တၢ်ပနီၣ်ကွဲးအသး, “ဆ့ကၤရှၢးတအိၣ်, ခီၣ်ဖံးတအိၣ်, လၢနဂီၢ်, တၢ်မၤလၢပမၤန့ၢ်သ့တအိၣ်ဘၣ်” န့ၣ် နကထံၣ်ဝဲဒၣ်သ့ၣ်သ့ၣ်န့ၣ်လီၤ. ပမ့ၢ်ပၥ်ဖျါထီၣ်လၢ တၢ်ထံၣ်အဂ့ၤတကပၤန့ၣ် “အလီၢ်အိၣ်ဝဲလၢ နကဟဲကူသိးဆ့ကၤဒီးခီၣ်ဖံး” န့ၣ်လီၤ. တၢ်မၤဆၢက့ၤ တၢ်အိၣ်မူကျိၤကျဲ, ဒီးတၢ်ထံၣ်ဆိကမိၣ်လၢအထီဒါဟူးဂဲၤဝဲ ၦၤတဝၢအလုၢ်လၢ်ဆဲးလၤတဖၣ်, ဖဲ ၁၉၆၀ နံၣ်တဖၣ်အတီၢ်ပူၤအဂီၢ်, လၢမုၢ်နုၥ်အထံကီၢ်တဖၣ်န့ၣ် တၢ်ပနီၣ် ဒ်သိးအံၤတဖၣ်အံၤ, ပှၤသ့ၣ်ညါအီၤအါဝဲန့ၣ်လီၤ. ဒ်သိးဒီးၦၤခိၣ်သူထီ, ဒီးအါတက့ၢ်, ပှၤလၢတဒိးခီၣ်ဖံး ဟ့းပံၣ် (Hippies) သ့ၣ်တဖၣ်, အသုတဟဲမၤဘၣ်ထွဲလိာ်သးဒီးအဝဲသ့ၣ်အတၢ်မၤလီၢ်တဖၣ်အဂီၢ်န့ၣ် တၢ်ဖံးတၢ်မၤအကစၢ်တဖၣ် ဃုဝဲဒၣ်ကျဲတဖၣ်န့ၣ်လီၤ. ဝဲၦၤတဂၤလၢ်လၢ်န့ၣ် တၢ်ဖံးတၢ်မၤအကစၢ်တဖၣ် ညီနုၢ်အဲၣ်ဒိးမၤစၢၤဝဲဘၣ်ဆၣ်, ဒ်သိးပှၤကလဲၤနုၥ်လီၤဝဲဒၣ်ဆူ တၢ်သူၣ်ထီၣ်အပူၤအဂီၢ်, တၢ်လိၣ်နီၢ်နီၢ်မ့ၢ်ဝဲဒၣ် ခံမံၤန့ၣ် ပှၤကဘၣ်ကူသိး ဆ့ကၤဒီးခီၣ်ဖံးရှူဂ့ၤဂ့ၤဘၣ်ဘၣ်န့ၣ်လီၤ.

မံကၤအဆၢဒိၣ် ၆ အပူၤ, ဝံအတၢ်ကတိၤ “ဒီးမ့တမ့ၢ်ဘၣ် အမၢနမၤတၢ်တီတၢ်လိၤ, ဒီးအဲၣ်ဒိးတၢ်သးကညီၤ, ဒီးလဲၤတၢ်ဒီးနကစၢ်လၢနသးစူၤ” (:၈) အဂ့ၢ်န့ၣ် ပသ့ၣ်ညါအီၤ ဂ့ၤဂ့ၤဘၣ်ဘၣ်န့ၣ်လီၤ. တၢ်ဂ့ၢ်အံၤ, အါတက့ၢ်န့ၣ် သရၣ်သ့ၣ်တဖၣ် ကွဲးဝဲ, ဒီးစံၣ်တဲၤတဲလီၤဝဲဒၣ်န့ၣ်လီၤ. ဘၣ်ဆၣ်, တၢ်လၢအကါဒိၣ်နီၢ်မးတမံၤ, ဖျါဝဲဒၣ် ဖဲတၢ်ကတိၤတဖၣ်အံၤ အမဲၥ်ညါ, “မ့ၢ်အမၢနမၤမနုၤလဲၣ်” (:၈), တၢ်ကတိၤလၢအဒုးသ့ၣ်ညါ တၢ်ဘၣ်ယွၤအသးန့ၣ် ၦၤတနီၤအဲၣ်ဒိး လဲၤကပာ်ကွံၥ်ဝဲဒၣ်န့ၣ်လီၤ. လၢနတၢ်အိၣ်မူအပူၤ, နမ့ၢ်အဲၣ်ဒိးမၤလၤကပီၤကစၢ်ခရံၥ်နီၢ်နီၢ်န့ၣ်ဒီး, တၢ်သ့ၣ်ညါ တၢ်ဘၣ်ယွၤအသးန့ၣ် မ့ၢ်တၢ်လၢအလိၣ်သပှၢ်ကတၢၢ်တမံၤန့ၣ်လီၤ. တၢ်လုၢ်တၢ်ပာ်သ့ၣ်တဖၣ်န့ၣ် ကဖျါဃံဖျါလၤဝဲဘၣ်ဆၣ်, တမ့ၢ်တၢ်လၢ ကစၢ်ယွၤ အဲၣ်ဒိးဝဲဘၣ်. တၢ်တီတၢ်လိၤ, တၢ်သူၣ်ကညီၤသးကညီၤ, ဒီးတၢ်ဆီၣ်လီၤသး မ့ၢ်တအိၣ်ဘၣ်န့ၣ် ကစၢ်ယွၤ ကစံးဝဲဒၣ်လၢ “တၢ်ကဲဘျုးကဲဖှိၣ်တအိၣ်ဘၣ်” န့ၣ်လီၤ.

ကစၢ်ယွၤ တူၢ်လိၥ်ၦၤန့ၣ် တသန့ၤထီၣ်အသးလၢ ပတၢ်ဖံးတၢ်မၤအဃိဘၣ်န့ၣ် အခီပညီ တမ့ၢ်ဝဲဒ်န့ၣ်ဘၣ်. မ့ၢ်လၢအတၢ်အဲၣ်အဒိၣ်အယိၥ်အဃိ, ယွၤတူၢ်လိၥ်ၦၤန့ၣ်လီၤ. ဘၣ်ဆၣ်, ပမ့ၢ်အဲၣ်ဒိးမၤမုၥ်မၤသးခု ကစၢ်ယွၤအသးနီၢ်နီၢ်န့ၣ်ဒီး, ကယဲၢ်ပတၢ်အိၣ်မူအိၣ်ဂဲၤကိးမံၤဒဲးန့ၣ် ဘၣ်ထွဲလိာ်အသးဒီးတၢ်ဃုသ့ၣ်ညါ တၢ်ဘၣ်ယွၤ အသးန့ၣ်လီၤ. တၢ်လၢကစၢ်ယွၤ အဲၣ်ဒိးဝဲလၢ ပကမၤတဖၣ်န့ၣ် ပမ့ၢ်မၤအီၤန့ၣ်ဒီး, ကမ့ၢ်ဝဲဒၣ် ပမၤအတၢ်, ဒီးမ့ၢ်ပမၤလၤကပီၤကစၢ်ယွၤန့ၣ်လီၤ.