ပှၤလၢအကွဲး “My Utmost for His Highest” အလံာ် အီးစဝဲ(လ) ခၠ့(မ)ဘၢၣ်(စ) (Oswald Chambers) န့ၣ် အိးထီၣ်ဝဲ လံာ်စီဆှံ ခီလ့ၣ်ကၠိဖိတဖျၢၣ်, ဒီးထံၣ်သ့ၣ်ညါဝဲဒၣ်လၢ ပှၤမၤတၢ်ဖိ အနီၢ်ဒီမါဝၤခံဂၤန့ၣ်, ဟုၣ်ဟံးန့ၢ်ဝဲဒၣ်တၢ်ပိးတၢ်လီတဖၣ်န့ၣ်လီၤ. တၢ်မၤကမၣ်တၢ်န့ၣ် ကဘၣ်တၢ်ဘှါဆှဲမၤဂ့ၤက့ၤတကီၢ်ခါဘၣ်ဆၣ်, ဘၣ်ဃးဒီးတၢ်ဂ့ၢ်အံၤန့ၣ် အီးစဝဲ(လ) ပာ်လီၤအသးလၢ တလဲၤထံၣ်လိာ်အသးဒီးအဝဲသ့ၣ်ဘၣ်. လၢအလီၢ်န့ၣ် ဒ်သိးကစၢ်ယွၤ ကဒုးနဲၣ်ဖျါထီၣ် တၢ်မၤကမၣ်တၢ်အဂ့ၢ်, လၢအဝဲသ့ၣ်အသူၣ်အသးအပူၤအဂီၢ်န့ၣ် အီးစဝဲ(လ) ဃ့ထုကဖၣ်ဝဲဒၣ်န့ၣ်လီၤ. တၢ်ဆၢကတီၢ်လဲၤပူၤကွံာ်ဝဲလၢအနွံတဖၣ်ဝံၤ, အဝဲသ့ၣ် အၢၣ်လီၤ အတၢ်ကမၣ်, ဒီးပာ်ဖျါထီၣ် တၢ်ပီၢ်ယၢ်လီၤက့ၤသးန့ၣ်လီၤ. အီးစဝဲ(လ) စံးဘၣ် အဝဲသ့ၣ်လၢ, “တၢ်ဂ့ၢ်အံၤ ယသ့ၣ်ညါယံာ်တ့ၢ်လံဘၣ်ဆၣ်, ယအဲၣ်ဒိး အိၣ်ခိးကွၢ်, တုၤလၢယွၤအသးစီဆှံ ကတိၤတၢ်ဒီးသု” န့ၣ်လီၤ. နီၢ်ဒီမါဝၤခံဂၤန့ၣ် အသးဘၣ်ဒိဘၣ်ထံး, ဒီးကမၢကမၣ်ဝဲဒၣ်, ဒီးဟ့ၣ်လီၤအးလီၤ အတၢ်အိၣ်မူဆူ ကစၢ်ယ့ၣ်ရှူးအစုပူၤန့ၣ်လီၤ.

တချုးလၢ ကစၢ်ယ့ၣ်ရှူး သံဝဲဒၣ်န့ၣ် အၢၣ်လီၤအီလီၤဝဲ အတံၤသကိးတဖၣ်လၢ ယွၤအသးစီဆှံ မၤတၢ်အဂ့ၢ်, “မ့မ့ၢ်သးလၢအဘၣ်ဃးဒီးတၢ်မ့ၢ်တၢ်တီန့ၣ်, တုၤအဟဲဝဲဒီး, ကဆှၢသုဆူ တၢ်မ့ၢ်တၢ်တီခဲလၢာ်အပူၤ” (ယိၤ ၁၆:၁၃) န့ၣ်လီၤ. ကစၢ်ယ့ၣ်ရှူး ကက့ၤဝဲဆူပၢ်ယွၤအအိၣ်အဂ့ၢ်န့ၣ် အပျဲၢ်အဘီၣ်တဖၣ် ဆိကမိၣ်ဝဲ, ဒီးအသူၣ်အုးသးအုးဘၣ်ဆၣ်, ကစၢ်ယ့ၣ်ရှူး မၤဂၢၢ်မၤကျၢၤဝဲဒၣ်လၢ “ယလဲၤတၢ်န့ၣ် မ့ၢ်အဂ့ၤဒၣ်တၢ်လၢသုဂီၢ်လီၤ…. ပှၤမၤစၢၤတၢ်တဂၤ,…. ယကမၢအဟဲလီၤဆူသုအိၣ်” (:၇) န့ၣ်လီၤ. ခီဖျိလၢသးစီဆှံန့ၣ် ကစၢ်ယွၤ ကဒုးနဲၣ်ဖျါထီၣ် ပှၤဟီၣ်ခိၣ်ဖိ အတၢ်ဒဲးဘး, “ဒီးကသိၣ်ဃီၣ် ဟီၣ်ခိၣ်လၢ တၢ်ဒဲးဘးအဂ့ၢ်, ဒီးလၢတၢ်တီတၢ်လိၤအဂ့ၢ် ဒီးလၢတၢ်စံၣ်ညီၣ်အဂ့ၢ်” (:၈) န့ၣ်လီၤ. ဒီး ကဆှၢသု (ပှၤဟီၣ်ခိၣ်ဖိသ့ၣ်တဖၣ်) ဆူ “တၢ်မ့ၢ်တၢ်တီခဲလၢာ်အပူၤ” (:၁၃) န့ၣ်လီၤ.

“ဒ်သိးသုသုတဘၣ်တၢ်လီၤကမၣ်အလီၢ်တဂ့ၤ” (:၁), ဒီးဒ်သိးပကမုာ်လၤသးခုဝဲလၢ တၢ်မူအထူအယိာ်အဂီၢ်န့ၣ် သးစီဆှံကစၢ် ဖံးတၢ်မၤတၢ်, တုၤမုၢ်မဆါတနံၤအံၤန့ၣ်လီၤ. ဖဲပမၤကမၣ်တၢ်အကတီၢ်, ဒ်သိးကဒုးသ့ၣ်ညါပှၤ, ဒီးဖဲလၢပသူၣ်အုးသးအုးအကတီၢ်, ဒ်သိးကမၤမုာ်ထီၣ်က့ၤပှၤအဂီၢ်, ကစၢ်ယွၤ ဆှၢလီၤဝဲ “ပှၤမၤစၢၤတၢ်တဂၤ,” ဒီးကနဲၣ်ဆှၢပှၤဆူ တၢ်ဘူၣ်ထီၣ်ဘါထီၣ် ကစၢ်ယွၤအဂီၢ်န့ၣ်လီၤ.