ဖဲယသးစၢ်အကတီၢ်, ယဘၣ်သးလဲၤအီၣ် ကိၣ်ဆဲးသိ, ဒီးလၣ်ဖးထံအဆၢလၢ ခၠ့း-ဖ့(လ)-အ့ၣ် (Chick-fil-A) အမဲရကၤ တၢ်အီၣ်န့ၢ်ချ့ကျးန့ၣ်လီၤ. ဒ်ယမ့ၢ်ယဲ ပှၤဒိၣ်တုာ်ခိၣ်ပှဲၤတဂၤအသိး, ဖဲယသုးလီၢ်သုးကျဲဆူ ကီၢ်စဲၣ်အဂၤတဘ့ၣ်န့ၣ်ဒီး, ယကမၢကမၣ်ယဲလၢ တၢ်လီၢ်အိၣ်စီၤစုၤ မံးလာ်လၢ အကယၤဒၣ်လဲာ်, ယတထံၣ်ဘၣ် တၢ်အီၣ်ကျး လီၤဂာ်ဒီး Chick-fil-A န့ၣ် တအိၣ်ဝဲ နီတတီၤဘၣ်န့ၣ်လီၤ. ဖဲပဟံၣ်ဖိဃီဖိ အတၢ်လဲၤဟးကသုၣ် အကတီၢ်, ပဘၣ်ရဲၣ်ကျဲၤ ပတၢ်လဲၤတဖၣ် ဒ်သိးပကအိၣ်ပတုာ်အီၣ်အီတၢ်လၢ Chick-fil-A အတၢ်အီၣ်ကျးတဖျၢၣ်ဖျၢၣ်န့ၣ်လီၤ. ပဆၢမုၢ်လၢ်ဝဲဒၣ်လၢ ဘၣ်ဖဲတနံၤနံၤန့ၣ် Chick-fil-A အတၢ်အီၣ်ကျးတဖျၢၣ် ကဘၣ်တၢ်ဟဲအိးထီၣ်အီၤလၢ အအိၣ်ဘူးဒီးပဟံၣ်န့ၣ်လီၤ.
ပဝဲကိးဂၤ, ပလဲၤခီဖျိကလၢၢ်ဘၣ် တၢ်ဆၢမုၢ်လၢ်တၢ်တမံၤမံၤန့ၣ်လီၤ. ဘၣ်တဘျီဘျီ ပတၢ်ဆၢမုၢ်လၢ်, ဒ်အမ့ၢ် တၢ်အီၣ်ကျး လၢပဘၣ်သူၣ်ဘၣ်သးလဲၤအီၣ်တၢ်န့ၣ် တမ့ၢ်လၢ ပတလိၣ်ဘၣ်အီၤနီၢ်နီၢ်ဘၣ်န့ၣ်လီၤ. မ့မ့ၢ်လၢတၢ်ဆၢကတီၢ်အဂၤတဖၣ်န့ၣ် ပတၢ်ဆၢမုၢ်လၢ်တဖၣ် ပာ်ဖျါထီၣ် တၢ်အဒိၣ်အယိာ်, ပဆၢမုၢ်လၢ်တၢ်နးနးကလဲာ်န့ၣ်လီၤ.
ဝ့ၢ် ဖံလံးပံၤ အပှၤစူၢ်က့ၤနာ်က့ၤတၢ်ဖိတဖၣ်, ကအိၣ်မူအိၣ်ဂဲၤဝဲ ဒ်အတၢ်ဆၢမုၢ်လၢ်အဒိၣ်အယိာ်ကတၢၢ်, ဒ်အမ့ၢ်, ကစၢ်ခရံာ် အတၢ်ဟဲခံဘျီတဘျီ, ဒီးအဘီအမုၢ် ကလၢထီၣ်ပှဲၤထီၣ် (ဖံလံး ၃:၂၀) အသိးအဂီၢ်န့ၣ် စီၤပီလူး ကွဲးဟ့ၣ်ပလီၢ်ဝဲဒၣ် အဝဲသ့ၣ်န့ၣ်လီၤ. ကစၢ်ယ့ၣ်ရှူး အတၢ်ဟဲက့ၤကဒါက့ၤန့ၣ် ကမၤလၢထီၣ်ပှဲၤထီၣ် ကယဲၢ်တၢ်ခဲလၢာ်, ဒီးကလဲက့ၤ ပှၤလၢအနာ်အီၤတဖၣ်အနီၢ်ခိ, ဒ်သိး “ကလီၤဂာ်ဒီးအနီၢ်ကစၢ်ဒၣ်ဝဲ” (:၂၁) အဂီၢ်န့ၣ်လီၤ.
ပကဆၢမုၢ်လၢ်တၢ်, လၢအတဟဲစိာ်န့ၢ်ပှၤ တၢ်သးမံသးမုာ်အထူအယိာ်အလီၢ်န့ၣ်, စီၤပီလူး ပာ်ဖျါဝဲဒၣ်လၢ, တၢ်ကမၤအသးနီၢ်နီၢ်န့ၣ် ပှၤစူၢ်က့ၤနာ်က့ၤတၢ်ဖိတဖၣ် “ကွၢ်လၢ် ပှၤအုၣ်က့ၤခီၣ်က့ၤတၢ်” (:၂၀), မုၢ်တနံၤ, ဖဲကစၢ်ခရံာ် ဟဲဝဲဒၣ်အဆၢကတီၢ်န့ၣ် တၢ်နးတၢ်ဖှီၣ်တအိၣ်လၢၤဘၣ်, ဒီးပကထံၣ်ဘၣ် ကစၢ်ယ့ၣ်ရှူး မဲာ်သကိးမဲာ်န့ၣ်လီၤ.
မုၢ်တနံၤန့ၣ် ပသ့ၣ်ညါလၢ ပတၢ်ဆၢမုၢ်လၢ် ကမၤမံမၤမုာ်ပသးန့ၣ် ဒုးအိၣ်ထီၣ်ဝဲဒၣ် တၢ်မုၢ်လၢ်, လၢတနံၤဘၣ်တနံၤ, ပကဘၣ်အိၣ်မူလၢခရံာ်အဂီၢ် (:၁၂-၁၄) န့ၣ်လီၤ. တယံာ် ဒံးဘၣ်န့ၣ် တၢ်ဟဲအိးထီၣ် Chick-fil-A အတၢ်အီၣ်ကျး, လၢအအိၣ်စီၤစုၤဒီးယဟံၣ် ထဲဒၣ်စှၤမံးလာ်န့ၣ် မ့ၢ်တၢ်မၤသ့ၣ်နီၣ်ထီၣ်အဆံးဖိလၢ, မုၢ်တနံၤန့ၣ် ပတၢ်ဆၢမုၢ်လၢ် အကါဒိၣ်န့ၢ်အန့ၣ်တမံၤ, ကလၢထီၣ်ပှဲၤထီၣ်ဝဲန့ၣ်လီၤ. တုၤလၢအကတီၢ်အံၤန့ၣ် ပကဘၣ်အိၣ်ခိးဝဲဒၣ်န့ၣ်လီၤ.