ယရ့လိာ်သးဒီး စၣ်ဒံၣ် (Sadie) န့ၣ် တမုာ်ဘၣ်. အဝဲမ့ၢ်ပှၤမၤသကိးတၢ်ဒီးယၤ, ဒီးတလီၢ်လီၢ်န့ၣ် စံးဆၢမၤဆၢယၤ ရၢၢ်ရၢၢ်စၢၢ်စၢၢ်အဃိ, ယဟးဆှဲးအီၤန့ၣ်လီၤ. ဘၣ်ဆၣ်, ဖဲအဝဲနၢ်ဟူ တၢ်ကမၤတၢ်သးခုကစီၣ်အတၢ်ရဲၣ်တၢ်ကျဲၤ လၢပတၢ်အိၣ်ဖှိၣ်န့ၣ်ဒီး, အဝဲသံကွၢ်ယၤလၢ မ့ၢ်အလဲၤဃုာ်ဒီးယၤ ကသ့ဧါန့ၣ်လီၤ. မ့မ့ၢ်ယၤန့ၣ် ယတအဲၣ်ဒိးလဲၤတၢ်ဒီးအီၤအဃိ, လၢတၢ်သးတဆူၣ်အပူၤန့ၣ် ယစံးဆၢက့ၤအီၤလၢ “ယကကွၢ်ဒံး” န့ၣ်လီၤ.

မုၢ်နံၤမုၢ်သီတဖၣ် လဲၤပူၤကွံာ်ဝံၤ, ဖျါလၢတၢ်ဂ့ၢ်အံၤ ဘၣ်တၢ်သးပ့ၤနီၣ်န့ၣ်လီၤ. ဘၣ်ဆၣ်, ကစၢ်ယွၤန့ၣ် တသးပ့ၤနီၣ်ဝဲဘၣ်. ယသးကလၢၢ်ဘၣ်ယဲ ဒ်ကစၢ်ယွၤ အိၣ်ခိးကွၢ်ယၤ, ဒ်သိးယကလဲၤကွဲမုာ် စၣ်ဒံၣ် န့ၣ်လီၤ. ဘၣ်မုၢ်တနံၤန့ၣ် ဖဲယဃ့ထုကဖၣ်တၢ်အဆၢကတီၢ်, လၢယသးပူၤန့ၣ် တၢ်သံကွၢ်တမံၤ ဟဲနုာ်လီၤဝဲဒၣ်လၢ “နတၢ်စံးဆၢမၤဆၢက့ၤ စၣ်ဒံၣ် အလိၤန့ၣ် နဆိကမိၣ်နဲလၢ မ့ၢ်တၢ်အဂ့ၤအဘၣ်ဧါ” န့ၣ်လီၤ.

တၢ်သံကွၢ်အံၤ ဒုးသ့ၣ်နီၣ်ထီၣ်ယၤ တၢ်သံကွၢ်လၢ ကစၢ်ယွၤသံကွၢ် ဝံယိၤနါ “နသးထီၣ်န့ၣ် ဂ့ၤစ့ၢ်ကီးဧါ” (ယိၤ ၄:၄) အဂ့ၢ်, ဖဲပှၤနံၤနဝ့ဖိတဖၣ် ပီၢ်ယၢ်လီၤက့ၤအသးဝံၤအကတီၢ်န့ၣ်လီၤ. စီၤယိၤနါ ဟ့ၣ်ပလီၢ် ပှၤနံၤနဝ့ဖိတဖၣ်လၢ အတၢ်ဒဲးဘးတဖၣ်အဃိ, ယွၤကစံၣ်ညီၣ်အဝဲသ့ၣ် (ယိၤ ၃:၁-၄) န့ၣ်လီၤ. လၢတၢ်ကမၢကမၣ်အပူၤန့ၣ် မ့ၢ်လၢ ပှၤဝ့ၢ်ဖိတဖၣ် ပီၢ်ယၢ်လီၤက့ၤအသးအဃိ, ” ဒီးယွၤပီၢ်ယၢ်လီၤက့ၤအသးလၢ တၢ်အၢလၢ အစံးလၢသါကမၤအီၤ, ဒီးတမၤဘၣ်ဝဲဘၣ်” (:၁၀) န့ၣ်လီၤ. “ဒီးစီၤယိၤနါ အသူၣ်ကိၢ်အသးဂီၤဒိၣ်မး, ဒီးအသးထီၣ်ဝဲလီၤ” (ယိၤ ၄:၁). ဝံယိၤနါ နာ်ဝဲဒၣ် ပှၤအ့ၣ်စရ့လးဖိ အဒုၣ်ဒါအအၢအသီ, လၢအကြၢးတၢ်မၤဟးဂီၤအီၤတဖၣ်န့ၣ် ပူၤဖျဲးထီၣ်ဝဲလၢ ကစၢ်ယွၤ အတၢ်စံၣ်ညီၣ်ညီညီဖိ (:၁-၃) န့ၣ်လီၤ.

ဘၣ်ဆၣ်, စီၤယိၤနါ တသးကညီၤဝဲဒၣ် ပှၤနံၤနဝ့ဖိတဖၣ် လၢအတအိၣ်ဒီးသူၣ်ဂ့ၢ်သးကျိၤအတၢ်သ့ၣ်ညါနီၢ်နီၢ်တဖၣ်အလိၤအဂ့ၢ် (:၅-၁၁) န့ၣ် ယွၤ ဘှီဘၣ်က့ၤ စီၤယိၤနါ, ဒီးဒုးသ့ၣ်ညါအီၤန့ၣ်လီၤ. ယွၤ မ့ၢ်ကစၢ်လၢ “အသးကညီၤတၢ်ဒီးသးအိၣ်တၢ်, လၢအသးထီၣ်ကီ, ဒီးအဘျုးအဖှိၣ်အိၣ်အါ” (:၂) တဂၤအဃိ, ပှၤကညီသ့ၣ်တဖၣ် ကမၤတ့ၢ်ဝဲတၢ်တမံၤဂ့ၤ,တမံၤဂ့ၤဒၣ်လဲာ်, ကစၢ်ယွၤအသူၣ်အိၣ်သးအိၣ် ကယဲၢ်ပှၤကိးဂၤဒဲး အတၢ်ဘီၣ်တၢ်ညီအဂီၢ်န့ၣ်လီၤ. ယွၤအတၢ်အဲၣ်တၢ်သးကညီၤန့ၣ် မ်ပကဟ့ၣ်ခီနီၤဆူ ပှၤဂၤအအိၣ်, ဒီးဒ်သိးအဝဲသ့ၣ် ကသ့ၣ်ညါ, ဒီးကအဲၣ်ကစၢ်ယွၤအဂီၢ်, မ်ပကမၤစၢၤ
အဝဲသ့ၣ်န့ၣ်တက့ၢ်.