ဖဲ ယဖိဒိၣ် အဲ(န)ဒံၣ် (Andy) လဲၤဟးယူၤဝဲပထွံၣ်ဖိ လၢကျဲအကတီၢ်, သိလ့ၣ်တခိၣ်န့ၣ်နုာ်လီၤဘျၢၣ်အီၤန့ၣ်လီၤ. ၦၤတဂၤ ထံၣ်ထွဲဝဲဒီး, ဒ်သိး အဲ(န)ဒံၣ် အသးဖျၢၣ်ကစံၣ်ထီၣ်က့ၤအဂီၢ်န့ၣ် မၤဝဲဒၣ် CPR ဂ့ၢ်ဂီၢ်အူ အတၢ်မၤစၢၤ, ဒီးကိးန့ၢ်ဝဲသိလ့ၣ်လၢအစိၥ်ဆှၢၦၤဆါတခိၣ်န့ၣ်လီၤ. ခီဖျိကဟၣ်လၢအမၤစၢၤတၢ်သါထီၣ်သါလီၤအဃိ, အဝဲအိၣ်မူဒံးဝဲဒၣ်တနွံန့ၣ်လီၤ. လၢတၢ်လီၤကမၢကမၣ်အပူၤန့ၣ် တၢ်မၤစှၤလီၤ ကသံၣ်ကသီလၢအမၤဂၢၢ်တၢ်သ့ၣ်တဖၣ်, ဒီးခရံၥ်အိၣ်ဖျဲၣ်အနံၤဝံၤ, လၢခံတသီန့ၣ် အတၢ်အိၣ်အသးဂ့ၤထီၣ်က့ၤ, ဒီးစံးဘၣ်အမါ, အမိၢ်အပၢ်, အဝဲၢ်ခွါ, ဒီးအဖိယဲၢ်ဂၤန့ၣ်လၢ “ယအဲၣ်သု” န့ၣ်လီၤ. တၢ်သူၣ်ဟူးသးဂဲၤ, ဒီးတၢ်မုၢ်လၢ်သ့ၣ်တဖၣ် ဟဲဆူၣ်ထီၣ်ဝဲဘၣ်ဆၣ်, လၢခံတနံၤန့ၣ် သံဝဲဒၣ်န့ၣ်လီၤ.

ဖဲတၢ်သ့ၣ်နီၣ်ထီၣ်က့ၤအီၤ, ဒီးတၢ်မၤလၤကပီၤယွၤ အတၢ်ဘူၣ်တၢ်ဘါအကတီၢ်, အဖိတဖၣ်ခဲလၢၥ်, အသးအနံၣ်အလါကအိၣ်ဝဲဒၣ် တဆံယဲၢ်နံၣ်, ဒီးခံဆံတနံၣ် အဘၢၣ်စၢၤန့ၣ် စံးကတိၤလီၤတၢ် လၢမဲၥ်ထံမဲၥ်နိအပူၤန့ၣ်လီၤ. အဖိမုၣ် ကၠူလယၤ (Julia) ဖးဖျါထီၣ် တၢ်ကွဲးဖိတထံၣ် လၢအဒုးဆိကမိၣ် ၦၤနၢ်ဟူတၢ်ဖိတဖၣ်န့ၣ် “ပတၢ်လီၤမၢ်ဒိၣ်ဝဲအါဝဲထဲလဲၣ်န့ၣ် ပကကတိၤအီၤအလီၢ်တအိၣ်ဘၣ်. မ့မ့ၢ်ပကဘၣ်စံးကတိၤဝဲဒၣ်လၢပတၢ်အိၣ်တ့ၢ်ဒံးထဲလဲၣ်အဂ့ၢ်န့ၣ်လီၤ.”

ပှၤလၢအသ့ၣ်ညါတ့ၢ်အီၤ, ဒီးအဲၣ်ဘၣ်အီၤတဖၣ်အဂီၢ်, Andy အတၢ်သံန့ၣ် မ့ၢ်တၢ်လီၤမၢ်ဖးဒိၣ်နီၢ်နီၢ်န့ၣ်လီၤ. အဝဲအိၣ်မူအိၣ်ဂဲၤ တၢ်အိၣ်မူအဃံအလၤ လၢကစၢ်ယ့ၣ်ရှူးအဂီၢ်အဃိ, ပသးသယုၢ်ဘၣ်အီၤဒိၣ်မးန့ၣ်လီၤ. တၢ်အိၣ်လီၤတဲာ်တ့ၢ်, ဒီးကဲထီၣ်တၢ်မုၢ်လၢ်လၢပဂီၢ်န့ၣ် ကမ့ၢ်တၢ်မနုၤတဖၣ်လဲၣ်. အ့းဖ့းစူးအဆၢဒိၣ် ၁ စံးကတိၤဝဲ သးအတၢ်ဆိၣ်ဂ့ၤတဖၣ် အိၣ်ဝဲလၢ Andy ဒီးၦၤစူၢ်နၥ်ကစၢ်ယ့ၣ်ရှူးတဖၣ်, “ဒ်သိးပကစီဆှံ, ဒီးတသံၣ်သူမီၢ်ကျၥ်ဘၣ်လၢအမဲၥ်ညါ” (:၄), “ပၥ်ၦၤလၢဖိအလီၢ် လၢခရံၥ်အဃိ” (:၅), “တၢ်ပှ့ၤက့ၤၦၤလၢအသွံၣ်, တၢ်ပျၢ်ပတၢ်ကမၣ်, ဒ်အဘျုးထူးအဖှိၣ်တီၤအသိး” (:၇) န့ၣ်လီၤ. “သးစီဆှံဘၣ်ဃးဒီးအတၢ်စံးပာ်” န့ၣ် အိၣ်ဆိးလၢပပူၤ, ဒီး “တၢ်ဟ့ၣ်ကီၤလၢပတၢ်န့ၢ်သါ” ပကအိၣ်မူဒီးအီၤ လီၤထူလီၤယိာ် (:၁၃-၁၄) အဂ့ၢ်န့ၣ်လီၤ.

ၦၤလၢအအဲၣ်ကစၢ်ယ့ၣ်ရှူးတဖၣ်န့ၣ် ကဒိးန့ၢ်ဝဲ အတၢ်ဟ့ၣ်ဘၣ်ဃးဒီး တၢ်အုၣ်က့ၤခီၣ်က့ၤအထူအယိၥ်န့ၣ်လီၤ.