အံၣ်သဲၣ်(န) (Ethan) အတၢ်မၤတအိၣ်ဝဲဒၣ် တနံၣ်ဃၣ်ဃၣ်ဝံၤ, အကတၢၢ်န့ၣ် ကမၤတၢ်အဂီၢ်, ဒိးန့ၢ်ဝဲခွဲးယၥ်အဂ့ၤဘၣ်ဆၣ်, အမါန့ၣ် တြီအီၤ, ဒ်သိးအသုတတူၢ်လိၥ်ဝဲန့ၣ်လီၤ.အမါသံကွၢ်အီၤ, “တၢ်မၤန့ၣ် ဘၣ်ကဂ့ၤလၢနဂီၢ်ဧါ. နကဘၣ်မၤတၢ်န့ၣ် မုၢ်နၤအကတီၢ်, ဒီးဒ်နတၢ်မၤလၢအပူၤကွံာ်အသိး, နကဘၣ်ဂုာ်ကျဲးစၢးလဲၤထီၣ်ဘါယွၤ လၢမုၢ်နံၤဒိၣ်ဂီၤခီ န့ၣ်လီၤ.” ဘၣ်ဃးဒီးအတၢ်မၤအဂ့ၢ်န့ၣ် Ethan ဃ့ထုကဖၣ်, ဒီးဆိကမိၣ်ထီၣ်ဝဲလီၤတံၢ်လီၤဆဲးဝံၤ, ဆၢတဲၥ်ဝဲဒၣ်လၢ တတူၢ်လိၥ်တၢ်မၤဘၣ်န့ၣ်လီၤ. ဘၣ်ဃးဒီးတၢ်ဖံးတၢ်မၤန့ၣ် တၢ်ဂ့ၢ်ကီတအိၣ်ဝဲ နီတမံၤဘၣ်ဆၣ်, တမ့ၢ်တၢ်ဂ့ၤလၢအဂီၢ်န့ၣ် အဝဲသ့ၣ်ညါဝဲဒၣ်န့ၣ်လီၤ. တဘျုးလါလဲၤပူၤကွံာ်ဝံၤန့ၣ်ဒီး, အဝဲ ဒိးန့ၢ်တၢ်ဖံးတၢ်မၤအဂၤတခါလၢ ကဘၣ်မၤဝဲဒၣ်လၢမုၢ်ဆါခီအကတီၢ်, ဒီးဒိးန့ၢ်ခွဲးယာ်လၢ ကလဲၤဘူၣ်သကိးဘါသကိးယွၤအဂီၢ်န့ၣ်လီၤ.

ကယဲၢ်တၢ်ဆၢတဲၥ်ခဲလၢၥ် အိၣ်ဖျါဝဲ ဒ်တၢ်ဆၢတဲာ်အဂ့ၤအဘၣ်အသိးတဖၣ်န့ၣ် တမ့ၢ်တၢ်လၢအမၤလၤကပီၤ ကစၢ်ယွၤ, (မ့) တမ့ၢ်တၢ်ဆၢတဲာ်လၢအကူၣ်သ့ကူၣ်ဘၣ်န့ၣ်ဘၣ်. ပမ့ၢ်ကွၢ်တၢ်အဒိန့ၣ် ပှၤအံၣ်စရ့လးဖိသ့ၣ်တဖၣ် ဃ့ဝဲဒၣ် စီၤပၤန့ၣ် ကမ့ၢ်ဝဲတၢ်မၤလၢအဂ့ၤသ့ၣ်သ့ၣ်န့ၣ်လီၤ. ဝံ ရှမူၤအ့လး အဖိခွါသ့ၣ်တဖၣ်န့ၣ် တကြၢးကဲခိၣ်ကဲနၢ်ဘၣ် (၁ ရှမူၤ ၈:၃), ဒီးဘီမုၢ်အဂုၤအဂၤသ့ၣ်တဖၣ်န့ၣ် မ့ၢ်လၢအအိၣ်ဒီးစီၤပၤအဃိ, ဖျါဝဲဒၣ် ဒ်တၢ်ဂ့ၢ်ကီတအိၣ်ဘၣ် (:၅,၂၀) အသိးန့ၣ်လီၤ. ဘၣ်ဆၣ်, ဘၣ်ဃးဒီးတၢ်နၥ်သန့ၤထဲလၢ ၦၤကညီတဖၣ်အဂ့ၢ်န့ၣ် ကစၢ်ယွၤ ဟ့ၣ်ပလီၢ်ဝဲ အပှၤဂီၢ်မုၢ်န့ၣ်လီၤ. အဂ့ၢ်ဒ်အံၤ, ထဲဒၣ်ယွၤတဂၤဧိၤန့ၣ် မ့ၢ်အဝဲသ့ၣ်အစီၤပၤနီၢ်နီၢ်, လၢကဒီတဒၢ, ဒီးကဟ့ၣ်လီၤတၢ်လၢအဝဲသ့ၣ်အဂီၢ် လၢလၢၦဲၤၦဲၤ (:၇,၁၁-၁၈) တဂၤန့ၣ်လီၤ. ၦၤအံၣ်စရ့လးဖိတဖၣ် ဃ့န့ၢ်တၢ်ဆူၣ်ဆူၣ်ကိၤကိၤ (:၁၉) တုၤဒၣ်လဲာ်, ကစၢ်ယွၤ စံးဘၣ် ဝံ ရှမူၤအ့လးလၢ “တမ့ၢ်ဘၣ် အညိကွံၥ်နၤဘၣ်, မ့ၢ်အညိကွံၥ်ယၤ, ဒ်သိးယသုတကဲစီၤပၤလၢအဖီခိၣ်တဂ့ၤ” (:၇)န့ၣ်လီၤ. အကတီၢ်လၢခံန့ၣ် ၦၤအံၣ်စရ့လးဖိတဖၣ် ကဘၣ်နးဘၣ်ဖှီၣ်ဝဲဒၣ်လၢ စီၤပၤ အအၢအသီတဖၣ် အတၢ်ပၢဆှၢမၤအၢမၤနးတၢ်အဖီလၥ်န့ၣ်လီၤ.

ၦၤဟီၣ်ခိၣ်ဖိအတၢ်ကူၣ်သ့န့ၣ် ကဆှၢၦၤဆူ တၢ်နာ်သန့ၤလီၤပသး, လၢတၢ်နာ်သန့ၤကစၢ်ယွၤအလီၢ်န့ၣ်လီၤ. ယွၤအကျဲတဖၣ်န့ၣ် တမ့ၢ်လၢကဒ်သိးလိာ်အသးဒီးပှၤကညီအတၢ်ထံၣ်ဘၣ်ဆၣ်, မ့ၢ်ဝဲဒၣ် တၢ်ကူၣ်သ့နီၢ်နီၢ်, ဒီးနဲၣ်ဆှၢဝဲဆူ တၢ်ဂ့ၤန့ၣ်လီၤ. အဂ့ၢ်ဒ်အံၤ, ယွၤ မ့ၢ်ပကစၢ်စီၤပၤ လၢပအဲၣ်ဘၣ်အီၤတဂၤအဃိ, မ်ပကဃုမၤလိန့ၢ် တၢ်နၥ်သန့ၤအီၤ, ဒီးတူၢ်လိၥ်အတၢ်ပၢဆှၢရဲၣ်ကျဲၤပတၢ်အိၣ်မူန့ၣ်တက့ၢ်.