ကျဲလီၤဆီတဘိ အိးထီၣ်အသး, ဒ်သိးတၢ်ကဆါဘၣ်လံာ်တဖၣ် အါအါဂီၢ်ဂီၢ်အဂီၢ်န့ၣ် မ့ၢ်ဝဲဒၣ်, ပှၤဖးလံာ်ဖိတဖၣ် မ့ၢ်အဲၣ်ဒိးဝဲလၢ ပှၤကစူးကါ အဝဲသ့ၣ်အမံၤလၢ ပှၤကွဲးလံာ် အမံၤဟူသၣ်ဖျါတဂၤ အတၢ်ကွဲးလံာ်တၢ်တဲပူအသီ လၢကဟဲဟးထီၣ်တဘ့ၣ်အပူၤအဂီၢ်န့ၣ် ကဘၣ်ဟ့ၣ်ဝဲဒၣ်ကျိၣ်စ့န့ၣ်လီၤ. ပှၤအသူၣ်ဆူၣ်အသးဆူၣ်တဖၣ် လၢအဟ့ၣ်ကျိၣ်စ့အအါကတၢၢ်တဂၤ, ကဒိးန့ၢ်ခွဲးယာ်လၢကဃုထၢဝဲအမံၤ, ဒ်သိးပှၤကစူးကါအီၤလၢလံာ်အပူၤန့ၣ်လီၤ. ကျိၣ်စ့လၢ ပှၤဒိးန့ၢ်အီၤတဖၣ်န့ၣ် ဘၣ်တၢ်ဟ့ၣ်လီၤဆူ တၢ်ဟ့ၣ်မၤစၢၤတၢ်အကရၢကရိတဖၣ်, ဒီးပှၤကွဲးတၢ်အလံာ်စ့ၢ်ကီး, ဆါဘၣ်ဝဲဒၣ်အါအါဂီၢ်ဂီၢ်န့ၣ်လီၤ.”

ပှၤအါဒံအါဂၤ မ့ၢ်ထံၣ်ဘၣ်ဝဲ အမံၤလၢလံာ်တၢ်ကွဲးအပူၤန့ၣ်ဒီး, အသူၣ်ခုအသးခုဝဲဒၣ်န့ၣ်လီၤ. တၢ်အံၤ မ့ၢ်ကျိၤကျဲတဘိလၢ ပှၤကသ့ၣ်ညါ, (မ့) “ပှၤကထံၣ်ပာ်ပနီၣ်” အဝဲသ့ၣ်အဂီၢ်န့ၣ်လီၤ. ဘၣ်ဆၣ်, သ့ၣ်ညါမၤလီၤတံၢ်နဲလၢ ပှၤလၢအကါဒိၣ်တဂၤန့ၣ် သ့ၣ်ညါတ့ၢ်နၤလၢ နမံၤ, ဒီးအိၣ်ခိးကွၢ်လီၤနၤန့ၣ်လီၤ.

ကစၢ်ယွၤ အတၢ်အဲၣ်လၢ ပှၤအံၣ်စရ့လးဖိတဖၣ်အဂီၢ်န့ၣ် ဝံယရှါယၤ ဒုးသ့ၣ်နီၣ်ဝဲ, ဒီးစံးဝဲဒၣ် “ယကိးလံနၤလၢ နမံၤလီၤ. နမ့ၢ်ယတၢ်” (ယရှါ ၄၃:၁) န့ၣ်လီၤ. လၢအပူၤကွံာ်အါနံၣ်အါလါအတီၢ်ပူၤ, ကစၢ်ယွၤ မၤတ့ၢ်ဝဲ တၢ်အၢၣ်လီၤ အီလီၤဒီးအပၢ်ဖးဒိၣ် စီၤအၤဘြၤဟၣ်အဂ့ၢ် (ကွၢ် ၁ မိၤရှ့ ၁၂:၁-၃) န့ၣ် ဝံယရှါယၤ ဒုးသ့ၣ်နီၣ်ထီၣ်က့ၤ ပှၤအံၣ်စရ့လးဖိတဖၣ်န့ၣ်လီၤ. ဖဲ ဝံ စံးကတိၤလီၤတၢ်အကတီၢ်, ပှၤအံၣ်စရ့လးဖိတဖၣ် အသးကကလၢၢ်ဘၣ်ဝဲ ဒ်ကစၢ်ယွၤ စူးကွံာ်ညိကွံာ်အဝဲသ့ၣ်န့ၣ်လီၤ. ဘၣ်ဆၣ်, ဝံ အတၢ်ကစီၣ်န့ၣ် ပာ်ဖျါထီၣ်ဝဲ ကစၢ်ယွၤ သ့ၣ်ညါအပှၤဂီၢ်မုၢ်အတၢ်လိၣ်တဖၣ်, ဒီးကစၢ်ယွၤအိၣ်ဒီးအဝဲသ့ၣ် (ယရှါ ၄၃:၂-၅) န့ၣ်လီၤ.

ဒ်န့ၣ်အသိး, ကစၢ်ယွၤ သ့ၣ်ညါ ပှၤလၢအစူၢ်က့ၤနာ်က့ၤကစၢ်ယ့ၣ်ရှူးတဖၣ် န့ၣ်လီၤ. ယိၤဟၣ် ၁၀:၃ စံးဘၣ်ပှၤလၢ “ဒီးကိးထီၣ်အသိဒၣ်ဝဲလၢအမံၤ, ဒီးဟးထီၣ်ယုၤအီၤ” န့ၣ်လီၤ. ဖဲပလူၤပိာ် ကစၢ်ယွၤအကျဲ, ဒီးအိၣ်မူပိာ်ထွဲ အတၢ်မၤလိာ်တဖၣ်လၢလံာ်စီဆှံအပူၤန့ၣ်ဒီး, ကစၢ်ယွၤ ကသ့ၣ်ညါပှၤန့ၣ်လီၤ. ကစၢ်ယွၤ သ့ၣ်ညါပှၤ, ဒီးအဲၣ်ပှၤန့ၣ်လီၤ. ကစၢ်ယွၤ အိၣ်ခိးကွၢ်ထွဲပှၤ, ဒီးသ့ၣ်ညါပှၤ လၢပမံၤဒၣ်ဝဲန့ၣ်လီၤ.