ဖဲယမ့ၢ်ယဲဖိသၣ်အကတီၢ်, ယမံပၢၢ်ထီၣ်လၢ ဖးဖီမုၢ်, ဒီးလၢတၢ်တူၢ်လိာ်သမှံၤအဒၢးပူၤန့ၣ် ယထံၣ် ယမိၢ်ဆ့ၣ်နီၤလၢ ခးဆ့ၣ်နီၤအလိၤတလီၢ်လီၢ်န့ၣ်လီၤ. မ့ၣ်အူသၣ်လၢစီၤနီၤခိၣ် အတၢ်ကပီၤဆဲးဖျါထီၣ်ဝဲ လံာ်တဘ့ၣ် လၢယမိၢ်အကံၢ်ဒူၣ်လိၤ, ဒီးမ့ၢ်ဝဲဒၣ် လံာ်စီဆှံန့ၣ်လီၤ. မ့ၢ်လၢတၢ်ဆါယံၢ်အတၢ်ဆါမၤကီမၤခဲအီၤအဃိ, ယမိၢ် မံတန့ၢ်ဂဲၤတန့ၢ်ဘၣ်ဆၣ်, စူးကါ အတၢ်ဆၢကတီၢ်ဂ့ၤဂ့ၤဘၣ်ဘၣ်န့ၣ်လီၤ. လၢမုၢ်နၤဒ်သိးအံၤတဖၣ်န့ၣ် ပတစံးကတိၤသကိးတၢ်ဘၣ်. မ့မ့ၢ်ယၤန့ၣ် ယအဲၣ်ဒိးမံယဲဒိၣ်မးအဃိ, ထဲဒၣ်ယဖျးလီၤယခိၣ်, ဒီးဟးဝ့ၤဝီၤလၢဒၢးပူၤန့ၣ်လီၤ. ဘၣ်ဆၣ်, မုၢ်ဂီၤထီၣ်သီ တၢ်ဘှ့ၣ်တၢ်ဘှီၣ် အကတီၢ်ဒ်သိးအံၤန့ၣ်, ယမိၢ် ရ့လိာ်သးဒီးကစၢ်ယွၤ, ဒီးကစၢ်ယွၤ ကတိၤတၢ်ဒီးအီၤန့ၣ် ယသ့ၣ်ညါဝဲဒၣ်န့ၣ်လီၤ.
ပကသ့ၣ်ညါအါထီၣ် ကစၢ်ယွၤ လၢလၢပှဲၤပှဲၤအဂီၢ်, ပဃုထံၣ်န့ၢ် တၢ်အကတီၢ်ဖိတဖၣ် ကသ့ဝဲဒၣ်ဒ်လဲၣ်. တလိၣ်လၢ ပကဘၣ်အိၣ်ခိး မုၢ်နၤလၢ ပမံတန့ၢ်ဂဲၤတန့ၢ်အနၤန့ၣ်ဘၣ်. ကစၢ်ယ့ၣ်ရှူး ပာ်တ့ၢ်ကွံာ် အပျဲၢ်အဘီၣ်တဖၣ် ဒ်သိးကဟံးန့ၢ် တၢ်ဆၢကတီၢ်, ထဲတဂၤဧိၤ, ဒီးစံးကတိၤတၢ်ဒီးပၢ်ကစၢ်ယွၤအဂီၢ် (မၢ် ၁:၃၅) န့ၣ်လီၤ.
လံာ်စီဆှံ စံးဘၣ်ပှၤလၢ “အိၣ်ဃိကလာ်ဒီး သ့ၣ်ညါလၢယမ့ၢ်ယွၤတက့ၢ်” (စံး ၄၆:၁၀) န့ၣ်လီၤ. ကစၢ်ယွၤ မ့ၢ်မတၤတဂၤလဲၣ်န့ၣ် ဒ်သိးကစံးထီၣ်ပတြၢၤဝဲအဂီၢ်, (၆၃:၁-၈) စီၤဒၤဝံး ဃုရ့လိာ်အသးဘူးဘူးတံၢ်တံၢ်ဒီးကစၢ်ယွၤအဂ့ၢ်န့ၣ် စီၤဒၤဝံး အထါတဖၣ် ပာ်ဖျါထီၣ်ဝဲ တလီၢ်လီၢ်န့ၣ်လီၤ.
ဟီၣ်ခိၣ်ဒီဘ့ၣ်န့ၣ် အကလုၢ် သီၣ်သတြူး, ဒီးပဘၣ်တၢ်ကွဲန့ၢ်လွဲန့ၢ်ပှၤလၢ တၢ်သီၣ်တၢ်သဲတဖၣ်တလီၢ်လီၢ်န့ၣ်လီၤ. တၢ်သ့ၣ်တဖၣ်အံၤ ထုးန့ၢ်ပသး, ဒီးအဲၣ်ဒိးဝဲလၢပတၢ်ပာ်ဖှိၣ်မၤသကိးတၢ်န့ၣ်လီၤ. လၢတၢ်န့ၣ်အဃိ, ပကဘၣ်ဃုထံၣ် တၢ်ဘှ့ၣ်တၢ်ဘှီၣ်အကတီၢ်ဖိတဖၣ်သပှၢ်တၢၢ်, မ့ၢ်လၢဟံၣ်ဃီ တၢ်အိၣ်မူအိၣ်ဂဲၤ အတၢ်ဂ့ၢ်ကီ, (မ့) ပမၤလၢာ်အါ ပတၢ်ဆၢကတီၢ်လၢ တၢ်ဖံးတၢ်မၤအဃိ, ပကဃုထံၣ်န့ၢ်အီၤကီခဲဝဲဒၣ်န့ၣ်လီၤ. ပကဃုထံၣ်န့ၢ် ကစၢ်ယွၤလၢ တၢ်ဘှ့ၣ်တၢ်ဘှီၣ်အပူၤန့ၣ်လီၤ.
ကစၢ်ယွၤန့ၣ် တမံခ့မံသပ့ၤဘၣ်. အိၣ်ခိးဒိကနၣ် ပတၢ်ဃ့ထုကဖၣ်န့ၣ်လီၤ. ဒီးထီဘိန့ၣ် ကစၢ်ယွၤ အိၣ်ကတဲာ်ကတီၤပာ်အသး, ဒ်သိးကဟံးန့ၢ်တၢ်ဆၢကတီၢ်ဒီး ပှၤလၢအဃုအီၤတဖၣ်န့ၣ်လီၤ.