ဖဲ အီကၢးစတံ(န) (Augustine) အဲၣ်ဒိးဟးထီၣ်လၢဟံၣ်, ဒီးကလဲၤဝဲဒၣ်ဆူ ဝ့ၢ်ဖးဒိၣ်လၢ အမံၤဟူသၣ်ဖျါဝဲလၢ တၢ်အိၣ်မူလုၢ်လၢ်တဂ့ၤတဖျၢၣ်န့ၣ်ဒီး, ဒ်သိးအသုတလဲၤဝဲအဂီၢ်, အမိၢ် မိၣ်နံကၣ် (Monica) န့ၣ် ဃ့သကွံၢ်ကညးကစၢ်ယွၤန့ၣ်လီၤ. ဘၣ်ဆၣ်, Augustine လဲၤဝဲသပှၢ်တၢၢ်, ဒီးအမိၢ်န့ၣ် အသူၣ်အုးသးအုးဝဲဒိၣ်မးဘၣ်ဆၣ်, လၢခံန့ၣ် ကစၢ်ယွၤစူးကါအီၤဖဲဝ့ၢ်တဖျၢၣ်အံၤန့ၣ်လီၤ. အကတီၢ်လၢခံ, အလံၥ်လၢအၢၣ်လီၤဝဲအတၢ်ဒဲးဘးအပူၤန့ၣ် Augustine ဃ့ဘါထုကဖၣ်ဝဲဒၣ် “လၢနတၢ်ကူၣ်သ့အဒိၣ်အယိၥ်အပူၤန့ၣ် နနၢ်ဟူတ့ၢ်နဲ ယမိၢ်အတၢ်ထုကဖၣ်တပယူၥ်ဃီ, ဒီးနဒုးကဲထီၣ်ယၤ တၢ်လၢယမိၢ်ဆၢမိၣ်န့ၢ်ဝဲအဒိၣ်ကတၢၢ်တမံၤ” န့ၣ်လီၤ. တမ့ၢ်ထဲလၢ Augustine ကဲထီၣ်ဝဲဒၣ် ၦၤစူၢ်က့ၤနၥ်က့ၤ ကစၢ်ယ့ၣ်ရှူးတဂၤန့ၣ်ဘၣ်. လၢတၢ်စံၣ်စိၤတဲစိၤအပူၤန့ၣ် မ့ၢ်စ့ၢ်ကီး ၦၤခရံၥ်ဖိလၢအကူၣ်သ့ဆိကမိၣ်တၢ်, လၢအဒိၣ်စိလုၢ်ဘၢသ့ၣ်တဖၣ်အကျါတဂၤန့ၣ်လီၤ.

ဘၣ်တဘျီဘျီ, တၢ်လၢပဃ့သ့ၣ်တဖၣ်န့ၣ် ကစၢ်ယွၤ တဟ့ၣ်ၦၤဘၣ်ဆၣ်, ဟ့ၣ်လီၤၦၤ တၢ်ကၢပှ့ၤကၢကလံၤဒိၣ်န့ၢ်အါန့ၣ်ဒံး တၢ်လၢပဃ့တဖၣ်အလီၢ်န့ၣ်လီၤ. ဒ် Monica အသိး, တၢ်လၢအတဒိးန့ၢ်ဘၣ်ဝဲန့ၣ် ပှၤတၢ်မၢဖိ စီၤပီလူး ဃ့ဝဲဒၣ် ကစၢ်ယွၤန့ၣ်လီၤ. “တၤဆှုၣ်” အိၣ်ဝဲလၢ စီၤပီလူး အဖံးအညၣ်အကျါ, ကမ့ၢ်တၢ်မနုၤလဲၣ်န့ၣ် ပတသ့ၣ်ညါလီၤတံၢ်ဘၣ်ဆၣ်, ၂ ကရံၣ် ၁၂:၇-၈ အပူၤန့ၣ် စီၤပီလူး အတၢ်ကတိၤ, “ဒ်သိးအကဟးဖးဒီးယၤဒီး, ယဃ့ကညးကစၢ်သၢစု” န့ၣ် ဒုးသ့ၣ်ညါပှၤလၢ စီၤပီလူး တူၢ်ဘၣ်ခီၣ်ဘၣ်ဝဲနးနးကလဲၥ်န့ၣ်လီၤ. ဒီးကစၢ်ယွၤ စံးဘၣ်အီၤ, “ယဘျုးယဖှိၣ်အါလံလၢနဂီၢ်လံ. အဂ့ၢ်ဒ်အံၤ, ယစိယကမီၤ လၢထီၣ်ၦဲၤထီၣ်လၢ တၢ်အဂံၢ်စၢ်အဘါစၢ်အပူၤ” (:၉) န့ၣ်လီၤ. အကတၢၢ်န့ၣ် စီၤပီလူး မၤကတၢၢ်ဝဲဒၣ် အတၢ်ကွဲးလၢ “ဒ်သိးခရံၥ်အစိအကမီၤကအိၣ်ကဆိးလၢယလိၤဒီး, ယသးခုဒီး, ယကပၥ်ယသးကဖၢလၢ, လၢယဂံၢ်စၢ်ဘါစၢ်အဃိ” (:၉) န့ၣ်လီၤ.

ဖဲပအိၣ်ခိးကွၢ်လၢ် ကစၢ်ယွၤ အတၢ်စံးဆၢတဖၣ် (မ့) ဒ်ပဆၢမုၢ်လၢ်တ့ၢ်ဝဲအသိး, တၢ်မၤမ့ၢ်တကဲထီၣ်လိၣ်ထီၣ်အကတီၢ်, စီၤပီလူး အတၢ်စံးဆၢမၤဆၢက့ၤတၢ်န့ၣ်ဒုးထံၣ်ၦၤ ခါဆူညါကျဲလၢပကဘၣ်ပိၥ်အီၤန့ၣ်လီၤ. ကယဲၢ်တၢ်ကိးမံၤဒဲးအပူၤန့ၣ် ကစၢ်ယ့ၣ်ရှူး မ့ၢ်ဝဲဒၣ် ပတၢ်မုၢ်လၢ်, ဒီးလၢအဂံၢ်ဘါအစိအကမီၤအပူၤန့ၣ် ပဒိးန့ၢ်ဘၣ်တၢ်အါန့ၢ်ဒံးတၢ်လၢပလိၣ်ဘၣ်တဖၣ်န့ၣ်လီၤ.