ယဝၤန့ၣ် အိၣ်တဆူၣ်ဆိးက့ဒိၣ်ဒိၣ်မုၢ်မုၢ်အဃိ, အဂံၢ်အဘါလီၤစၢ်ဝဲန့ၣ်လီၤ. ဘၣ်ဆၣ်, ဒ်သိးအနီၢ်ခိဂံၢ်ဘါကဆူၣ်ထီၣ်က့ၤအဂီၢ်, ၦၤကူစါယါဘျါနီၢ်ခိတၢ်ဟူးတၢ်ဂဲၤသရၣ်န့ၣ် မၢအမၤ နီၢ်ခိတၢ်ဟူးတၢ်ဂဲၤတဖၣ်န့ၣ်ဒီး, ဒဲ(န) (Dan) အသးတဆူၣ်ကဲၣ်ဆိးဘၣ်. ဘၣ်ဖဲမုၢ်တနံၤန့ၣ် ယမၤထွဲနီၢ်ခိအတၢ်ဟူးတၢ်ဂဲၤဒီးအီၤန့ၣ်လီၤ. ဖဲယမၤထီထီၣ်ယစုဒုၣ်, ဒီးလၢတၢ်နံၤကမှံအပူၤန့ၣ် ယစံးဘၣ်အီၤလၢ “ပဂံၢ်ပဘါဆူၣ်ထီၣ်လံ” န့ၣ်လီၤ. တယံၥ်ဘၣ်, ဒ်ပညီနုၢ်မၤတၢ်ဟူးတၢ်ဂဲၤ လၢကမၤဆူၣ်ထီၣ်က့ၤဂံၢ်ဘါ အတၢ်ဟူးတၢ်ဂဲၤသၢကလုာ်ဝံၤ, ယဝၤစ့ၢ်ကီးနံၤထီၣ်ဝဲဒၣ်န့ၣ်လီၤ. အခီၣ်ထံး, တၢ်ဟူးတၢ်ဂဲၤလၢပကမၤန့ၣ်ပထံၣ်လၢတၢ်မၤအကီအခဲဘၣ်ဆၣ်, လၢတၢ်ကမၢကမၣ်အပူၤန့ၣ် ပဝဲခံဂၤလိာ်န့ၣ် ပမုာ်လၤသးခုမၤသကိး နီၢ်ခိအတၢ်ဟူးတၢ်ဂဲၤတဖၣ်န့ၣ်လီၤ.

တၢ်ဖံးသကိးမၤသကိး တၢ်မၤအကီအခဲန့ၣ် ဒုးအိၣ်ထီၣ် ဂံၢ်ဘါအသဟီၣ်အဒိၣ်အယိၥ်အဂ့ၢ်န့ၣ် ကစၢ်ယ့ၣ်ရှူး အိၣ်မူဟ့ၣ်ဒိဝဲ အဂ့ၤကတၢၢ်န့ၣ်လီၤ. ဖဲ ကစၢ်ယ့ၣ်ရှူး ဟးဝ့ၤဝီၤသိၣ်လိတၢ်လၢ “သဝီတဖျၢၣ်ဘၣ်တဖျၢၣ်” အကတီၢ်, “ဒီးကိးန့ၢ် အပျဲၢ်အဘီၣ်တဆံခံဂၤန့ၣ်, ဒီးမၢအလဲၤတၢ်ခံဂၤခံဂၤ,… ဒီးဟ့ၣ်လီၤအီၤလၢတၢ်အစိအကမီၤ လၢတၢ်နါတဖၣ်အဖီခိၣ်” (မၢ် ၆:၆-၇) န့ၣ်လီၤ.

အပျဲၢ်အဘီၣ်တဆံခံဂၤ, မ့ၢ်ဘၣ်လဲၤဝဲဒၣ်ထဲတဂၤစုာ်စုာ်န့ၣ်ဒီး, တၢ်လဲၤန့ၣ်ကချ့ဝဲသ့ၣ်သ့ၣ်, ဒီးကလဲၤတုၤဝဲတၢ်လီၢ်အယံၤန့ၣ်လီၤ. ဘၣ်ဆၣ်, ဖဲအဝဲသ့ၣ်ဘၣ်မၤဝဲ တၢ်မၤအကီအခဲအကတီၢ်, မ့ၢ်မၤသကိးတၢ်ခံဂၤန့ၣ်ဒီး, တၢ်မၤကကဲထီၣ်ဝဲ ဒိၣ်ဒိၣ်မုၢ်မုၢ်တုၤလီၤတီၤလီၤန့ၣ်လီၤ. တဂၤမ့ၢ်မၤကမၣ်ဘၣ်တၢ်န့ၣ် အတဂၤကထံၣ်သ့ၣ်ညါဝဲ, ဒီးကဘှီဂ့ၤ မၤဘၣ်က့ၤတၢ်, ဒီးတဂၤမ့ၢ်တကျဲးစၢးဖံးတၢ်မၤတၢ် (မ့) အတၢ်သးစဲမ့ၢ်တအိၣ်ဘၣ်န့ၣ်ဒီး, ကဟ့ၣ်ဂံၢ်ဟ့ၣ်ဘါလိၥ်သကိးသးအဂီၢ်န့ၣ်လီၤ.

“ဒီးအဝဲသ့ၣ်တဖၣ်ဟးထီၣ်, ဒီးစံၣ်တဲၤတဲလီၤတၢ်လၢ ၦၤဘၣ်ပီၢ်ယၢ်လီၤက့ၤအသး, ဟီထီၣ်ကွံၥ်တၢ်နါအါဒု, ဒီးဖှူ ၦၤတအိၣ်ဆူၣ်အိၣ်ချ့ဘၣ်လၢသိအါဂၤ, ဒီးမၤဘျါက့ၤအီၤ” (:၁၂-၁၃) န့ၣ်လီၤ. အပျဲၢ်အဘီၣ်တဖၣ် အစိကမီၤဒိၣ်ထီၣ်အါထီၣ်ဝဲ, ဒီးတမ့ၢ်လၢပှၤခံဂၤအစိကမီၤလၢၤဘၣ်. ခီဖျိလၢသးစီဆှံ အတၢ်ဟ့ၣ်စိဟ့ၣ်ကမီၤအဃိ, အဂံၢ်အဘါဆူၣ်ထီၣ်လၢကစၢ်ခရံၥ်အပူၤ အဝဲသ့ၣ်, နီၣ်ဟးထီၣ်တၢ်နးတၢ်ဖှီၣ်တဖၣ်, မၤဘျါက့ၤတၢ်ဆူးတၢ်ဆါကိးမံၤဒဲး, လၢကစၢ်ယ့ၣ်ရှူးအမံၤန့ၣ်လီၤ. ဒ်ယဝၤဒီးယၤ ပမၤလိန့ၢ်တ့ၢ်ဝဲအသိး, တၢ်မၤ သကိးတၢ်ခံဂၤဂ့ၤန့ၢ်တဂၤ, လီၤဆီဒၣ်တၢ် လၢကစၢ်ခရံၥ်အပူၤန့ၣ်လီၤ.