တၢ်ဂီၤမူတဖၣ်အကျါ, တၢ်ဂီၤမူလၢ အထုးန့ၢ်ပသး, ဒီးနကအဲၣ်ဒိးကွၢ်အီၤ တဘျီဘၣ်တဘျီန့ၣ် မ့ၢ်ဝဲဒၣ် ပှၤဖီၣ်ညၣ်ဖိလၢ ကီၢ် ယံၣ်မ့ၣ်(န) (Yemen) တဖၣ် လၢတၢ်ဘၣ်ယိၣ်တလၢကွံာ်အခၢးအပူၤန့ၣ် ဂဲၤပျုၢ်မၤပူၤဖျဲးဝဲ သိလၢအကယၤတဖၣ် လၢပီၣ်လဲၣ်ဂီၤ (Red Sea) အပူၤန့ၣ်လီၤ. ကဘီလၢအတီၢ်ဝဲဒၣ် သိလၢ အကထိတဖၣ်န့ၣ် ဟဲတီၢ်ထီၣ်အသး, လၢ ရး(စ) အဲ-အရၤ (Ras Al-Ara), ကီၢ် ယံၣ်မ့ၣ်(န) အပီၣ်လဲၣ်ကၢၢ်ပၤနံၤ အသရ့ၤန့ၣ်လီၤ. ဖဲကဘီတခိၣ်အံၤ လဲၤဝဲဒၣ်ဆူ ကၠ့ၣ်ဘိထံၣ် (Djibouti) အကတီၢ်, လီၤတကျၢၢ်ကွံာ်ဝဲဒၣ်လၢပီၢ်လဲၣ်ပူၤ, ဒီးသိအါန့ၢ်အဒု တကယၤဃုဆံဘျဲၣ် လီၤအုးသံဝဲဒၣ်န့ၣ်လီၤ. ဘၣ်ဆၣ်, မ့ၢ်လၢပှၤဖီၣ်ညၣ်ဖိတဖၣ် ပာ်ဖှိၣ်မၤသကိးတၢ်အဃိ, သိဖိတဖၣ်အါတက့ၢ်န့ၣ် ပူၤဖျဲးဝဲလၢတၢ်သံ, ဒီးပှၤမၤညၣ်တဖၣ် ကဘၣ်လူၤဃုဖီၣ်ညၣ်အလီၢ်န့ၣ် ကဲထီၣ်ဝဲဒၣ်လၢ ပှၤလူၤဖီၣ်သိတဖၣ်န့ၣ်လီၤ.
တၢ်အဆိကတၢၢ်, ဖဲပထံၣ်ဘၣ် တၢ်ဂ့ၢ်က့ၢ်ဂီၤအံၤန့ၣ်ဒီး, ဝံယရှါယၤ အတၢ်ကတိၤတဖၣ်, “ပဝဲဒၣ်အံၤ, ဒ်သိအသိးန့ၣ်, ပဟးဖျိးကျဲခဲလၢာ်လံ. ပလဲၤကပၤကပၤတဂၤလၢ အကျဲဒၣ်ဝဲ, တဂၤလၢအကျဲဒၣ်ဝဲစုာ်စုာ်” (၅၃:၆) အဂ့ၢ်န့ၣ် ဟဲနုာ်လီၤဝဲဆူ ယသးပူၤန့ၣ်လီၤ. တကတီၢ်ဃီန့ၣ် ယကွၢ်ထံဆိကမိၣ် လံာ်စီဆှံအလီၢ်လံၤဒီးအသီ, မၤဘၣ်ထွဲဖိးမံလိာ်သးဃံဃံလၤလၤ, ဖဲကစၢ်ယ့ၣ်ရှူး စးထီၣ်ကိးဝဲ အပျၢ်အဘီၣ်တဖၣ်အဂ့ၢ်န့ၣ် အိၣ်ဟဲဖျါထီၣ်ဝဲလၢ ယသးအတၢ်ဆိကမိၣ်အပူၤန့ၣ်လီၤ. ဖဲကစၢ်ယ့ၣ်ရှူး လဲၤဝဲဒၣ်ဆူ ကၤလံၤလါပီၣ်လဲၣ်နံၤအကတီၢ်, ကွဲမုာ်ဝဲ အပှၤတၢ်မၢဖိတဖၣ် ဒီးစံးဝဲဒၣ်လၢ “ပိာ်ယခံတက့ၢ်. ဒီးယကပာ်သုလၢ ပှၤမၤညၣ်ပှၤကညီ” (၄:၁၉) အဂ့ၢ်န့ၣ် လံာ်တၢ်သးခုကစီၣ်, လံာ်မးသဲ ကွဲးနီၣ်ပာ်ဖျါဝဲဒၣ်န့ၣ်လီၤ.
မုၢ်တနံၤအံၤ, ပဝဲနၤယၤ, ပမ့ၢ်ပာ်လီၤပသးလၢ ပကကဲထီၣ် ကစၢ်ယ့ၣ်ရှူး အပျဲၢ်အဘီၣ်တဖၣ်န့ၣ်ဒီး, အဝဲကွဲမုာ်ပှၤဒ်သိးအံၤန့ၣ်လီၤ. ဒ်သိးပကမ့ၢ် ပှၤမၤညၣ်ပှၤကညီအဂီၢ်န့ၣ် ကစၢ်ယ့ၣ်ရှူး ကိးပှၤန့ၣ်လီၤ. ဘၣ်မနုၤအဃိလဲၣ်. ကယဲၢ်ပဝဲပှၤကညီကိးဂၤဒဲးတဖၣ်န့ၣ် ပလီၤဂာ်ဒီးသိတဖၣ်လၢအလဲၤကပၤကပၤ, ပဟးဖးဒီးယွၤအကျဲတဖၣ်, ယွၤအတၢ်တိာ်ကျဲၤ, ဒီးအတၢ်မၤလိာ်တဖၣ်န့ၣ်လီၤ. အလီၢ်အိၣ်လၢ တၢ်ကမၤပူၤမၤဖျဲးပှၤန့ၣ်လီၤ. ခီဖျိလၢအပျဲၢ်အဘီၣ်တဖၣ်န့ၣ် ပသ့ၣ်ညါ ကစၢ်ယ့ၣ်ရှူး, မ့ၢ်တၢ်အုၣ်က့ၤခီၣ်က့ၤကစၢ်တဂၤအံၤအဂ့ၢ် သ့ဝဲဒၣ်န့ၣ်လီၤ. ခီဖျိလၢအကျဲ အဃံအလၤအပူၤန့ၣ် ကစၢ်ယ့ၣ်ရှူး ဒုးကဲထီၣ်ပှၤလၢ အသိတဖၣ်, ဒ်သိးကဖီၣ်န့ၢ် သိအဂၤတဖၣ်န့ၣ်လီၤ.