ဖဲ အဲးရှတၢၣ်(န) (Asheton) ထံၣ်လိာ်အသးဒီး န့း(ခ) (Nick) န့ၣ် စံးလီၤအသး, ဒ်ပှၤလၢအကျဲလီၤမၢ်, ပှၤလၢအတၢ်ပညိၣ်တအိၣ်, ဒီးအတၢ်အိၣ်မူကျိၤကျဲတဖၣ်န့ၣ် ကပာ်ကဖၢလၢအသးအဂီၢ်, တၢ်တအိၣ်နီတမံၤဘၣ်န့ၣ်လီၤ. တယံာ်ဒံးဘၣ်န့ၣ် န့း(ခ)အနီၢ်ကစၢ်ဒၣ်ဝဲန့ၣ် ဘၣ်လဲၤခီဖျိဝဲ တၢ်အိၣ်အသးဒ်သိးအံၤ, ဒီးဘၣ်က့ၤမၤဘၣ်ထွဲလိာ်အသးဒီးအတၢ်စူၢ်တၢ်နာ်လၢ ကစၢ်ယွၤအဖီခိၣ်န့ၣ်လီၤ. ဖဲတၢ်ကီတၢ်ခဲအကတီၢ်, Nick ထံၣ်ဝဲ ကစၢ်ယွၤ, ဒ်အမ့ၢ်, ပှ့ၤတ့သပၢၤအဂ့ၤတဂၤ, လၢအတ့က့ၤသိက့ၤ အတၢ်အိၣ်မူ, ဒီးဟ့ၣ်က့ၤအီၤ တၢ်မုၢ်လၢ်အဂ့ၢ်န့ၣ် အဝဲဟ့ၣ်ခီနီၤလီၤဝဲ Asheton န့ၣ်လီၤ. အကတၢၢ်န့ၣ် ပှၤခံဂၤန့ၣ် ဒိးတ့ဒိးဖျီအသး, ဒီးမၤဝဲဒၣ် ပှၤတ့သပၢၤအတၢ်မၤ ဒ်အတၢ်သးစဲတမံၤ န့ၣ်လီၤ. ခဲကန့ၣ်အံၤ, အဝဲသ့ၣ် ဟ့ၣ်ဝဲဒၣ် ပှၤတ့သပၢၤအတၢ်မၤလိ, ဒီးဟ့ၣ်ဂံၢ်ဟ့ၣ်ဘါပှၤမၤလိတၢ်ဖိတဖၣ်လၢ အဝဲသ့ၣ် မ့ၢ်ပှၤလၢအလီၤဆီ, ဒီးဘၣ်တၢ်တ့အီၤလၢ တၢ်ပညိၣ်တမံၤအဂီၢ်န့ၣ်လီၤ.

ကစၢ်ယွၤ နဲၣ်လီၤဝဲ ဝံယံးရမံယၤအကတီၢ်, ဟ့ၣ်ဒိလီၤအသး ဒ်ပှၤတ့သပၢၤတဂၤအသိး, ဒီးမၢအလဲၤကွၢ် ပှၤတ့သပၢၤတဂၤ တ့က့ၤသိက့ၤဝဲ သပၢၤဟးဂီၤတဖျၢၣ်ဆူ သပၢၤအသီ, “ဒ်အဘၣ်ပှၤတ့သပၢၤအသး လၢအကမၤဝဲအသိး” (ယံး ၁၈:၄) န့ၣ်လီၤ. ယွၤ ဒုးနဲၣ်ဝဲဒၣ် ဝံယံးရမံယၤလၢ အတၢ်သ့တၢ်ဘၣ်လၢ ကတ့ဝဲသိဝဲ, ဒီးကတ့ဂ့ၤဘှီဂ့ၤထီၣ်က့ၤ ပှၤအံၣ်စရ့လးဖိတဖၣ်, ဒ်အဝဲသ့ၣ်မၤတ့ၢ်ဝဲအသိး, ကသူၣ်က့ၤဝဲမ့ၢ်ဂ့ၤ, ကထဲးထီၣ်ကွံာ်ဝဲမ့ၢ်ဂ့ၤ, ယွၤကမၤဂ့ၤထီၣ်က့ၤဝဲဒၣ်န့ၣ်လီၤ. အပှၤဂီၢ်မုၢ်အဂီၢ်, တၢ်ကစီၣ်ဘၣ်ဃးဒီးတၢ်ပီၢ်ယၢ်လီၤက့ၤသး, ဒီးတၢ်မုၢ်လၢ်န့ၣ် ယွၤ စံးဘၣ်တဲဘၣ် ခီဖျိလၢဝံယံးရမံယၤန့ၣ် “အံၣ်စရ့လးဧၢ, ယမၤသု ဒ်ပှၤတ့သပၢၤတဂၤအံၤအသိး သ့ဝဲ” (:၆) န့ၣ်လီၤ.

ဝံယံးရမံယၤ ဘိးဘၣ်ရၤလီၤဝဲ အတၢ်ကစီၣ်အံၤဆူ ပှၤအံၣ်စရ့လးဖိဒီတကလုာ်ဘၣ်ဆၣ်, အတၢ်ဂ့ၢ်မိၢ်ပှၢ်န့ၣ် ဘၣ်တၢ်စူးကါဝဲဒၣ်ဆူ ပဝဲတဂၤစုာ်စုာ်အတၢ်အိၣ်မူစ့ၢ်ကီးန့ၣ်လီၤ. လၢပသးအတၢ်ဆိကမိၣ်, ဒီးလၢပတၢ်အိၣ်မူအိၣ်ဂဲၤအပူၤ, ပမ့ၢ်ထံၣ်လီၤက့ၤ ပသးလၢ ပအိၣ်ယံၤ, အိၣ်လီၤဖးဒီးယွၤအတၢ်မ့ၢ်တၢ်တီန့ၣ်ဒီး, လၢတၢ်မၤစၢၤအဂီၢ်, ပဃၣ်လိၤက့ၤပသးဆူ ပှၤတ့သပၢၤအအိၣ် သ့ဝဲဒၣ်န့ၣ်လီၤ. ဖဲပတူၢ်လိာ်အၢၣ်လီၤ, ပတၢ်ကမၣ်တဖၣ်, ဒီးဒ်သိးကဆီတလဲ ပကျဲပကပိၤတဖၣ်အဂီၢ်, ပမ့ၢ်ဃ့ ကစၢ်ယွၤလၢ တၢ်နဲၣ်ကျဲ, ဒီးတၢ်ကူၣ်သ့န့ၣ်ဒီး, ပနာ်န့ၢ် ကစၢ်ယွၤ သ့ဝဲဒၣ်လၢ ကတ့က့ၤသိက့ၤပှၤ, လၢအတၢ်အဲၣ်အစုန့ၣ်လီၤ.