မ့ၢ်လၢပှၤလိၥ်ကွဲတၢ်ဖိတဖၣ် မၤနၢၤဝဲ တၢ်လိာ်ကွဲဖျၢၣ်ထူညီညီဖိအဃိ, Philadelphia Eagles’ အၦၤလိၥ်ကွဲဖျၢၣ်ထူစဲၣ်နီၤ စ့ကွ့(န) ဘၤကလ့ၤ (Saquon Barkley) ဆ့ၣ်နီၤအိၣ်ဘှံးဝဲလၢ ခးဆ့ၣ်နီၤဖးထီအလိၤ, ဒီးတလိၣ်နုာ်လီၤလိာ်ကွဲလၢၤဘၣ်. အကတီၢ်ဖဲန့ၣ် ပှၤနဲၣ်လိဖျၢၣ်ထူအသရၣ်န့ၣ် ဟဲဆူအအိၣ်, ဒီးစံးဘၣ်အီၤလၢ အဝဲဘူးတ့ၢ်မးလၢကဒိးန့ၢ် တၢ်ကွဲးနီၣ်အသီ (New record) အဃိ, မ့ၢ်အဲၣ်ဒိးနုၥ်လီၤလိၥ်ကွဲဒံးဧါန့ၣ်ဒီး, အဝဲစံးဆၢဝဲဒၣ် “လၢယဂီၢ်တၢ်ဂ့ၢ်ကီတအိၣ်ဘၣ်. ယအဲၣ်ဒိးကွၢ်ကီ ၦၤသးစၢ်သ့ၣ်တဖၣ် လိာ်ကွဲမၤနၢၤတၢ်” န့ၣ်လီၤ. ဒ်သိးၦၤသးစၢ်ဖိတဖၣ်လၢအလိာ်ကွဲသကိးတၢ်ဒီးအီၤသ့ၣ်တဖၣ် ကလိၥ်ကွဲဘၣ်ဝဲအဂီၢ်, အဝဲဃုထၢဝဲဒၣ်လၢ ကစူးကွံၥ်ညိကွံာ် တၢ်ကွဲးနီၣ်အသီန့ၣ်လီၤ.
ဖဲၦၤအံၣ်စရ့လးဖိတဖၣ် အိၣ်ဟးထီၣ်ဝဲလၢ ကီၢ်အဲကူပတူး, ဒီးနုာ်လီၤအိၣ်ဆိးလၢ ကီၢ်တၢ်စံးပၥ်အပူၤအကတီၢ်, စီၤကၤလ့း မ့ၢ်ၦၤလၢအအိၣ်မူတ့ၢ်ဝဲဒၣ် ခံဂၤအကျါတဂၤ (ကွၢ် ၄ မိၤရှ့ ၁၄:၃၀) န့ၣ်လီၤ. အဝဲမၤနၢၤ တၢ်ဒုးတၢ်ယၤ, ဒီးနီၣ်ဟးထီၣ်ကွံၥ် ဒုၣ်ဒါတဖၣ် (ရှူ ၁၅:၁၄) န့ၣ်လီၤ. ခဲကနံၣ်အံၤ, ဖဲအဝဲဘၣ်ကွၢ်ဆၢၣ်မဲာ် ၦၤကနၤဧၣ်ဖိအတိၥ်ဧိၤတာ်ဧိၤအကတီၢ်, စီၤကၤလ့း စံးဝဲဒၣ် “ၦၤလၢအကျီကွံၥ် ကံးရယးစ့ဖ့ၢ်, ဒီးမၤန့ၢ်အီၤတဂၤန့ၣ် ယကဟ့ၣ်လီၤအီၤလၢ ယဖိမုၣ်နီၢ်ဧၤကစ့ၤလၢအမါ” (:၁၆) န့ၣ်လီၤ. စီၤဧီၤသန့လး မၤန့ၢ်ဝဲဒီးဒိးန့ၢ်ဝဲ နီၢ်ဧၤကစ့ၤန့ၣ်လီၤ. စီၤကၤလ့း ဟ့ၣ်လီၤအဝဲသ့ၣ် ကီၢ်လၢကလံၤထံးတခီ (:၁၉), ဘၣ်ဆၣ်, နီၢ်ဧၤကစ့ၤ လဲၤဆူအပၢ်အအိၣ်, ဒီးဃ့သကွံၢ်ကညးစံးဝဲ “ဆိၣ်ဂ့ၤလၢ်ဘၣ်ယၤတက့ၢ်,” ဒီး “ဟ့ၣ်လီၤလၢ်စ့ၢ်ကီးလၢ ထံထီၣ်ပၢၢ်တဖၣ်န့ၣ်တက့ၢ်” (:၁၉) န့ၣ်လီၤ.
ဒ်သိးကမၤန့ၢ်ဝဲ ကီၢ်တၢ်စံးပၥ်အဂီၢ်န့ၣ် စီၤကၤလ့း ဘၣ်ထဲးဂံၢ်ထဲးဘါဒုးတၢ်ဆူၣ်ဆူၣ်လၢအနံၣ်လွံၢ်ဆံအတီၢ်ပူၤန့ၣ်လီၤ. စီၤကၤလ့း အတၢ်အိၣ်ဆူၣ်အိၣ်ချ့န့ၣ် ဂ့ၤဝဲဒံးအဖၢမုၢ် (ရှူ ၁၄:၁၀-၁၁), ဒီးအဝဲမ့ၢ်အဲၣ်ဒိး ဟံးဃာ်ပၢၤဃာ် ထံထီၣ်ပၢၢ်လၢ အလုၢ်ဒိၣ်ပှ့ၤဒိၣ်တဖၣ်လၢအဂီၢ်န့ၣ် သ့ဒံးဝဲဘၣ်ဆၣ်, တမၤဝဲဘၣ်.
တၢ်ဃုပာ်ဖှိၣ် စုလီၢ်ခီၣ်ခိၣ်တဖၣ်န့ၣ် ဒ်ပမုၢ်လၢ်တ့ၢ်ဝဲအသိး, အခီပညီတအိၣ်ဝဲဒၣ် ဒိၣ်ဒိၣ်အါအါလၢပဂီၢ်န့ၣ်ဘၣ်. မုၢ်တနံၤန့ၣ် နီၢ်တဂၤအတၢ်ကွဲးနီၣ်အလီၢ်န့ၣ် တၢ်ကွဲးနီၣ်
အသီတဖၣ် ကဟဲနုာ်လီၤဝဲန့ၣ်လီၤ. တၢ်လၢပဃုပၥ်ဖှိၣ်တ့ၢ်ဝဲတဖၣ် ကလဲၤတုၤဆူ ၦၤဂၤအအိၣ်န့ၣ်လီၤ. ဖဲပအိၣ်မူဒံးအဖၢမုၢ်, မ်ပကဟ့ၣ်တၢ်တက့ၢ်. ဒ် Saquon Barkley စံးဝဲအသိး, “မ်ပကဟ့ၣ်ခွဲးယၥ်တဖၣ်ဆူ ၦၤသးစၢ်တဖၣ်” န့ၣ်တက့ၢ်.