီဂ့ၤက့ၤဝဲအဆိအချ့န့ၣ်လီၤ. ထံတဖၣ်လၢတၢ်ဖီအီၣ်တၢ်အလီၢ်န့ၣ် Cheryl ဘၣ်ထုးစီကွံာ်ဝဲဒီတနံၤ, ဒီးအဟံၣ်လၢအဟးဂီၤတဖၣ်န့ၣ် စးထီၣ်ဘှီဂ့ၤဝဲဒၣ်န့ၣ်လီၤ. တၢ်လၢအလီၤသးအုးန့ၣ် ၦၤအဂၤသ့ၣ်တဖၣ်စ့ၢ်ကီး, ဒုးနဲၣ်ဖျါထီၣ် တၢ်ဂ့ၢ်ကီဒ်သိးအံၤအဃိ, ဖျါလၢနီၣ်ၦံၢ်ထံပိးလီအံၤ အိၣ်ဒီးအက့ၢ်ဂီၤဂံၢ်စၢ်ဘါစၢ်န့ၣ်လီၤ.

ဒ်ၦၤကညီတဖၣ် ခါဆူညါအဂီၢ်, တၢ်ထံၣ်တအိၣ်ဝဲဒၣ်လၢလၢပှဲၤပှဲၤအသိးန့ၣ်, ပကဘၣ်ပာ် ပတၢ်နာ်အပတီၢ်တတီၤလၢ ပပှ့ၤတၢ်ဖိတၢ်လံၤ အခီပနံာ်အလိၤ,ဃုာ်ဒီး, ၦၤအိၣ်ဆိးလၢပခိၣ်ပဃၢၤတဖၣ်အလိၤန့ၣ်လီၤ. ဘၣ်တဘျီဘျီ, ပကျဲးစၢးဃုထၢတၢ် လၢတၢ်ကူၣ်သ့ပူၤဒၣ်လဲာ်, ပပာ်လီၤကမၣ် ပနာ်သန့ၤတၢ်အလီၢ်အကျဲန့ၣ်လီၤ. ကစၢ်ယွၤ ဟ့ၣ်ပလီၢ် အၦၤဂီၢ်မုၢ်တဖၣ်လၢ အဝဲသ့ၣ် အတၢ်နာ်သန့ၤအသးလၢ ကီၢ်အဲၤကူပတူးအလိၤန့ၣ် ကကဲထီၣ်တၢ်သူၣ်ဟးဂီၤသးဟးဂီၤ လၢအဝဲသ့ၣ်အဂီၢ်, “ယွၤညိကွံာ်တၢ်လၢနသန့ၤနသးလၢအီၤတဖၣ်, ဒီးနတဘီၣ်ထီၣ်ညီလၢအပူၤဘၣ်” (ယံးရမံယၤ ၂:၃၇) အဂ့ၢ်န့ၣ် တဒ်သိးလိာ်အသးဒီး Cheryl အတၢ်ဂ့ၢ်ကီဘၣ်န့ၣ်လီၤ.

ကစၢ်ယွၤ ဟ့ၣ်ပလီၢ် အပှၤဂီၢ်မုၢ်ဘၣ်ဆၣ်, ကီၢ်ယူဒၤန့ၣ် ပာ်ဖှိၣ်ထီၣ်အသးဒီး ကီၢ်အဲၤကူပတူး, ဒီးအကတၢၢ်န့ၣ် ဘၣ်တၢ်မၤနၢၤအဝဲသ့ၣ်လၢ ဒုၣ်ဒါတဖၣ်န့ၣ်လီၤ. ဒ်ကီၢ်ယူဒၤအသိးႇ ပဝဲနၤယၤ, ပနာ်သန့ၤ “ကမါသ့ၣ်ဖးလၢ အဟံးဃာ်ထံတသ့ဘၣ်” (:၁၃) အလိၤ, ဒီးပတၢ်နာ်လီၤထူလီၤယိာ် မ့ၢ်ဝဲဒၣ်ထဲ ကစၢ်ယွၤတဂၤဧိၤအဂ့ၢ်န့ၣ် ပသးပ့ၤနီၣ်ကွံာ် သ့ဝဲဒၣ်စ့ၢ်ကီးန့ၣ်လီၤ. ကစၢ်ယွၤ, ဒီးအနီၢ်ကစၢ်ဒၣ်ဝဲ မ့ၢ်ထံမူန့ၣ် ဒ်သိးပကနာ်သန့ၤအီၤအဂီၢ်, အဝဲကွဲမုၢ်ဝဲဒၣ်ပှၤန့ၣ်လီၤ. ကစၢ်ယွၤ ကမၤစၢၤပှၤထီဘိန့ၣ်လီၤ.